ພະແນກວິທະຍາສາດ ແລະ ເຕັກໂນໂລຊີ ແຂວງຄຳມ່ວນລົງເຄື່ອນໄຫວກວດສອບບໍລິມາດນ້ຳມັນ

252

ເມື່ອວັນທີ 24 ເມສາ 2019 ຜ່ານມາ ຂະແໜງຊັບສິນທາງປັນຍາມາດຕະຖານ ແລະ ວັດແທກ, ພະແນກວິທະຍາສາດ ແລະ ເຕັກໂນໂລຊີ ແຂວງຄຳມ່ວນ ໂດຍ    ການນຳພາຂອງ ທ່ານ ປະກາຍພອນ ແສງດາລາ ຫົວໜ້າຂະແໜງຊັບສິນທາງປັນຍາ ມາດຕະຖານ ແລະ ວັດແທກ ພ້ອມດ້ວຍພະນັກງານວິຊາການໄດ້ລົງເຄື່ອນໄຫວກວດສອບບໍລິມາດຫົວຈ່າຍນ້ຳມັນເຊື້ອໄຟໃນເທສະບານເມືອງທ່າແຂກ ໃນຈຳນວນ 3 ປ້ຳ, 8 ຫົວຈ່າຍ.

ຈຸດປະສົງໃນການລົງເຄື່ອນໄຫວໃນຄັ້ງນີ້ ກໍເພື່ອເຮັດໃຫ້ບໍລິມາດຫົວຈ່າຍນ້ຳມັນເຊື້ອໄຟຢູ່ໃນປ້ຳທີ່ເປີດໃຊ້ບໍລິການທົ່ວແຂວງໃຫ້ມີຄວາມໂປ່ງໃສ, ຍຸຕິທຳ ເພື່ອບໍລິການຮັບໃຊ້ສັງຄົມ; ອີກດ້ານໜຶ່ງກໍເພື່ອບໍ່ເປັນການເອົາປຽບຜູ້ຊົມໃຊ້ໃນຊີວິດປະຈຳວັນ. ດັ່ງນັ້ນ, ຂະແໜງຊັບສິນທາງປັນຍາ ມາດຕະຖານ ແລະ ວັດແທກ ຈຶ່ງໄດ້ລົງກວດສອບໃຫ້ຖືກຕ້ອງຕາມລະບຽບ, ກົດໝາຍທີ່ໄດ້ກຳນົດໄວ້.

ການລົງກວດສອບໃນຄັ້ງນີ້ ຫົວຈ່າຍນ້ຳມັນເຊື້ອໄຟແຕ່ລະປ້ຳທີ່ໄດ້ກວດສອບເຫັນວ່າຢູ່ໃນເກນມາດຕະຖານທີ່ຂະແໜງການກ່ຽວຂ້ອງໄດ້ອະນຸມັດໃຫ້. ດັ່ງນັ້ນ, ຈຶ່ງໄດ້ຕິດສະຕິກເກີ, ໜີບກົ່ວ ແລະ ອອກໃບຢັ້ງຢືນໃຫ້ປ້ຳທີ່ໄດ້ກວດສອບເພື່ອເປັນຫຼັກຖານ ແລະ ຖືກຕ້ອງຕາມລະບຽບຫຼັກການ.

Credit: Laoedaily
ຂ່າວ: ຄູນປະເສີດ