ພາສີສະໜາມບິນວັດໄຕ ຢຶດຢາໄອສ໌ ໄດ້ 9 ກິໂລກຣາມ ພ້ອມມອບໃຫ້ເຈົ້າໜ້າທີ່ຕໍາຫຼວດດໍາເນີນຄະດີ

287

ໃນວັນທີ 25 ເມສາ 2019 ທີ່ດ່ານພາສີສາກົນສະໜາມບິນວັດໄຕ ນະຄອນຫຼວງວຽງຈັນ ກົມພາສີ ກະຊວງການເງິນ, ເຈົ້າໜ້າພາສີປະຈຳສະໜາມບິນສາກົນວັດໄຕ ໄດ້ຈັດພິທີມອບ – ຮັບຢາເສບຕິດປະເພດຢາໄອສ໌ ລວມນໍ້າໜັກ 9,1 ກິໂລ ກຣາມ ໃຫ້ເຈົ້າໜ້າທີ່ຕໍາຫຼວດ ( ກົມສະກັດກັ້ນ ແລະ ຕ້ານຢາເສບຕິດ ກະຊວງປ້ອງກັນຄວາມສະຫງົບ ) ເພື່ອດໍາເນີນຄະດີຕາມລະບຽບກົດໝາຍ, ພາຍຫຼັງທີ່ເຈົ້າໜ້າທີ່ພາສີປະຈຳສະໜາມບິນສາກົນວັດໄຕ ສາມາດຈັບກຸມໄດ້ໃນວັນທີ 9 ເມສາ 2019 ທີ່ຜ່ານມາ.

ຕາງໜ້າມອບຂອງ ທ່ານ ສຸກສະຫວັນ ບົວພາ ຫົວໜ້າພະແນກຕ້ານ ແລະ ສະກັດກັ້ນການລັກລອບພາສີ ກະຊວງການເງິນ, ກ່າວຮັບຂອງ ທ່ານ ພັນຕີ ສຸກວິໄລ ອັກຄະວົງ ຮອງຫົວໜ້າພະແນກບໍລິຫານ – ສັງລວມ ກົມສະກັດກັ້ນ ແລະ ຕ້ານຢາເສບຕິດ ກະຊວງປ້ອງກັນຄວາມສະຫງົບ ໂດຍການເຂົ້າຮ່ວມຂອງ ທ່ານ ວົງຄໍາແຫງ ວົງທະຈັກ ຮອງຫົວໜ້າກົມພາສີ ກະຊວງການເງິນ, ຕາງໜ້າກອງຄຸ້ມຄອງພາສີ V, ຫົວໜ້າດ່ານພາສີສາກົນສະໜາມບິນວັດໄຕ, ຮອງຫົວໜ້າ ຕມ ສະໜາມບິນສາກົນວັດໄຕ, ພະນັກງານເຈົ້າໜ້າທີ່ພາສີ, ເຈົ້າໜ້າທີ່ຕໍາຫຼວດ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ວົງຄໍາແຫງ ວົງທະຈັກ ຮອງຫົວໜ້າກົມພາສີ ກະຊວງການເງິນ ໄດ້ມີຄໍາເຫັນວ່າ: ການມອບຢາເສບຕິດ ປະເພດຢາໄອສ໌ໃຫ້ເຈົ້າໜ້າຕໍາຫຼວດ ( ປກສ ) ເພື່ອໄປດໍາເນີນຂັ້ນຕອນຕາມລະບຽບກົດໝາຍ ທັງເປັນການແຈ້ງຂ່າວສານໃຫ້ສັງຄົມຮັບຮູ້ກ່ຽວກັບຫຼັກການຂອງເຈົ້າໜ້າພາສີ ແມ່ນປະຕິບັດຕາມກົດໝາຍພາສີທີ່ສະພາແຫ່ງຊາດຮັບຮອງເອົາເປັນເຈົ້າໜ້າທີ່ພາສີເປັນອົງການສືບສວນ – ສອບສວນ, ມີໜ້າທີ່ເຄື່ອນໄຫວຕ້ານ ແລະ ສະກັດກັ້ນສິນຄ້າເຖື່ອນ, ສາມາດສືບສວນ – ສອບສວນ, ຮັກສາຂອງກາງໄວ້ເປັນຫຼັກຖານໃນການດໍາເນີນຄະດີ ສໍາລັບສິນຄ້າປະເພດຄວບຄຸມ ແລະ ເກືອດຫ້າມ ເຊັ່ນ: ອາວຸດເສິກ, ຢາເສບຕິດ, ວັດຖຸອອກລິດຕໍ່ຈິດປະສາດ, ສານເຄມີອັນຕະລາຍ ຫຼື ປະເພດເກືອດຫ້າມອື່ນໆບັນຍັດໄວ້ໃນມາດຕາ 31 ຂອງກົດໝາຍວ່າດ້ວຍພາສີ.

