ເກີດເຫດ ລົດເມອິນເດຍ ເສຍຫຼັກຕົກທາງແຄບໄຫຼລົງເຫວເລິກພູຫິມາໄລ ເສຍຊີວິດ 10 ຄົນ

296

ລົດເມໂດຍສານຂອງອິນເດຍເສຍຫຼັກແລ່ນຕົກຫົນທາງແຄບ ກ່ອນໄຫຼລົງເຫວເລິກ 60 ແມັດ ກາງພູຫິມາໄລ ຢືນຢັນຜູ້ເສຍຊີວິດ 10 ຄົນ.

ສຳນັກຂ່າວຕ່າງປະເທດລາຍງານວ່າ ເກີດອຸບັດຕິເຫດ ລົດເມໂດຍສານພິກຂວໍ້າຕົກລົງເຫວ 60 ແມັດ ບໍລິເວນພູຫິມາໄລ ສົ່ງຜົນໃຫ້ມີຜູ້ເສຍຊີວິດ 10 ຄົນ ແລະ ໄດ້ຮັບບາດເຈັບອີກຫຼາຍຄົນ ເຈົ້າໜ້າທີ່ກູ້ໄພທ້ອງຖິ່ນເລັ່ງເຂົ້າຊ່ວຍເຫຼືອ ພ້ອມອຸປະສັກເນື່ອງຈາກລັກສະນະຂອງພາກພື້ນປະເທດ.

ຕາມລາຍງານ ລະບຸວ່າ ເຫດດັ່ງກ່າວເກີດຂຶ້ນ ເມື່ອໄລຍະກາງເດິກ ຂອງວັນເສົາ ທີ 27 ເມສາ ລົດເມໂດຍສານຂອງອິນເດຍທີ່ເດີນທາງອອກມາຈາກເມືອງດັລເຮົາຊີ ລັດຫິມາຈັລປະເທດ ກໍາລັງຈະເດີນທາງໄປເມືອງປາທັນກົດ ລັດ ປັນຈາບ ເຊິ່ງຈະຕ້ອງຜ່ານເສັ້ນທາງອັນຕະລາຍເທິງພຸຫິມາໄລໄປດ້ວຍ ລົດຈຶ່ງເກີດເສຍຫຼັກ ແລະ ພິກຂວໍ້າໄຫຼຕົກເຫວ ກ່ອນທີ່ຊາກລົດຈະໄປຢຸດຢູ່ກົ້ນເຫວທີ່ມີຄວາມເລິກ ປະມານ 60 ແມັດ.

ຫຼັງເກີດເຫດ ທາງເຈົ້າໜ້າທີ່ກູ້ໄພທ້ອງຖິ່ນ ເຂົ້າກວດກາ ແລະ ຊ່ວຍເຫຼືອຜູ້ປະສົບເຫດທັນທີ ເຖິງວ່າຈະມີອຸປະສັກໃນດ້ານລັກສະນະພາກພື້ນຂອງປະເທດ ແລະ ຄວາມມືດໃນໄລຍະກາງຄືນ ຈົນຮອດເຊົ້າ ຈຶ່ງເລິ່ມເບິ່ງເຫັນສະພາບຄວາມເສຍຫາຍທີ່ເກີດເຫດ ພົບວ່າ ລົດເມໂດຍສານແມ່ນຢູ່ສະພາບເປ້ເພສົມຄວນ ທາງການກໍ່ຢືນຢັນຈຳນວນຜູ້ເສຍຊີວິດແມ່ນ 10 ຄົນ.

ຢ່າງໃດກໍ່ຕາມ ເຈົ້າໜ້າທີ່ຕຳຫຼວດຄາດການວ່າ ສາເຫດຂອງອຸບັດຕິເຫດຄັ້ງນີ້ ອາດຈະເກີດຈາກຄວາມປະໝາດຂອງຄົນຂັບລົດ ເນື່ອງຈາກຫົນທາງເສັ້ນດັ່ງກ່າວມັນມີຄວາມແຄບ ແລະ ຄົດລ້ຽວຫຼາຍຈຸດ ແລະ ເປັນເສັ້ນທາງທີ່ມັກເກີດອຸບັດຕິເຫດເຊັ່ນນີ້ຫຼາຍຄັ້ງ ແຕ່ກໍ່ເປັນເສັ້ນທາງສາຍຫຼັກທີ່ບໍ່ສາມາດຫຼີກລ່ຽງໄດ້ ເພາະໃຊ້ເຊື່ອມຕໍ່ລະຫວ່າງເມືອງເທິງພາກພື້ນຮາບສູງບໍລິເວນພູຫິມາໄລ.

ທັງນີ້ ປະກາດຂອງອິນເດຍ ຖືເປັນປະເທດທີ່ມີຈຳນວນເກີດອຸບັດຕິເຫດທາງລົດໃຫຍ່ສູງຫຼາຍ ຈາກລາຍງານພົບວ່າ ມີຊາວອິນເດຍ ເສຍຊີວິດຈາກອຸບັດຕິເຫດເທິງທ້ອງຖະໜົນ ໂດຍສະເລ່ຍ 150.000 ຄົນ ຕໍ່ປີ.