ສະຫະລັດ ກັງວົນ ຈີນ ອາດໃຊ້ “ສິນແຮ່ຫາຍາກ” ຕອບໂຕ້ທາງການຄ້າ

279

ກະຊວງປ້ອງກັນປະເທດສະຫະລັດ ສະເໜີລາຍງານຕໍ່ສະພາຄອງເກຣສກ່ຽວກັບ “ສິນແຮ່ຫາຍາກ” ຫຼື “ແຣຣ໌ – ເອີດທ໌” ລະຫວ່າງຄວາມວິຕົກກັງວົນທີ່ຫຼາຍຂຶ້ນ ວ່າ ຈີນເຊິ່ງເປັນຜູ້ຜະລິດລາຍໃຫຍ່ອາດໃຊ້ສິ່ງນີ້ຕອບໂຕ້ທາງການຄ້າ ຂະນະທີ່ ກະຊວງການຄ້າສະຫະລັດ ຂຶ້ນພາສີຕໍ່ເຄື່ອງນອນຈາກຈີນຍ້ອນທຸ້ມຕະຫຼາດຫຼາຍເກີນໄປ.

ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນພຸດ ທີ 29 ພຶດສະພາ ວ່າ ທ່ານໄມຄ໌ ແອນດຣູ ໂຄສົກກະຊວງປອງກັນປະເທດສະຫະລັດ ກ່າວເມື່ອວັນພຸດວ່າ ໜ່ວຍງານທີ່ກ່ຽວຂ້ອງຂອງກະຊວງຫາກໍ່ສໍາເລັດການຈັດຮ່າງກົດໝາຍລະຫວ່າງກະຊວງດ້ານການປົກປ້ອງຜະລິດພັນກ່ຽວຂ້ອງກັບວຽກງານດ້ານການປ້ອງກັນເຊິ່ງມີ້ເນື້ອໃນສໍາຄັນກ່ຽວກັບ ສິນແຮ່ ຫາຍາກ ຫຼື ແຣຣ໌ – ເອີດທ໌ (Rare-earth elements) ແລະ ນໍາສະເໜີຕໍ່ສະພາຄອງເກຣສ ປັດຈຸບັນສິນແຮ່ຫາຍາກມີຢູ່ 17 ຊະນິດ ແລະ ການທີ່ອົງປະກອບຂອງແຮ່ມັກບໍ່ລວມກຸ່ມຢູ່ໃນແຫຼ່ງດຽວກັນຈຶ່ງເຮັດໃຫ້ການເຮັດເໝືອງສິນແຮ່ແບບນີ້ຂ້ອນຂ້າງຫຍຸ້ງຍາກ ໂດຍສິນແຮ່ຫາກຍາກເຫຼົ່ານີ້ສ່ວນໃຫຍ່ຢູ່ປະເທດຈີນ ແລະ ໃຊ້ເປັນວັດຖຸດິບສໍາຄັນຂອງວຽກງານດ້ານເທັກໂນໂລຢີ ແລະ ອຸດສາຫະກໍາຫຼາຍ ດ້ານລວມເຖິງການຜະລິດອາວຸດ.

ເຖິງວ່າລັດຖະບານປັກກິ່ງ ຍັງບໍ່ເຄີຍສະແດງທ່າທີ “ຢ່າງເປັນທາງການ” ກ່ຽວກັບການຈັດການຄ້າຂາຍສິນແຮ່ຫາຍາກກັບສະຫະລັດ ແຕ່ຫຼາຍຝ່າຍມີຄວາມເຫັນໄປທິດທາງດຽວກັນ ວ່າ ການທີ່ປະທານປະເທດສີ ຈິ້ນຜິງ ຜູ້ນໍາຈີນເດີນທາງໄປຢ້ຽມຢາມບໍລິສັດຜະລິດສິນແຮ່ຫາກຍາກໃນມົນທົນຈຽງຊີ ພຽງບໍ່ເທົ່າໃດມື້ ຫຼັງອາເມຣິກາປະກາດຂຶ້ນບັນຊີດໍາບໍລິສັດຫົວເຫວີ່ຍນັ້ນ “ບໍ່ແມ່ນເລື່ອງບັງເອີນ” ຂະນະທີ່ ສື່ຈີນເກືອບທຸກຂະແໜງຍົກລະດັບສົງຄາມຈິດຕະວິທະຍາເລື່ອງສິນແຮ່ຫາຍາກກັບສະຫະລັດ ໂດຍການນໍາສະເໜີຂ່າວຢ່າງຕໍ່ເນື່ອງ ວ່າ ລັດຖະບານປັກກິ່ງຈະໃຊ້ສິນແຮ່ຫາຍາກເປັນເຄື່ອງມືຕອບໂຕ້ອາເມຣິກາ ຫຼື ບໍ່ ນັ້ນ “ມັນກໍ່ບໍ່ແມ່ນຄວາມລັບ” ແລະ ເຕືອນວ່າ ປະທານາທິບໍດີໂດນັລ ທຣໍາ ແລະ ທີມງານບໍ່ຄວນປະເມີນສັກກະຍະພາບຂອງຈີນ ເລື່ອງການຕອບໂຕ້ໃນກໍລະນີນີ້ “ຕ່ໍາເກີນໄປ”.

ຢ່າງໃດກໍ່ຕາມ ໃນວັນດຽວກັນກະຊວງການຄ້າຂອງສະຫະລັດ ອອກລາຍງານວ່າ ຈີນໃຊ້ມາດຕະການທຸ້ມຕະຫຼາດຢ່າງບໍ່ເປັນທໍາ “ຫຼາຍເກີນໄປ” ຕໍ່ອຸປະກອນເຄື່ອງນອນ ແລະ ຖັງເບຍສະແຕນເລດທີ່ສົ່ງອອກມາຈໍາໜ່າຍໃນອາເມຣິກາ ລັດຖະບານວໍຊິງຕັນຈຶ່ງມີຄວາມຈໍາເປັນຕ້ອງຂຶ້ນພາສີຕອບໂຕ້ການທຸ້ມຕະຫຼາດຕໍ່ຈີນ ກັບສິນຄ້າທັງສອງຊະນິດໃນອັດຕາສູງສຸດ 1,73% ຕໍ່ອຸປະກອນເຄື່ອງນອນຂອງຈີນ ແລະ ຖັງເບຍສະແຕນເລດທີ່ຜະລິດໃນຈີນ ອາດຕ້ອງຜະເຊີນກັບກໍາແພງພາສີສູງສຸດໃນອັດຕາ 79,7%.