ພົບໝີແພນດ້າຂາວເຜືອກ ສັດປ່າຫາຍາກ ໃນປ່າເມືອງຈີນ

308

ກ້ອງວົງຈອນປິດຈັບພາບໄວ້ໄດ້ ໝີແພນດ້າເຜືອກຂາວໝົດໂຕສັດປ່າຫາຍາກ ໃນເຂດປ່າສະຫງວນ ທາງພາກຕາເວັນຕົກສຽງໃຕ້ຂອງປະເທດຈີນ ສະແດງໃຫ້ເຫັນວ່າຍັງມີພາວະຜິວເຜືອກເກີດຂຶ້ນກັບແພນດ້າທີ່ອາໄສຢູ່ໃນປ່າ.

ສໍານັກຂ່າວເອເອັຟພີລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນອາທິດ ທີ 26 ພຶດສະພາ ວ່າ ສໍານັກຂ່າວຊິນຫົວຂອງຈີນລາຍງານ ເມື່ອວັນເສົາ ທີ 25 ພຶດສະພາ ທີ່ຜ່ານມາ ວ່າ ພົບໝີແພນດ້າເຜືອກຂາວທົ່ວໂຕບໍ່ມີຮອຍສີດໍາ ໂດຍກ້ອງຈັບພາບໄວ້ໄດ້ຂະນະມັນກໍາລັງຍ່າງຢູ່ໃນເຂດປ່າສະຫງວນ ເມື່ອໄລຍະກາງເດືອນເມສາ ທີ່ຜ່ານມາ ໃນມົນທົນເສສວນ ທາງພາກຕາເວັນຕົກສຽງໃຕ້ຂອງຈີນ ເຊິ່ງເລື່ອງນີ້ ທ່ານຫຼີ່ ເຈິ້ງ ນັກວິໄຈຊ່ຽວຊານເລື່ອງໝີຂອງມະຫາວິທະຍາໄລປັກກິ່ງ ບອກວ່າ ໝີແພນດ້າໂຕນີ້ ມີພາວະຜິວສີເຜືອກ ອາຍຸລະຫວ່າງ 1-2 ປີ ສ່ວນເຂດປ່າສະຫງວນແຫ່ງຊາດວົ່ວຫຼົງ ເຊິ່ງເປັນຈຸດທີ່ພົບໝີແພນດ້ານັ້ນ ຍັງບໍ່ສາມາດໃຫ້ລາຍລະອຽດເພິ່ມຕື່ມກ່ຽວກັບແພນດ້າເຜືອກໄດ້.

ທັງນີ້ ກວ່າ 80% ຂອງໝີແພນດ້າທີ່ອາໄສຢູ່ໃນປ່າ ອາໄສຢູ່ໃນມົນທົນເສສວນ ສ່ວນທີ່ເຫຼືອຢູ່ໃນມົນທົນສ່ານຊີ ແລະ ການຊູ.

ສໍານັກຂ່າວຊິນຫົວລາຍງານອີກວ່າໝີແພນດ້າທີ່ຢູ່ໃນສວນສັດລວມກັນທົ່ວໂລກເມື່ອນັບເຖິງເດືອນພະຈິກ ປີຜ່ານມາ ພົບວ່າມີ 548 ໂຕ ແຕ່ກອງທຶນສັດປ່າໂລກລາຍງານວ່າໝີແພນດ້າທີ່ອາໄສຢູ່ໃນປ່າຫຼຸດລົງເຫຼືອ ບໍ່ຮອດ 2 ພັນໂຕແລ້ວ.

Picture: AFP