ເຈົ້າໜ້າທີ່ອົສຕຣາລີ ຈັບຢາໄອຊ໌ – ເຮໂຣອິນ 1 ໂຕ້ນ ຂົນຈາກເຮືອປະເທດໄທ

323

ຕໍາຫຼວດອົສຕຣາລີຢຶດຢາໄອນໍ້າໜັກກວ່າ 1 ໂຕ້ນ ມູນຄ່າ 840 ລ້ານໂດລາ ຊຸກເຊື່ອງຢູ່ໃນຕູ້ລໍາໂພງ ສົ່ງມາທາງເຮືອຈາກປະເທດໄທ ແຕ່ຍັງຈັບໃຜບໍ່ໄດ້.

ສໍານັກຂ່າວເອເອັຟພີລາຍງານຈາກເມືອງເມລເບິລ ປະເທດອົສຕຣາລີ ເມື່ອວັນສຸກ ທີ 7 ມິຖຸນາ ວ່າ ທ່ານເຄຣັກ ພັລເມີ ຜູ້ບັນຊາການຕໍາຫຼວດຊາຍແດນຂອງອົສຕຣາລີ ເປີດເຜີຍວ່າ ທາງເຈົ້າໜ້າທີ່ຕໍາຫຼວດສາມາດຢຶດຢາເສບຕິດເປັນປະເພດຢາໄອຊ໌ (methamphetamine) ນໍ້າໜັກ 1,6 ໂຕ້ນ ແລະ ເຮໂຣອິນອີກ 37 ກິໂລກຣາມ ທີ່ຫໍ່ໄວ້ຢ່າງດີຊຸກເຊື່ອງຢູ່ໃນຕູ້ລໍາໂພງ ສົ່ງມາທາງເຮືອຈາກປະເທດໄທ ເຖິງເມືອງເມລເບີລຂອງອົສຕຣາລີ ຖືເປັນການຈັບກຸມຢາເສບຕິດລາຍໃຫຍ່ເທົ່າທີ່ເຄີຍເຫັນມາ ໃນອົສຕຣາລີ ເຊິ່ງປະລິມານຫຼາຍເຊັ່ນນີ້ ສະແດງວ່າຜູ້ທີ່ທໍາການລັກລອບຂົນຂາເສບຕິດນັ້ນ ມີຄວາມກ້າແບບບໍ່ຢ້ານກົດໝາຍ ເຖິງວ່າຈະຍັງບໍ່ມີການຈັບກຸມຜູ້ໃດທີ່ກ່ຽວຂ້ອງກັບການລັກລອບຂົນຢາເສບຕິດຄັ້ງນີ້ ແຕ່ຕໍາຫຼວດກໍ່ຢາກຂໍຮ້ອງປະຊາຊົນ ຖ້າມີເບາະແສພົບວ່າມີໃຜກ່ຽວຂ້ອງ ໃຫ້ຮີບແຈ້ງຕໍາຫຼວດ ສ່ວນຢາເສບຕິດທີ່ຢຶດໄດ້ຄັ້ງນີ້ ມີມູນຄ່າ 840 ລ້ານໂດລາ ຫຼື ປະມານ 7.270 ຕື້ກີບ ແລະ ຄິດເປັນ 10% ຂອງຢາເສບຕິດທັງໝົດ ທີ່ເຈົ້າໜ້າທີ່ຕໍາຫຼວດຊາຍແດນອົສຕຣາລີຈັບໄດ້ ໃນໄລຍະປີຜ່ານມາ.