ອິນໂດເນເຊຍ ພິຈາລະນາຍ້າຍເມືອງຫຼວງອອກຈາກນະຄອນຫຼວງຈາກາຕ້າ

258

ອິນໂດເນເຊຍ ກໍາລັງພິຈາລະນາທີ່ຈະຍ້າຍເມືອງຫຼວງອອກຈາກນະຄອນຫຼວງຈາກາຕ້າ ທີ່ມີຄວາມໜາແໜ້ນຂອງປະຊາກອນ ແລະ ການຈະລາຈອນຕິດຂັດ ແຕ່ອາດຈະຕ້ອງໃຊ້ເວລາອີກຫຼາຍປີ.

ສໍານັກຂ່າວເອເອັຟພີລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນຈັນ ທີ 29 ເມສາ ວ່າ ຄວາມຄິດທີ່ຈະຍ້າຍເມືອງຫຼວງສະຖານທີ່ຕັ້ງໜ່ວຍງານລັດ ອອກຈາກນະຄອນຫຼວງຈາກາຕ້າ ເຊິ່ງມີຄວາມໜາແໜ້ນຂອງປະຊາກອນຫຼາຍເກືອບ 30 ລ້ານຄົນ ແລະ ບັນຫາການຈະລາຈອນຕິດຂັດ ຈົນຕິດອັນດັບໂລກມາດົນຫຼາຍສິບປີແລ້ວ ປະກອບກັບນະຄອນຫຼວງຈາກາຕ້າເປັນພື້ນທີ່ຮາບລຸ່ມມັກເກີດບັນຫານໍ້າຖ້ວມທຸກປີ ແລະ ຍັງຕິດອັນດັບໜຶ່ງໃນເມືອງຂອງໂລກ ທີ່ຈົມນໍ້າໄວທີ່ສຸດ ເພາະການດູດນໍ້າບາດານມາໃຊ້ໃນປະລິມານຫຼາຍຈົນເກີດບັນຫາດິນຍຸບ ແລະ ເຈື່ອນ.

ເມື່ອວັນຈັນ ທີ່ຜ່ານມາ ທ່ານບຳບັງ ບຣອດໂຈນໂກໂລ ລັດຖະມົນຕີຜັງເມືອງຂອງອິນໂດເນເຊຍ ກ່າວວ່າ ແຜນການຍ້າຍເມືອງຫຼວງທີ່ຕິດຂັດມາດົນແລ້ວນັ້ນ ໄດ້ຮັບຄວາມເຫັນดีຈາກປະທານາທິບໍດີໂຈໂຄ ວິໂດໂດ ແຫ່ງອິນໂດເນເຊຍແລ້ວ ເຊິ່ງເຫັນດີກັບການຍ້າຍເມືອງຫຼວງອອກຈາກຈາກາຕ້າ ເທິງເກາະຊະວາ ທີ່ມີປະຊາກອນອາໄສຢູ່ໜາແໜ້ນ.

ຈາກາຕ້າໄດ້ຮັບຜົນກະທົບທາງເສດຖະກິດຈົນເສຍຫາຍ ຄິດເປັນມູນຄ່າຫຼາຍພັນລ້ານໂດລາໃນແຕ່ລະປີ ຍ້ອນການຈະລາຈອນ ແລະ ນໍ້າຖ້ວມ ແຕ່ຈາກາຕ້າກໍ່ຍັງເປັນສູນກາງສໍາຄັນດ້ານເສດຖະກິດຂອງປະເທດ.

ໃນຖະແຫຼງການກ່ອນເຂົ້າຮ່ວມປະຊຸມຄະນະລັດຖະມົນຕີ ປະທານາທິບໍດີວິໂດໂດ ກ່າວສະໜັບສະໜຸນແນວຄິດການຍ້າຍເມືອງຫຼວງ ແຕ່ຍັງບໍ່ໄດ້ກຳນົດສະຖານທີ່ ແລະ ຂອບເຂດເວລາ ວ່າຈະຍ້າຍເມື່ອໃດ ບອກພຽງແຕ່ວ່າ ໃນອະນາຄົດຂ້າງໜ້າຈາກາຕ້າ ຈະສາມາດດັນພາລະທັງດ້ານສູນກາງລັດຖະບານ ແລະ ເສດຖະກິດອອກໄປຈາກຕົວ ເຊິ່ງຖ້າພວກເຮົາກຽມຕົວດີ ມາຕັ້ງແຕ່ຕົ້ນແລ້ວ ແນວຄິດການຍ້າຍເມືອງຫຼວງກໍ່ຈະເປັນຈິງໃນທີ່ສຸດ.

ລະຫວ່າງການຫາສຽງປະທານາທິບໍດີວິໂດໂດ ກ່າວໃຫ້ຄຳໝັ້ນວ່າ ຈະຂະຫຍາຍການເຕີບໂຕທາງເສດຖະກິດໃຫ້ກັບອິໂດເນເຊຍ ເຊິ່ງມີປະຊາກອນ 260 ລ້ານຄົນ ແລະ ທ່ານຫາກໍ່ໄດ້ຮັບການເລືອກຕັ້ງເມື່ອກາງເດືອນເມສາ ຜ່ານມາ ແຕ່ເປັນການນັບຄະແນນຢ່າງບໍ່ເປັນທາງການ.

ສື່ທ້ອງຖິ່ນຂອງອິນໂດເນເຊຍລາຍງານດ້ວຍວ່າເມືອງຫຼວງໃໝ່ອາດຈະເປັນເມືອງປາລັງກາຢາ ເທິງເກາະບໍນຽວ.