ພົບປາວານເບລູກາ ຖືກສາຍຮັດແໜ້ນຢູ່ຄໍ

217

ພົບປາວານເບລູກາ 1 ໂຕຖືກສາຍຮັດແໜ້ນບໍລິເວນຄໍ ອາດຈະເປັນຂອງຣັສເຊຍ ເຮັດໃຫ້ເຈົ້າໜ້າທີ່ປະເທດນໍເວ ຕ້ອງເຝົ້າລະວັງ ແລະ ເຕືອນວ່າ ມັນອາດຈະໜີອອກຈາກຄ້າຍທະຫານຂອງຣັສເຊຍກໍ່ເປັນໄດ້.

ສໍານັກຂ່າວເອພີລາຍງານຈາກນະຄອນຫຼວງໂຄເປນຮາເກນ ປະເທດເດັນໝາກ ເມື່ອວັນຈັນ ທີ 29 ເມສາ ວ່າ ເຈີເກັ້ນ ຣີ ວິອິກ ແຫ່ງກົມປະມົງຂອງນໍເວ ໄດ້ເປີດເຜີຍວ່າ ເມື່ອອາທິດທີ່ຜ່ານມາ ຊາວປະມົງຂອງນໍເວ ໄດ້ໄປພົບກັບປາວານເບລູກາ 1 ໂຕ ໃນເຂດໜ້ານໍ້າຂອງນໍເວ ເຂດຂົ້ວໂລກເໜືອ ໃນສະພາບທີ່ມັນຖືກສາຍຮັດຄໍແໜ້ນ ເຊິ່ງມີຂໍ້ຄວາມຂຽນວ່າ ອຸປະກອນເຊັນປີເຕີສເບີກ ດັ່ງນັ້ນ ຊາວປະມົງຈຶ່ງໄດ້ຕັດສິນໃຈໂດດລົງໄປໃນນໍ້າ ເພື່ອຊ່ວຍປົດສາຍຮັດຄໍດັ່ງກ່າວອອກ ຈາກຄໍຂອງປາວານ ເຊິ່ງເຈົ້າໜ້າທີ່ກົມປະມົງນໍເວກໍ່ຊ່ວຍເຫຼືອດ້ວຍ ແລະ ຄົນທີ່ຢູ່ໃນກອງທັບນໍເວກໍ່ໃຫ້ຄວາມສົນໃຈໃນເລື່ອງນີ້ດ້ວຍ.

ສ່ວນສາສະດາຈານອູດຸນ ຣິຄາຣ໌ດເຊັນ ແຫ່ງຄະນະຊີວະວິທະຍາທາງທະເລ ແລະ ຂົ້ວໂລກເໜືອ ຂອງມະຫາວິທະຍາໄລແຫ່ງນໍເວ ເມືອງທອມໂຊ ທາງພາກເໜືອຂອງນໍເວ ກ່າວວ່າ ຕົນເຊື່ອວ່າສາຍຮັດດັ່ງກ່າວເປັນຂອງກອງທັບເຮືອຣັສເຊຍ ໃນເມືອງເມີມານສຄ໌ ເຊິ່ງຣັສເຊຍມີຄ້າຍທະຫານຕັ້ງຢູ່ທັງໃນ ແລະ ໂດຍຮອບເມືອງເມີມານສຄ໌ ເທິງຄາບສະໝຸດໂຄລາ ທາງພາກຕາເວັນຕົກສຽງເໜືອຂອງຣັສເຊຍ ຢ່າງໃດກໍ່ຕາມ ຂະນະນີ້ ຍັງບໍ່ເປັນທີ່ຊັດເຈນວ່າ ປາວານເບລູກາຕົວນີ້ ໄດ້ຮັບການຝຶກ ຫຼື ເປັນສ່ວນໜຶ່ງຂອງການປະຕິບັດການຂອງກອງທັບຣັສເຊຍ ໃນພາກພື້ນນີ້ ຫຼື ບໍ່ ເຊິ່ງຈາກການສອບຖາມໄປທີ່ນັກວິຊາການຂອງຣັສເຊຍ ແລະ ນໍເວ ກໍ່ບໍ່ພົບວ່າມີໂຄງການຝຶກ ຫຼື ທົດລອງ ໂດຍໃຊ້ປາວານເບລູກາ ແຕ່ຢ່າງໃດ.

ທັງນີ້ ຣັສເຊຍ ບໍ່ເຄີຍມີປະຫວັດວ່າໃຊ້ປາວານ ໃນການທົດລອງ ເພື່ອປະໂຫຍດດ້ານການທະຫານ ແຕ່ສໍາລັບສະຫະພາບໂຊວຽດໃນອະດີດນັ້ນ ເຄີຍໃຊ້ປາໂຣມາເຂົ້າຮັບການຝຶກເພື່ອທົດລອງ.