ນັກວິໄຈພົບຕົ້ນໄມ້ ອາຍຸກວ່າ 2 ພັນ ປີ ໃນອາເມຣິກາ ແຕ່ກັງວົນຕົ້ນໄມ້ອາດຕາຍ ຍ້ອນໂລກຮ້ອນ

246

ເມື່ອປີ 1985 ທ່ານ David Stahle ຜູ້ຊ່ຽວຊານດ້ານຕົ້ນໄມ້, ນັກທໍລະນີວິທະຍາ, ສາສະດາຈານ ແລະ ນັກວິໄຈຈາກມະຫາວິທະຍາໄລອາຣ໌ຄັນຊໍ ໄດ້ເດີນທາງເຂົ້າໄປສໍາຫຼວດພື້ນທີ່ອະນຸລັກ Black River ບຶງຂະໜາດໃຫຍ່ ໃນລັດນັອດແຄໂຣໄລນາ ປະເທດສະຫະລັດ ອາເມຣິກາ.

ໃນນັ້ນ ເຂົາໄດ້ພົບກັບຕົ້ນໄມ້ຫຼາຍຕົ້ນທີ່ທັງໃຫຍ່ ແລະ ເກົ່າແກ່ຫຼາຍ ຈົນຄິດວ່າຕົ້ນໄມ້ເຫຼົ່ານີ້ ອາດຈະມີຊີວິດຢູ່ເທິງໂລກມາເປັນເວລາຫຼາຍພັນປີແລ້ວກໍ່ເປັນໄປໄດ້.

ແຕ່ຫຼ້າສຸດນີ້ເອງ ທ່ານ David ກໍ່ໄດ້ອອກມາເປີດເຜີຍໃນວຽກງານວິໄຈຂອງຕົນວ່າ ໜຶ່ງໃນຕົ້ນໄມ້ທີ່ ພົບໃນບຶງ ນັອດແຄໂຣໄລນາ ນັ້ນ ແທ້ຈິງແລ້ວມີອາຍຸຫຼາຍເຖິງ 2.624 ປີເລີຍ.

ອ້າງອິງຈາກຂໍ້ມູນໃນວຽກງານວິໄຈ ທ່ານ David ພົບຄວາມຈິງເລື່ອງນີ້ ໃນປີ 2017 ໃນຂະນະທີ່ ໄດ້ສຶກສາເຖິງໄລຍະປີຂອງຕົ້ນໄມ້ໃນພື້ນທີ່ອະນຸລັກ ໂດຍຕົ້ນໄມ້ທີ່ຖືກພົບວ່າມີອາຍຸ 2.624 ປີນັ້ນ ເປັນຕົ້ນ Bald cypress ເຊິ່ງມີຊື່ທາງ ວິທະຍາສາດວ່າ Taxodium distichum.

ການຄົ້ນພົບໃນຄັ້ງນີ້ ເຮັດໃຫ້ຕົ້ນ Bald cypress ທີ່ຖືກພົບໃນນັອດແຄໂຣໄລນາ ຕົ້ນນີ້ ກາຍເປັນຕົ້ນໄມ້ທີ່ມີຄວາມເກົ່າແກ່ຫຼາຍທີ່ສຸດຕົ້ນໜຶ່ງຂອງໂລກ ແຖມການສຶກສາວົງປີຂອງຕົ້ນໄມ້ທີ່ເກົ່າແກ່ຂະໜາດນີ້ ຍັງອາດຈະນໍາໄປສູ່ຄວາມຮູ້ໂດຍລະອຽດຂອງສະພາບອາກາດອາກາດໃນອະດີດໄດ້ເປັນຢ່າງດີອີກດ້ວຍ.

ເທົ່ານັ້ນຍັງບໍ່ພໍ ທີມນັກວິໄຈທີ່ລົງສໍາຫຼວດພື້ນທີ່ນັ້ນ ໄດ້ເກັບເອົາຕົວຢ່າງຕົ້ນໄມ້ຈາກຕົ້ນ Bald cypress  ມາພຽງ 110 ຕົ້ນເທົ່ານັ້ນ ຂະນະທີ່ ໃນບຶງຍັງມີຕົ້ນໄມ້ທີ່ມີຄວາມເກົ່າແກ່ສູງອີກຫຼາຍກວ່າ 10 ພັນຕົ້ນ ດັ່ງນັ້ນ ຈຶ່ງມີຄວາມເປັນໄປໄດ້ວ່າ ພວກເຮົາອາດຈະພົບກັບຕົ້ນໄມ້ທີ່ມີອາຍຸເກົ່າແກ່ຍິ່ງກວ່ານີ້ ຢູ່ແຫ່ງໃດໜຶ່ງໃນພື້ນທີ່ປ່າແຫ່ງນີ້ອີກກໍ່ເປັນໄດ້.

ທ່ານ David Stahle ໃສ່ໝວກຟ້າ

ເຖິງເປັນເຊັ່ນນັ້ນກໍ່ຕາມ ການວິໄຈໃນຄັ້ງນີ້ ກໍ່ບໍ່ໄດ້ມີແຕ່ຂ່າວດີເທົ່ານັ້ນ ເພາະຈາກການກວດເບິ່ງພື້ນທີ່ແລ້ວ ທີມນັກວິໄຈກໍ່ພົບວ່າພື້ນທີ່ບຶງ Black River ໃນປັດຈຸບັນ ຢູ່ສູງກວ່າລະດັບນໍ້າທະເລພຽງ 2 ແມັດ ເທົ່ານັ້ນ.

ຈຶ່ງເຮັດໃຫ້ພື້ນທີ່ດັ່ງກ່າວມີຄວາມສ່ຽງສູງ ທີ່ຈະຖືກນໍ້າທະເລທະໄຫຼເຂົ້າມາຖ້ວມໃນອະນາຄົດ ເນື່ອງຈາກພາວະໂລກຮ້ອນ ແລະ ຄວາມປ່ຽນແປງຂອງອາກາດເຮັດໃຫ້ລະດັບນໍ້າທະເລສູງຂຶ້ນຢ່າງວ່ອງໄວ ເຊິ່ງຖ້າເປັນເຊັ່ນນັ້ນແທ້ ຕົ້ນ Bald cypress ເຫຼົ່ານີ້ ກໍ່ຈະບໍ່ສາມາດເຕີບໂຕໃນພື້ນທີ່ໄດ້ອີກຕໍ່ໄປ.

ວຽກງານວິໄຈຊຸດນີ້ ຖືກຕີພິມເປັນຄັ້ງທໍາອິດ ໃນວາລະສານ Environmental Research Communications ເມື່ອວັນທີ 9 ພຶດສະພາ 2019 ທີ່ຜ່ານມາ ສາມາດເຂົ້າໄປອ່ານໄດ້ຕາມລິງຄ໌.