ຈີນເຜີຍຄວາມສົນໃຈຮ່ວມ “ໜຶ່ງແລວໜຶ່ງເສັ້ນທາງ” ຈາກໂລກເພິ່ມຂຶ້ນ

241

ປະທານປະເທດສີ ຈິ້ນຜິງ ກ່າວວ່າ ມີປະເທດທີ່ສະແດງຄວາມສົນໃຈເຂົ້າເປັນສ່ວນໜຶ່ງຂອງແຜນຍຸດທະສາດ “ເສັ້ນທາງສາຍໄໝໃໝ່” ກັບຈີນຫຼາຍຂຶ້ນ ແລະ ການລົງນາມໃນຂໍ້ຕົກລົງ ລະຫວ່າງ ການປະຊຸມຄັ້ງນີ້ ສູງເຖິງ 5 ແສນຕື້ກີບ.

ສໍານັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນອາທິດ ທີ 28 ເມສາ  ວ່າ ປະທານປະເທດສີ ຈິ້ນຜິງ ຖະແຫຼງການ ເມື່ອວັນເສົາ ຜ່ານມາ ຫຼັງການປະຊຸມ “ໜຶ່ງແລວໜຶ່ງເສັ້ນທາງ ເພື່ອຄວາມຮ່ວມມືລະຫວ່າງປະເທດ (BRF)”  ແລະ ການປະຊຸມ “ຄວາມລິເລີ່ມໜຶ່ງແລວໜຶ່ງເສັ້ນທາງ (BRI)”  ທີ່ນະຄອນຫຼວງປັກກິ່ງ ຜ່ານພົ້ນໄປດ້ວຍດີ ເມື່ອທ້າຍອາທິດ ທີ່ຜ່ານມາ ວ່າ ມີມິດປະເທດທີ່ສະແດງຄວາມສົນໃຈ ເຂົ້າຮ່ວມເປັນພັນທະມິດທາງການຄ້າກັບຈີນ ຕາມແຜນຍຸດທະສາດດັ່ງກ່າວ ເຊິ່ງຮູ້ຈັກກັນໃນອີກຊື່ໜຶ່ງວ່າ ເສັ້ນທາງສານໄໝ ແຫ່ງສະຕະວັດທີ 21 ຈາກ 65 ປະເທດ ເພິ່ມຂຶ້ນຢ່າງໜ້ອຍ 115 ປະເທດ ນັບຕັ້ງແຕ່ລັດຖະບານຈີນໄດ້ລິເລິ່ມ ໂຄງການນີ້ ເມື່ອປີ 2013 ລວມເຖິງ Equatorial Guinea, ໄລບີເຣຍ, ລັກເຊມເບີກ, ຈາໄມກາ, ເປຣູ, ບາເບໂດສ, ໄຊປຣັສ ແລະ ເຢເມນ.

ຂະນະດຽວກັນ ຜູ້ນໍາຈີນກ່າວເຖິງຂໍ້ຕົກລົງທັງໝົດທີ່ມີການລົງນາມ ໃນການປະຊຸມປີນີ້ ຮ່ວມກັບລັດຖະບານ ແລະ ອົງກອນລະຫວ່າງປະເທດ ໃນການໃຫ້ລັດຖະບານຈີນເຂົ້າໄປມີສ່ວນຮ່ວມໃນການຟື້ນຟູ ແລະ ພັດທະນາລະບົບໂຄງສ້າງພື້ນຖານ ວ່າມີ 283 ສະບັບ ຕີເປັນມູນຄ່າ 64.000 ລ້ານໂດລາ (ປະມານ 556.000 ຕື້ກີບ) ພ້ອມທັງຢືນຢັນວ່າ ແຜນຍຸດທະສາດໜຶ່ງແລວໜຶ່ງເສັ້ນທາງເປັນໂຄງການທີ່ໂປ່ງໃສເປີດກວ້າງ ພ້ອມຮັບການກວດກາ ແລະ ການພັດທະນາພາກພື້ນທີ່ຕັ້ງຢູ່ເທິງພື້ນຖານຂອງການຮັກສາສິ່ງແວດລ້ອມ ຕະຫຼອດຈົນ “ບໍ່ມີການເອົາປຽບ ຫຼື ກີດກັນທາງການຄ້າ” ເຊິ່ງປະເດັນຫຼັງສຸດນີ້ ເປັນເລື່ອງທີ່ຫຼາຍປະເທດ ສະແດງຄວາມກັງວົນອອກມາຢ່າງຊັດເຈນ ວ່າ ໂຄງການດັ່ງກ່າວ ອາດເປັນຈຸດເລິ່ມຕົ້ນຂອງການເຂົ້າສູ່ “ກັບດັກໜີ້ສິນ” ເຊັ່ນກໍລະນີທີ່ຈີນເຂົ້າຖືຄອງກິດຈະການທ່າເຮືອນໍ້າເລິກຂະໜາດໃຫຍ່ຂອງປະເທດສຣີລັງກາ ເປັນເວລາ 99 ປີ ແທນການທີ່ອີກຝ່າຍບໍ່ສາມາດຊໍາລະເງິນກູ້ໄດ້ທັນຕາມສັນຍາ.

ອີກປະການໜຶ່ງ ຂໍ້ມູນຈາກລັດຖະບານຈີນ ລະບຸວ່າ ຕະຫຼອດໄລຍະເວລາຮ່ວມ 6 ປີ ຂອງການດໍາເນີນໂຄງການຄວາມຮ່ວມມືໜຶ່ງແລວໜຶ່ງເສັ້ນທາງ ມູນຄ່າທາງການຄ້າ ລະຫວ່າງຈີນ ກັບ ປະເທດພັນທະມິດ ເພິ່ມຂຶ້ນຢ່າງຕໍ່ເນື່ອງ ເປັນ 3.670 ຕື້ໂດລາ (ກວ່າ 31 ລ້ານຕື້ກີບ).