ສະຖິຕິຜູ້ປ່ວຍເປັນໄຂ້ໝາກແດງ ໃນອາເມຣິກາ ສູງທີ່ສຸດໃນຮອບ 25 ປີ

300

ຈໍານວນຜູ້ປ່ວຍຈາກໄຂ້ໝາກແດງ ໃນສະຫະລັດ ຕັ້ງແຕ່ຕົ້ນປີນີ້ ເພິ່ມຂຶ້ນຫຼາຍກວ່າ 700 ຄົນແລ້ວ ຖືເປັນສະຖິຕິສູງທີ່ສຸດ ນັບຕັ້ງແຕ່ປີ 1994 ຫຼື 6 ປີ ຕໍ່ມາທີ່ກະຊວງສາທາລະນະສຸກສະຫະລັດ ປະກາດວ່າ ໄຂ້ໝາກແດງໝົດໄປຈາກປະເທດແລ້ວ.

ສໍານັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນຈັນ ທີ 29 ເມສາ ວ່າ ສູນປ້ອງກັນ ແລະ ຄວບຄຸມໂຣກຂອງສະຫະລັດ (CDC: Centers for Disease Control and Prevention) ອອກຖະແຫຼງການເມື່ອວັນຈັນ ວ່າ ຈໍານວນຜູ້ຕິດເຊື້ອໄຂ້ໝາກແດງໃນປະເທດຢ່າງເປັນທາງການ ເຊິ່ງເປັນສະຖິຕິສະສົມນັບຕັ້ງແຕ່ຕົ້ນປີນີ້ ຈົນເຖິງວັນຈັນ ທີ 29 ເມສາ ທີ່ຜ່ານມາ ແມ່ນ 704 ຄົນ ພົບໃນ 22 ລັດ ເພິ່ມຂຶ້ນ 1,3% ຈາກສະຖິຕິ 695 ຄົນ ເມື່ອອາທິດ ທີ່ຜ່ານມາ ນັບເປັນສະຖິຕິສູງທີ່ສຸດ ທັ້ງທີ່ກະຊວງສາທາລະນະສຸກເຄີຍປະກາດໃຫ້ໄຂ້ໝາກແດງໝົດໄປຈາກປະເທດ ເມື່ອປີ 2000 ເຊິ່ງກ່ອນໜ້ານັ້ນ ເມື່ອປີ 1994 ສະຫະລັດພົບຜູ້ປ່ວຍຈາກໄຂ້ໝາກແດງໃນປະເທດ ສູງເຖິງ 963 ຄົນ.

ສໍາລັບພື້ນທີ່ ທີ່ມີການແຜ່ລະບາດສູງທີ່ສຸດຄືລັດນິວເຈີຊີ ແລະ ລັດນິວຢອກ ເຊິ່ງເປັນສະຖານທີ່ຕັ້ງຂອງນະຄອນນິວຢອກ ເມືອງທີ່ມີປະຊາກອນອາໄສຢູ່ຫຼາຍທີ່ສຸດໃນສະຫະລັດ ໂດຍເຂດທີ່ລະບາດໜັກທີ່ສຸດຄືເຂດບຣຸຄລິນ ຂະນະທີ່ ທ່ານບິລ ເດິ ບລາຊິໂອ ນາຍົກເທສະມົນຕີນະຄອນນິວຢອກ ປະກາດພາວະສຸກເສີນດ້ານສາທາລະນະສຸກແບບເຈາະຈົງຄອບຄຸມທັງເຂດບຣຸຄລິນ ເມື່ອຕົ້ນເດືອນເມສາ ແລະ ລົງນາມໃນຄໍາສັ່ງໃຊ້ກົດໝາຍຄຸ້ມຄອງທ້ອງຖິ່ນໃຫ້ປະຊາຊົນທຸກຄົນ ເຊິ່ງອາໄສຢູ່ໃນເຂດບຣຸຄລິນ ຕ້ອງເຂົ້າຮັບການສັກຢາຕ້ານເຊື້ອ ຖ້າຜູ້ໃດຝ່າຝືນບໍ່ເຂົ້າຮັບການສັກຢາ ຫຼື ບໍ່ສາມາດສະແດງຫຼັກຖານວ່າ ໄດ້ຮັບການສັກຢາແລ້ວ ເມື່ອເຈົ້າໜ້າທີ່ ຂໍກວດຫຼັກຖານອາດຈະຕ້ອງຈ່າຍຄ່າປັບສູງເຖິງ 1.000 ໂດລາ (ປະມານ 8.600.000 ກີບ).

ເຖິງວ່າຍັງບໍ່ມີການພົບຜູ້ເສຍຊີວິດຈາກວິກິດການແຜ່ລະບາດຂອງໄຂ້ໝາກແດງໃນສະຫະລັດ ຄັ້ງນີ້ ແຕ່ຫຼາຍຝ່າຍຍັງມີຄວາມກັງວົນກ່ຽວກັບ “ລັດທິຕໍ່ຕ້ານການສັກຢາປ້ອງກັນ” ເນື່ອງຈາກ ເຖິງວ່າສະຖິຕິເດັກນ້ອຍໄວກ່ອນເຂົ້າອະນຸບານໃນສະຫະລັດ ເຂົ້າຮັບການສັກຢາປ້ອງກັນໄຂ້ໝາກແດງ, ໝາກເບີດ ແລະ ໄຂ້ໝາກແດງເຢຍລະມັນ ສູງເຖິງ 94% ເມື່ອປີ 2017 ແຕ່ຫຼັງຈາກນັ້ນ ພັດຫຼຸດລົງ ເຊິ່ງປະທານາທິບໍດີໂດນັລ ທຣຳ ກ່າວເມື່ອທ້າຍອາທິດ ທີ່ຜ່ານມາ ຮຽກຮ້ອງໃຫ້ປະຊາຊົນທຸກຄົນບໍ່ວ່າຜູ້ໃຫຍ່ ຫຼື ເດັກນ້ອຍ ຄວນເຂົ້າຮັບການສັກຢາປ້ອງກັນໄຂ້ໝາກແດງໃຫ້ຄົບຕາມຄໍາແນະນໍາຂອງແພດ.