ຫຼັງໄອເຕັກປັບປຸງແລ້ວ! ງານວາງສະແດງ ຜະລິດຕະພັນລາວ ຈະກັບມາຈັດໃນເດືອນກໍລະກົດ

288

ຈາກເຫດການໄຟໄໝ້ສູນການຄ້າ ລາວ-ໄອເຕັກ (ຕືກເກົ່າ) ເມື່ອວັນທີ 10 ພຶດສະພາຜ່ານມາ ເຊິ່ງເປັນວັນດຽວກັບມື້ເປີດງານວາງສະແດງສິນຄ້າຜະລິດຕະພັນລາວ ຫຼື Made in Laos ລະຫວ່າງວັນທີ 10-19 ພຶດສະພາ ກໍ່ໄດ້ຢຸດຕິລົງທັນທີ ເນື່ອງຈາກພາຍໃນຕຶກໄດ້ຮັບຄວາມເສຍຫາຍ ແຕ່ຫຼ້າສຸດ ສະພາການຄ້າ ແລະ ອຸດສາຫະກຳແຫ່ງຊາດ ແຈ້ງການວ່າ ງານວາງສະແດງຜະລິດຕະພັນລາວຈະກັບມາຈັດອີກຄັ້ງ ໃນທ້າຍເດືອນກໍລະກົດ ທີ່ຈະມາເຖິງນີ້.

ໂດຍອີງຕາມ ສະພາບການຕົວຈິງຂອງສະຖານທີ່ຈັດງານວາງສະແດງສິນຄ້າ ສະພາການຄ້າ ແລະ ອຸດສາຫະກຳແຫ່ງຊາດລາວ ຂໍອະໄພເປັນຢ່າງສູງຕໍ່ກັບເຫດການໄຟໄໝ້ ໃນວັນທີ 10 ພຶດສະພາ 2019 ທີ່ສູນການຄ້າລາວ – ໄອເຕັກ (ຕືກເກົ່າ) ເຊິ່ງເປັນຜົນກະທົບທັງສະຖານທີ່ ແລະ ບັນດາຜູ້ເຂົ້າຮ່ວມວາງສະແດງ. ດັ່ງນັ້ນ, ສູນການຄ້າລາວ-ໄອເຕັກ ຈະໄດ້ປີດເພື່ອປັບປຸງສ້ອມແປງໃຫ້ກັບມາໃຊ້ໄດ້ຄືເກົ່າ.

ສະພາການຄ້າ ແລະ ອຸດສາຫະກຳແຫ່ງຊາດລາວ ອອກແຈ້ງການເລື່ອນການຈັດງານວາງສະແດງ ຜະລິດຕະພັນລາວ MADE IN LAOS 2019 ຈາກວັນທີ 10 – 19 ພຶດສະພາ 2019 ມາເປັນ ວັນທີ 20-28 / 07 / 2019 ທີ່ ສູນການຄ້າລາວ-ໄອເຕັກ (ຕືກເກົ່າ).