ຫົວເຫວີ່ຍ ທົບທວນຄວາມສໍາພັນທາງທຸລະກິດກັບ ເຟດເອັກຊ໌

289

ບໍລິສັດຫົວເຫວີ່ຍຂອງຈີນ ປະກາດທົບທວນຄວາມຮ່ວມມືກັບບໍລິສັດເຟດເອັກຊ໌ຂອງສະຫະລັດ ຫຼັງໄດ້ຮັບລາຍງານ ການປ່ຽນເສັ້ນທາງຂົນສົ່ງວັດສະດຸຂອງຫົວເຫວີ່ຍ.

ສໍານັກຂ່າວຕ່າງປະເທດລາຍງານຈາກເມືອງເຊິນເຈີ້ນ ປະເທດຈີນ ເມື່ອວັນອັງຄານ ທີ 28 ພຶດສະພາ ວ່າ ທ່ານໂຈ ເຄລລີ່ ໂຄສົກຂອງບໍລິສັດຫົວເຫວີ່ຍປະຈໍາພາກພື້ນອາເມຣິກາ ກ່າວເມື່ອວັນຈັນ ທີ່ຄະນະຜູ້ບໍລິຫານຂອງຫົວເຫວີ່ຍມີມະຕິ “ທົບທວນ” ຄວາມຮ່ວມມືທາງທຸລະກິດ ແລະ ຄວາມສໍາພັນກັບບໍລິສັດເຟດເອັກຊ໌ ຜູ້ໃຫ້ບໍລິການຂົນສົ່ງ ແລະ ຈັດສົ່ງສິນຄ້າດ່ວນລະຫວ່າງປະເທດລາຍໃຫຍ່ຂອງສະຫະລັດ ເນື່ອງຈາກໄດ້ຮັບລາຍງານວ່າເຟດເອັກຊ໌ ໄດ້ “ປ່ຽນເສັ້ນທາງການຈັດສົ່ງ” ວັດສະດຸ 2 ຫໍ່ ເຊິ່ງລະບຸໜ້າຊອງແມ່ນສົ່ງໄປເຖິງສໍານັກງານຂອງຫົວເຫວີ່ຍໃນອາຊີ ໜຶ່ງໃນນັ້ນ ຄືສໍານັກງານໃນຫວຽດນາມທີ່ຈະສົ່ງວັດສະດຸໄປສະຖານທີ່ແຫ່ງໜຶ່ງໃນອາເມຣິກາ ແລະ ຍັງພະຍາຍາມປ່ຽນເສັ້ນທາງສົ່ງວັດສະດຸທີ່ລະບຸໜ້າຫໍ່ໃຫ້ສົ່ງໄປອາຊີ ອີກ 2 ຫໍ່.

ທັງນີ້ ໂຄສົກຂອງຫົວເຫວີ່ຍປະຈໍາສະຫະລັດ ຢືນຢັນວ່າ ສິ່ງທີ່ຢູ່ພາຍໃນ ວັດສະດຸທັງ 4 ຫໍ່ ບໍ່ແມ່ນ “ຄວາມລັບທາງເທັກໂນໂລຢີ” ແຕ່ເປັນພຽງ “ເອກະສານທົ່ວໄປ” ຂະນະທີ່ສໍານັກງານໃຫຍ່ຂອງເຟດເອັກຊ໌ ທີ່ເມືອງເມມຟິສ ໃນລັດເທນເນສຊີ ສະແດງທ່າທີພຽງວ່າ ບໍລິສັດມີນະໂຍບາຍທີ່ເຄັ່ງຄັດໃນການບໍ່ເປີດເຜີຍຂໍ້ມູນຂອງລູກຄ້າ ແລະ ຢືນຢັນວ່າ ບໍລິສັດບໍ່ມີອໍານາດໃນການທ່ວງເວລາການສົ່ງສິນຄ້າ ຫຼື ປ່ຽນເສັ້ນທາງການສົ່ງສິນຄ້າໄປເຖິງປາຍທາງ ພ້ອມທັງກ່າວດ້ວຍວ່າ ເຫດການທີ່ເກີດຂຶ້ນເປັນພຽງ “ເລື່ອງເລັກນ້ອຍ” ໝາຍເຖິງຈໍານວນວັດສະດຸ “ທີ່ມີພຽງ 4 ຫໍ່”.

ສະຖານະການດັ່ງກ່າວ ເກີດຂຶ້ນເກືອບ 2 ອາທິດ ຫຼັງກະຊວງການຄ້າໃນນະຄອນຫຼວງວໍຊິງຕັນ ຂຶ້ນບັນຊີດໍາຫົວເຫວີ່ຍ ເມື່ອວັນທີ 17 ພຶດສະພາ ທີ່ຜ່ານມາ ຕາມຄໍາສັ່ງ “ສະຖານະການສຸກເສີນດ້ານເທັກໂນໂລຢີ” ຂອງປະທານາທິບໍດີໂດນັລ ທຣໍາ ແຕ່ຍັງໃຫ້ໄລຍະເວລາຜ່ອນຜັນ 90 ວັນ ໃຫ້ແກ່ທັງຫົວເຫວີ່ຍ ແລະ ບໍລິສັດຄູ່ຄ້າໃນສະຫະລັດ ໃນການຈັດການທຸລະກໍາ ແລະ ຂໍ້ຕົກລົງທີ່ຍັງຄ້າງຄາໃຫ້ສໍາເລັດ ຢ່າງໃດກໍ່ຕາມ ມີການວິເຄາະວ່າ ລັດຖະບານວໍຊິງຕັນອາດຂະຫຍາຍໄລຍະເວລາຜ່ອນຜັນໃນອະນາຄົດ.