ທຣໍາ ຍັງເຫັນຕ່າງກັບທີມງານເລື່ອງເກົາຫຼີເໜືອຍິງຈະຫຼວດ

337

ປະທານາທິບໍດີໂດນັລ ທຣໍາ ແລະ ທີມງານຍັງຄົງມີຄວາມເຫັນທີ່ແຕກຕ່າງກັນ ໃນການສະແດງ “ຈຸດຢືນຢ່າງຊັດເຈນ” ຂອງສະຫະລັດຕໍ່ການທີ່ເກົາຫຼີເໜືອຍິງຂີປະນາວຸດ 2 ຄັ້ງ ເມື່ອຕົ້ນເດືອນນີ້.

ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນອັງຄານ ທີ 28 ພຶດສະພາ ວ່າ ທ່ານນາງມໍແກນ ອໍເທກັສ ໂຄສົກຍິງຂອງກະຊວງການຕ່າງປະເທດສະຫະລັດ ກ່າວເມື່ອວັນອັງຄານ ວ່າ ໂຄງການດ້ານອາວຸດຂອງເກົາຫຼີເໜືອທັງໝົດຖືເປັນໂຄງການພັດທະນາ “ອາວຸດອານຸພາບທໍາລາຍສູງ (WMD: weapon of mass destruction) ”  ເຊິ່ງລະເມີດມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC: United Nations Security Council) ຢ່າງຊັດແຈ້ງ ແລະ ຄວາມພະຍາຍາມຂອງລັດຖະບານວໍຊິງຕັນທີ່ດໍາເນີນການມາຕະຫຼອດ ຄືການເຈລະຈາກັບອີກຝ່າຍໃຫ້ຢຸດຕິໂຄງການ WMD.

ຂະນະດຽວກັນ ທ່ານອໍເທກັສ ກ່າວວ່າ ຜູ້ຊ່ຽວຊານຂອງກະຊວງການຕ່າງປະເທດສະຫະລັດ ຍັງວິເຄາະຢ່າງລະອຽດກ່ຽວກັບອານຸພາບຂອງວັດຖຸ ທີ່ເກົາຫຼີເໜືອຍິງຕົກລົງທະເລຕາເວັນອອກ 2 ຄັ້ງ ເມື່ອໄລຍະຕົ້ນເດືອນນີ້ ເຖິງວ່າ ກະຊວງປ້ອງກັນປະເທດອາເມຣິກາຢືນຢັນວ່າ ຂີປະນາວຸດຫຼາຍລູກນັ້ນເປັນຈະຫຼວດໄລຍະໃກ້ ປະມານ 300 ກິໂລແມັດ ທັງນີ້ ຖ້ອຍຖະແຫຼງຂອງ ອໍເທກັສ ສະໜັບສະໜຸນຄໍາກ່າວຂອງທ່ານຈອນ ໂບລຕັນ ທີ່ປຶກສາດ້ານຄວາມໝັ້ນຄົງແຫ່ງຊາດປະຈໍາທໍານຽບຂາວ ເຊິ່ງຢືນຢັນວ່າ ການຍິງຂີປະນາວຸດຂອງລັດຖະບານພຽງຢາງທັງສອງຄັ້ງ ເປັນການຝ່າຝືນຂອງ ຢູເອັນເອັສຊີ ຢ່າງຊັດເຈນ ແລະ ເຕືອນເລື່ອງການທີ່ລັດຖະບານວໍຊິງຕັນ ເພິ່ມມາດຕະການຂວໍ້າບາດຕໍ່ເກົາຫຼີເໜືອອິກໃນອະນາຄົດ ສົ່ງຜົນໃຫ້ລັດຖະບານພຽງຢາງ ອອກມາຕອບໂຕ້ເຖິງ ທ່ານໂບລຕັນ ໂດຍກົງ ດ້ວຍການຖະແຫຼງການທີ່ໃຊ້ຖ້ອຍຄໍາທີ່ດຸເດືອດ. 

ຢ່າງໃດກໍ່ຕາມ ການສະແດງຈຸດຢືນ ແລະ ທັດສະນະຂອງທີມງານ ທຣໍາ ຕໍ່ສະຖານະການດດັ່ງກ່າວເທິງເຂດສະໝຸດເກົາຫຼີເປັນໄປຄົນລະທິດທາງກັບຜູ້ນໍາອາເມຣິກາ ໂດຍປະທານາທິບໍດີໂດນັລ ທຣໍາ ຍັງຢືນຢັນວ່າ “ຕົນບໍ່ມີບັນຫາ” ກັບການຍິງຂີປະນາວຸດຂອງລັດຖະບານພຽງຢາງ ທີ່ເກີດຂຶ້ນ 2 ຄັ້ງ ແລະ ຫ່າງກັນພາຍໃນໄລຍະເວລາບໍ່ເທົ່າໃດມື້ ເມື່ອໄລຍະຕົ້ນເດືອນນີ້ ແລະ ບໍ່ຄິດວ່າຈະເປັນການລະເມີດມະຕິໃດໜຶ່ງຂອງຢູເອັນເອັສຊີ ແຕ່ເປັນພຽງ “ການຮ້ອງຮ້ອງຄວາມສົນໃຈ” ເທົ່ານັ້ນ ແລະ ຕົນຍັງເຊື່ອໝັ້ນໃນຕົວຂອງທ່ານຄິມ ຈອງ-ອຶນ ຜູ້ນໍາສູງສຸດຂອງເກົາຫຼີເໜືອ.