ນໍ້າຖ້ວມໜັກ ເກາະສຸມາຕຣາ ຂອງອິນໂດເນເຊຍ

224

ມີຜູ້ເສຍຊີວິດຢ່າງໜ້ອຍ 19 ຄົນ ຈາກເຫດນໍ້າຖ້ວມ ແລະ ດິນເຈື່ອນກະທັນຫັນ ໃນພື້ນທີ່ຫຼາຍແຫ່ງ ເທິງເກາະສຸມາຕຣາຂອງອິນໂດເນເຊຍ.

ສໍານັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນຈັນ ທີ 29 ເມສາ ວ່າ ສໍານັກງານບໍລິຫານຈັດການໄພພິບັດແຫ່ງຊາດຂອງອິນໂດເນເຊຍ (BNPB) ອອກຖະແຫຼງການ ເມື່ອວັນຈັນ ກ່ຽວກັບການເກີດນໍ້າຖ້ວມກະທັນຫັນ ແລະ ດິນເຈື່ອນໃນຫຼາຍພື້ນທີ່ຫຼາຍແຫ່ງເທິງເກາະສຸມາຕຣາ ເຊິ່ງເປັນເກາະຂະໜາດໃຫຍ່ທີ່ສຸດ ແລະ ຕັ້ງຢູ່ພາກທາງຕາເວັນຕົກ ຂອງປະເທດ ໂດຍໜ່ວຍງານ ບີເອັນພີບີ ຄາດການວ່າ ເປັນຜົນມາຈາກອິທິພົນຂອງພາຍຸມໍລະສຸມລະດູ ຮ້ອນທີ່ມີຄວາມຮຸນແຮງ ໃນໄລຍະ 3 ເຖິງ 4 ວັນ ທີ່ຜ່ານມາ.

ທັງນີ້ ໄພທໍາມະຊາດດັ່ງກ່າວ ເຊິ່ງເກີດຂຶ້ນຢ່າງກະທັນຫັນ ສົ່ງຜົນໃຫ້ມີຜູ້ເສຍຊີວິດແລ້ວ 19 ຄົນ ແຕ່ຍັງມີຜູ້ສູນຫາຍອີກ 9 ຄົນ ຂະນະທີ່ ປະຊາຊົນຫຼາຍກວ່າ 12.000 ຄົນ ຕ້ອງອົບພະຍົບອອກຈາກທີ່ຢູ່ອາໄສ ໂດຍສະເພາະທີ່ແຂວງເບິງກູລູ ທີ່ໄດ້ຮັບຜົນກະທົບຈາກອຸທົກກະໄພ ຄັ້ງນີ້ ຫຼາຍທີ່ສຸດ ດ້ານສໍານັກງານອຸຕຸນິຍົມວິທະຍາແຫ່ງຊາດ ພະຍາກອນ ວ່າ ພື້ນທີ່ສ່ວນໃຫຍ່ຂອງເກາະສຸມາຕຣາຈະຜະເຊີນກັບອິດທິພົນທີ່ຮຸນແຮງຂອງພາຍຸຝົນອີກຕະຫຼອດອາທິດນີ້ ໃນອີກດ້ານໜຶ່ງ ມີລາຍງານຜູ້ເສຍຊີວະດ ຢ່າງໜ້ອຍ 2 ຄົນ ແລະ ປະຊາຊົນຫຼາຍກວ່າ 2.000 ຄົນ ຕ້ອງອົບພະຍົບ ຈາກການເກີດນໍ້າຖ້ວມກະທັນຫັນໃນນະຄອນຫຼວງຈາກາຕ້າ ເຊິ່ງຕັ້ງຢູ່ທາງພາກເໜືອຂອງເກາະຊະວາ.

Picture: AFP