ພົບໝີຄວາຍໃນເຂດປອດທະຫານເທິງຄາບສະມຸດເກົາຫຼີ

281

ພົບໝີຄວາຍຫາຍາກໃນເຂດປອດທະຫານເທິງຄາບສະມຸດເກົາຫຼີ ຖ່າຍຮູບພາບໄວ້ໄດ້ເປັນຫຼັກຖານ ຄາດເປັນໝີ ອາຍຸ 8-9 ເດືອນ ເທົ່ານັ້ນ.

ສຳນັກຂ່າວເອເອັຟພີລາຍງານຈາກນະຄອນຫຼວງໂຊ ປະເທດເກົາຫຼີໃຕ້ ເມື່ອວັນສຸກ ທີ 10 ພຶດສະພາ ວ່າ ກະຊວງສິ່ງແວດລ້ອມຂອງເກົາຫຼີໃຕ້ ຖະແຫຼງວ່າ ພື້ນທີ່ເຂດປອດທະຫານເທິງຄາບສະມຸດເກົາຫຼີ ຈຸດແບ່ງເຂດແດນ ລະຫວ່າງ ເກົາຫຼີເໜືອ ກັບ ເກົາຫຼີໃຕ້ ຕະຫຼອດເຂດຊາຍແດນ ກວ້າງ 4 ກິໂລແມັດ ນັ້ນ ມີທັງກັບດັກລະເບີດ ແລະ ປ້ອມທະຫານ ຖືເປັນເຂດແບ່ງແຍກດິນແດນສຸດທ້າຍຂອງໂລກ ໃນຍຸກສົງຄາມເຢັນ ແຕ່ພື້ນທີ່ເຂດປອດທະຫານແຫ່ງນີ້ ກໍ່ເປັນພື້ນທີ່ທີ່ອຸດົມໄປດ້ວຍຊັບພະຍາກອນທໍາມະຊາດທີ່ບໍ່ເຄີຍຖືກຮຸກຮານ ແລະ ຍັງເປັນແຫຼ່ງທີ່ຢູ່ອາໄສຂອງສັດປ່າ ເຊິ່ງເຊື່ອວ່າ ມີທັງສາຍພັນຂອງສັດປ່າ ແລະ ພືດ ປະມານ 5.000 ສາຍພັນ ເຊັ່ນ: ກວາງຜາ ແລະ ແມວນໍ້າຂົນ ເປັນຕົ້ນ.

ກະຊວງສິ່ງແວດລ້ອມຂອງເກົາຫຼີໃຕ້ ຖະແຫຼງວ່າ ກ້ອງຂອງທີມງານວິໄຈ ສາມາດຖ່າຍຮູບພາບໝີຄວາຍໂຕໜຶ່ງ ເຊິ່ງເປັນສັດປ່າຫາຍາກເມື່ອເດືອນຕຸລາ ປີຜ່ານມາ ນອກຈາກທະຫານເກົາຫຼີໃຕ້ບາງຄົນຍັງເຄີຍໃຫ້ການວ່າ ເຄີຍເຫັນໝີຄວາຍຢູ່ໃນເຂດປອດທະຫານເຊັ່ນກັນ ແລະ ເປັນຄັ້ງທໍາອິດທີ່ມີການນໍາພາບໝີຄວາຍອອກມາເຜີຍແຜ່ວ່າພົບເຫັນໝີຄວາຍໃນເຂດປອດທະຫານ ໂດຍເຊື່ອວ່າ ເປັນໝີຄວາຍອາຍຸຍັງນ້ອຍ ປະມານ 8-9 ເດືອນ ນໍ້າໜັກປະມານ 25-30 ກິໂລກຣາມ. ສະຖາບັນນິເວດວິທະຍາແຫ່ງຊາດຂອງເກົາຫຼີໃຕ້ ລະບຸວ່າ ມັນອາດຈະຢູ່ກັບໝີໂຕພໍ່ ແລະ ແມ່ ລວມເຖິງສາຍພັນໝີຄວາຍນັ້ນ ເຊິ່ງພາສາລາຕິນ ເອີ້ນວ່າ Ursus thibetanus ເປັນສັດປ່າຫາຍາກ.