ເກົາຫຼີໃຕ້ ກຽມຜ່ານຮ່າງກົດໝາຍໃໝ່ ໃຫ້ນັກສຶກສາຕ່າງຊາດ ຂໍສັນຊາດໄດ້ງ່າຍຂຶ້ນ

218

ເກົາ​ຫຼີ​ໃຕ້​ກຽມ​ສະເໜີ​ຮ່າງ​ກົດໝາຍໃຫ້​ນັກ​ສຶກ​ສາ​ຕ່າງ​ຊາດ​ທີ່ຮັບປະລິນຍາ​ໃນ​ເກົາ​ຫຼີ​ ເມືອ​ສົນ​ໃຈ​ ສາມາດປ່ຽນ​ສ​ະຖາ​ນະ​ເປັນ​ “ພົນລະເມືອງ​” ຂອງເກົາຫຼີໄດ້​ ເພື່ອຫວັງ​ແກ້​ບັນຫາ​ອັດຕາການເກີດໃນປະເທດ​ໜ້ອຍ​ລົງ ແລະ​ ໄດ້​ແຮງ​ງານ​ພັດທະນາ​ປະເທດ​ຫຼາຍ​ຂຶ້ນ​.

ລັດຖະບານ​ເກົາ​ຫຼີ​ໃຕ້​ກຽມ​ສະເໜີ​ຮ່າງ​ກົດໝາຍສະບັບ​ໃໝ່​ ໂດຍ​ຈະ​ເອື້ອປະໂຫຍດ​ໃຫ້​ຊາວ​ຕ່າງ​ຊາດ​ທີ່ສົ​ນ​ໃຈ​ຈະ​ປ່ຽນ​ສະ​ຖາ​ນະ​ເປັນ​ພົນລະເມືອງ​ເກົາ​ຫຼີ​ໃຕ້ໃຫ້ສາມາດ​ດຳ​ເນີນ​ການ​ໄດ້​ງ່າຍ​ຫຼາຍ​ຍິ່ງ​ຂຶ້ນ​.

ທັງ​ນີ້​ ຮ່າງ​ກົດໝາຍສະບັບດັ່ງ​ກ່າວ​ມີ​ເນື້ອໃນ​ສຳຄັນ ​ຄື​ ຖ້າ​ນັກ​ສຶກ​ສາທີ່ເປັນຊາວ​ຕ່າງ​ຊາດ​ທີ່ໄດ້​ເຂົ້າ​ມາ​ສຶກ​ສາ​ໃນປະເທດ​ເກົາ​ຫຼີ​ໃຕ້​ ແລະ​ ຈົບ​ປະລິນຍາ​ ຖ້າຕ້ອງ​ການປ່ຽນ​ສັນຊາດ​ກໍ່​ຈະ​ມີ​ການ​ເອື້ອ​ປະໂຫຍດ​ໃນ​ເລື່ອງ​ດັ່ງ​ກ່າວ​ໃຫ້ພ້ອມ​.

​ສາ​ເຫດ​ສຳຄັນ​ແມ່ນມາຈາກ ​ທາງ​ການ​ເກົາ​ຫຼີ​ໃຕ້​ຕ້ອງ​ການ​ເພີ່ມ​ປະຊາກອນ​ໃນ​ປະເທດ​ ຈຶ່ງ​ຊຸກຍູ້ດັນ​ຮ່າງ​ກົດໝາຍດັ່ງ​ກ່າວ​ອອກ​ມາ​ ແຕ່​ກໍ່​ຕ້ອງ​ການ​ພົນລະເມືອງ​ທີ່​ມີ​ຄຸນນະພາບ​ ແລະ​ ຄວາມ​ສາມາດ​ ຈຶ່ງ​ເຈາະ​ຈົ່ງ​ສະເພາະ​ກຸ່ມ​ນັກ​ສຶກ​ສາທີ່ເປັນຊາວ​ຕ່າງ​ຊາດ​ທີ່​ສຳ​ເລັດ​ປະລິນຍາ​ໃນ​ປະເທດ​ເກົາ​ຫຼີ​ໃຕ້​ເທົ່າ​ນັ້ນ​.

ທ່ານຄິມ​ ຄ​ອງ​ຈິນ​ ນັກ​ການ​ເມືອງ​ທີ່​ສະເໜີ​ຮ່າງ​ກົດໝາຍດັ່ງ​ກ່າວ​ ລະ​ບຸ​ວ່າ​ ກົດໝາຍການ​ໂອນ​ສັນຊາດ​ຂອງ​ເກົາ​ຫຼີ​ໃຕ້​ ໃນ​ປັດຈຸບັນ​ ຈະ​ເອື້ອ​ອຳນວຍສະເພາະ​ການ​ແຕ່ງ​ງານ​ລະຫວ່າງ​ຄົນ​ເກົາ​ຫຼີ​ໃຕ້​ ແລະ ຄົນ​ຕ່າງປະເທດ​ເທົ່າ​ນັ້ນ​ ແຕ່​ກັບ​ຮ່າງ​ກົດໝາຍສະບັບ​ໃໝ່​ແມ່ນຈະ​ກວມເອົາ​ເຖິງ​ກຸ່ມ​ນັກ​ສຶກ​ສາອີກ​ດ້ວຍ​.

ຢ່າງໃດ​ກໍ່​ຕາມ​ ຫາກ​ຮ່າງ​ກົດໝາຍນີ້​ ຖ້າຜ່ານ​ການຕົກລົງ​ເຫັນ​ດີ ກໍ່​ຈະ​ຊ່ວຍ​ແກ້​ບັນຫາ​ເລື່ອງ​ປະຊາກອນ​ທີ່ຫຼຸດລົງ​ ແລະ​ ຍັງ​ເພີ່ມ​ໂອ​ກາດ​ໃນ​ການ​ມີ​ແຮງ​ງານ​ທີ່​ເຂົ້າ​ມາ​ພັດທະນາ​ປະເທດ​.

ອີກປະການໜຶ່ງ​ ມີ​ສະ​ຖິ​ຕິຈຳນວນ​ຊາວ​ຕ່າງ​ຊາດ​ທີ່​ອາໄສ​ຢູ່ໃນປະເທດ​ເກົາ​ຫຼີ​ໃຕ້ ​ປັດຈຸບັນ​ມີ​​ປະມານ​ 2 ລ້ານ​ຄົນ​ ແລະ ​ມີ​ແນວ​ໂນ້ມ​ທີ່ຈະ​ເພິ່ມ​ຂຶ້ນ​​ເລື້ອຍ​ໆ.​