Apple ຢຸດຕິບໍລິການ iTunes ພ້ອມເປີດຕົວ iPadOS ແລະ Mac Pro ລຸ້ນໃໝ່

272

Apple ໄດ້ຈັດງານ Apple Worldwide Developers Conference 2019 (WWDC 2019) ໂດຍພາຍໃນງານໄດ້ມີການປະກາດເປີດຕົວທັງຮາດແວຣ໌ ແລະ ຊັອຟແວຣ໌ໃໝ່ ລວມເຖິງການປະກາດຢຸດຕິບໍລິການຂອງ Apple ບາງອັນດ້ວຍ ໄປຕິດຕາມກັນວ່າໃນງານ WWDC 2019 ນີ້ມີຄວາມເຄື່ອນໄຫວຫຍັງແດ່:

Apple ປະກາດຢຸດຕິການໃຫ້ບໍລິການ iTunes ໃນຄອມພິວເຕີ Mac ແລ້ວ ໂດຍຈະມີແອັບພລິເຄຊັ່ນ 3 ອັນ ເຂົ້າມາແທນ iTunes ໄດ້ແກ່: Apple Music, Apple Podcast ແລະ Apple TV ຖືເປັນການປິດຕົວຊັອຟແວຣ໌ ຟັງເພງຍອດນິຍົມທີ່ໃຫ້ບໍລິການມາດົນກວ່າ 18 ປີ ໂດຍ iTunes ເປີດຕົວຄັ້ງທໍາອິດ ມາຕັ້ງແຕ່ປີ 2001.

Apple ໄດ້ເປີດຕົວລະບົບປະຕິບັດການໃໝ່ ທີ່ອອກແບບມາໂດຍສະເພາະໃຫ້ໃຊ້ສໍາລັບ iPad ໂດຍມີຊື່ວ່າ iPadOS ຫຼັງຈາກກ່ອນໜ້ານີ້ iPad ຕ້ອງໃຊ້ລະບົບປະຕິບັດການຮ່ວມກັບ iPhone ເຮັດໃຫ້ອາດຈະບໍ່ສາມາດໃຊ້ວຽກໄດ້ເຕັມປະສິດທິພາບ ໂດຍຈຸດເດັ່ນຂອງ iPadOS ນີ້ ຈະເຮັດໃຫ້ສາມາດເປີດໃຊ້ຫຼາຍແອັບພລິເຄຊັ່ນໄດ້ພ້ອມກັນ ນອກຈາກນີ້ ຍັງຮອງຮັບການໃຊ້ Thumb drive ກັບ iPad ດ້ວຍ.

ນອກຈາກນີ້ Apple ຍັງໄດ້ເປີດຕົວ Mac Pro ດີໄຊຮູບແບບໃໝ່ຕ່າງຈາກດີໄຊແບບເກົ່າທີ່ອອກມາຕັ້ງແຕ່ປີ 2013 ເຊິ່ງຜູ້ໃຊ້ກໍ່ວິຈານວ່າ ມີໜ້າຕາຄືຖັງຂີ້ເຫຍື້ອ ເນື່ອງຈາກເປັນຊົງກົມ ແຕ່ໃນດີໄຊໃໝ່ນີ້  Mac Pro ເວີຊັ່ນ 2019 ມາໃນຮູບຊົງຫຼ່ຽມກວ່າເກົ່າ ໂດຍຕົວສະເປັກຕ່ໍາສຸດ CPU 28-core 35 GHz ແຣມ 32 GB ຮາດດິດ 256 GB ລາຄາເລິ່ມຕົ້ນ 5.999 ໂດລາ ຫຼື ກວ່າ 52 ລ້ານກີບ.

Mac Pro

ສໍາລັບຈໍ Retina ຕົວໃໝ່ຂອງ Apple ມີຄວາມລະອຽດ 6K ໂດຍມີຊື່ວ່າ Pro Display XDR (Extreme Dynamic Range) ລາຄາ 4.999 ໂດລາ ຫຼື ກວ່າ 43 ລ້ານກີບ ຢ່າງໃດກໍ່ຕາມ ສ່ວນໜ້າຈໍບໍ່ໄດ້ມາພ້ອມກັບຂາຕັ້ງ ແຕ່ຈະຕ້ອງຊື້ຂາຕັ້ງແຍກ ໃນລາຄາ 999 ໂດລາ ຫຼື ປະມານ 8,7 ລ້ານກີບ.

ຈໍ Retina ທີ່ຂາຍແຍກກັບຂາຕັ້ງ

ໃນສ່ວນຂອງ Apple Watch ກໍ່ມີຄວາມເຄື່ອນໄຫວເຊັ່ນດຽວກັນ ໂດຍທາງ Apple ໄດ້ປະກາດວ່າ ຕໍ່ໄປທາງ Apple Watch ຈະມີ App Store ເປັນຂອງຕົວເອງເພື່ອໃຫ້ມີແອັບພລິເຄຊັ່ນທີ່ຫຼາກຫຼາຍຂຶ້ນ.

ໃນສ່ວນຂອງຊັອຟແວຣ໌ ມີການເປີດຕົວ iOS 13 ລຸ້ນຫຼ້າສຸດ ສໍາລັບ iPhone ໂດຍຟີເຈີໃໝ່ທີ່ດີກວ່າເວີຊັ່ນເກົ່າ ຄືການມີ dark mode ເປັນຄັ້ງທໍາອິດ ສໍາລັບຊ່ວຍໃນການປະຢັດພະລັງງານ.

ແລະ ສຸດທ້າຍ Apple ໄດ້ມີການເປີດຕົວ MacOS ເວີຊັ່ນໃໝ່ 10,15 Catalina ໂດຍມີຄຸນສົມບັດໃໝ່ໆ ເຊັ່ນສາມາດໃຊ້ຈໍ iPad ເປັນຈໍມໍນິເຕີ ທີ 2 ໄດ້.