ພ້ອມດຽວກັນນີ້, ຍັງໄດ້ມີການຮ່ວມມືກັບສາກົນຕາມນະໂຍບາຍຂອງລັດຖະບານ, ປະຕິບັດສັນຍາ, ອະນຸສັນຍາ ແລະ ສົນທິສັນຍາທີ່ ສປປ ລາວ ເປັນພາຄີ ເພື່ອພັດທະນາວຽກງານພາສີ, ແລກປ່ຽນບົດຮຽນ, ຂໍ້ມູນ – ຂ່າວສານ ແລະ ເຕັກນິກວິຊາການພາສີອື່ນໆໃນການຄຸ້ມຄອງເຄື່ອງຂອງຜ່ານດ່ານພາສີຊາຍແດນ.

ການມອບ – ຮັບຢາເສບຕິດປະເພດຢາໄອສ໌ ແມ່ນອີງໃສ່ບົດບັນທຶກການຢຶດສິນຄ້າເຄື່ອງຂອງປະເພດເກືອດຫ້າມ ທີ່ເຈົ້າໜ້າທີ່ພາສີປະຈຳສະໜາມບິນສາກົນວັດໄຕ ສາມາດຈັບກຸມໄດ້ໃນວັດທີ 9 ເມສາ 2019 ຜ່ານມາ ປະກອບມີ: ຢາເສບຕິດປະເພດຢາໄອສ໌ ນໍ້າໜັກ 3,5 ກິໂລ ກຣາມ ລວມທັງເຄື່ອງບັນຈຸຫຸ້ມຫໍ່, ເຄື່ອງນຸ່ງຫົ່ມເສື້ອຜ້າຊົນເຜົ່າມົ້ງຍ້ອມຊຸບຢາໄອສ໌ ຈໍານວນ 8 ໂຕ ນໍ້າໜັກ 5,6 ກິໂລກຣາມ ລວມນໍ້າໜັກທັງໝົດ 9,1 ກິໂລກຣາມ. ໃນນີ້, ກົມພາສີໄດ້ເກັບຕົວຢ່າງເສື້ອຜ້າ 1 ໂຕ ແລະ ຢາໄອສ໌ 1 ຊອງ ເພື່ອໄວ້ເປັນຂໍ້ມູນຕົວຢ່າງສະແດງໃນຫ້ອງສະໝຸດຕາມລະບຽບການ.

ສະນັ້ນ, ທາງກົມພາສີ – ກົມສະກັດກັ້ນ ແລະ ຕ້ານຢາເສບຕິດ ກະຊວງປ້ອງກັນຄວາມສະຫງົບ ຈຶ່ງໄດ້ເຊັນບົດ ບົດບັນທຶກມອບ – ຮັບໄວ້ເປັນຫຼັກຖານໃນການຈັດຕັ້ງປະຕິບັດຕາມລະບຽບກົດໝາຍ.

ສ່ວນໃນກໍລະນີເປັນສິນຄ້າເຄື່ອງຂອງທົ່ວໄປ ຫາກເຈົ້າໜ້າທີ່ ຫຼື ພາກສ່ວນອື່ນຈັບກຸມໄດ້ຕ້ອງໄດ້ສົ່ງມອບໃຫ້ເຈົ້າໜ້າທີ່ພາສີດໍາເນີນການເສຍພາສີ – ອາກອນ ເພື່ອປັບໃໝໃນການຈັດເກັບລາຍຮັບເຂົ້າງົບປະມານຕາມລະບຽບກົດໝາຍພາສີ.

ແຫຼ່ງຂ່າວ: ກະຊວງການເງິນ
Laoedaily