ເນປານ ສັ່ງແບນ ແອັບພຣິເຄຊັ່ນ ‘ດິຈິຕອລ ວອລເລດ’ ຂອງຈີນ

275

ເນປານ ປະກາດຫ້າມໃຊ້ແອັບພຣິເຄຊັ່ນດິຈິຕອລ ວອລເລດ ຍອດນິຍົມຂອງຈີນ “Alipay” ກັບ “We Chat” ເພື່ອປ້ອງກັນບໍ່ໃຫ້ລາຍໄດ້ຈາກເງິນຕາຕ່າງປະເທດໄຫຼອອກນອກປະເທດຈາກນັກທ່ອງທ່ຽວຈີນ.

ສໍານັກຂ່າວເອເອັຟພີລາຍງານຈາກນະຄອນຫຼວງຄັດມານດຸ ປະເທດເນປານ ເມື່ອວັນອັງຄານ ທີ 21 ພຶດສະພາ ວ່າ ຈາກການມີນັກທ່ອງທ່ຽວຈາກຈີນຈໍານວນກວ່າ 150.000 ຄົນ ເດີນທາງມາທ່ອງທ່ຽວໃນປະເທດເນປານ ເມື່ອປີຜ່ານມາ ສ່ວນໃຫຍ່ຈະໃຊ້ຈ່າຍຜ່ານທາງແອັບພຣິເຄຊັ່ນ ດິຈິຕອລ ວອລເລດ ຍອດນິຍົມຂອງຈີນ ໄດ້ແກ່ Alipay ກັບ We Chat ໃນການໃຊ້ຈ່າຍຄ່າທີ່ພັກໃນໂຮງແຮມ, ຮ້ານອາຫານ ແລະ ຮ້ານຄ້າຕາມແຫຼ່ງທ່ອງທ່ຽວ ໂດຍສະເພາະຢ່າງຍິ່ງ ຫົວໜ່ວຍທຸລະກິດທີ່ມີຄົນຈີນເປັນເຈົ້າຂອງ.

ໂດຍໂຄສົກທະນາຄານກາງຂອງເນປານ ຖະແຫຼງວ່າ ທາງການເນປານ ໄດ້ສັ່ງຫ້າມໃຊ້ແອັບພຣິເຄຊັ່ນ ດິຈິຕອລ ວອລເລດດັ່ງກ່າວຂອງຈີນ ເລິ່ມຕັ້ງແຕ່ວັນຈັນ ທີ 20 ພຶດສະພາ ເປັນຕົ້ນມາ. ທັງນີ້, ຍ້ອນວ່າເນປານສູນເສຍລາຍໄດ້ຈາກເງິນຕາຕ່າງປະເທດທີ່ນັກທ່ອງທ່ຽວຈີນເຂົ້າມາໃຊ້ຈ່າຍດັ່ງກ່າວ ແລະ ຈະມີການໃຊ້ມາດຕະການປ້ອງກັນ ຖ້າຍັງພົບວ່າມີການລະເມີດໃຊ້ແອັບພິເຄຊັ່ນຢູ່ ແຕ່ຍັງບໍ່ມີການເປີດເຜີຍມູນຄ່າທີ່ມີການໃຊ້ຈ່າຍຜ່ານແອັບພຣິເຄຊັ່ນ.

Alipay ເລິ່ມຕົ້ນຈາກກຸ່ມທຸລະກິດລາຍໃຫຍ່ອາລີບາບາຂອງຈີນ ໂດຍເຈົ້າຂອງແອັບພຣິເຄຊັ່ນ ຄື ແອນໄຟແນນຊຽວ ສ່ວນ WeChat Pay ກໍ່ຕັ້ງໂດຍບໍລິການສື່ສານເທນເຊນ ທັງສອງແອັບນີ້ ມີຜູ້ໃຊ້ຫຼາຍຮ້ອຍລ້ານຄົນ ແລະ ຍັງເປັນແພລັດຟອມໃຊ້ຈ່າຍຍອດນິຍົມຂອງຈີນ.

ສ່ວນເຈົ້າຂອງທຸລະກິດຮ້ານຄ້າໃນປະເທດເນປານ ເຊັ່ນ: ຊູຊິ ຄອຍຣາລາ ເຊິ່ງເປີດຮ້ານຊາ ໃນເຂດທາເມລແຫຼ່ງທ່ອງທ່ຽວຍອດນິຍົມຂອງນະຄອນຫຼວງຄັດມານດຸ ຕັ້ງຂໍ້ສັງເກດວ່າ ນັກທ່ອງທ່ຽວຂອງຈີນ ມັກຈະສອບຖາມເລື່ອງວິທີການຊໍາລະເງິນ ເຊິ່ງຖ້າເປັນດິຈິຕອລ ວອລເລດ ກໍ່ຈະອໍານວຍຄວາມສະດວກສໍາລັບນັກທ່ອງທ່ຽວຊາວຈີນ ແຕ່ເມື່ອທາງການສັ່ງຫ້າມໃຊ້ແອັບພຣິເຄຊັ່ນ ດິຈິຕອລ ວອລເລດ ຄາດວ່າ ຈະມີຜູ້ປະກອບການທຸລະກິດຮ້ານຄ້າຕ່າງໆຕ້ອງຍົກເລີກກິດຈະການໄປຍ້ອນມາດຕະການນີ້ ຂະນະດຽວກັນ ຕາມຖະໜົນໃນເຂດທາເມລ ແມ່ນຂຶ້ນຊື່ວ່າເປັນໄຊນາ ທາວ ເພາະມີຊາວຈີນເຂົ້າມາເປີດທຸລະກິດຮ້ານອາຫານ ແລະ ໂຮງແຮມຫຼາຍ.

ທັງນີ້ ການທ່ອງທ່ຽວຖືເປັນລາຍໄດ້ຫຼັກຂອງເນປານ ປະເທດທີ່ມີທີ່ຕັ້ງຂອງພູສູງ 8 ໜ່ວຍ ຈາກທັງໝົດ 18 ໜ່ວຍ ທົ່ວໂລກ ເຊິ່ງມີລະດັບຄວາມສູງກວ່າ 8 ພັນແມັດ.