ອາເມຣິກາ ກຽມອອກຈາກສົນທິສັນຍາການຄ້າອາວຸດຂອງຢູເອັນ

227

ປະທານາທິບໍດີໂດນັລ ທຣຳ ປະກາດຕໍ່ທີ່ປະຊຸມລັອບບີ້ຢິສ ດ້ານອາວຸດປືນລາຍໃຫຍ່ທີ່ສຸດຂອງສະຫະລັດ ວ່າ ລັດຖະບານຂອງຕົນຈະລາອອກຈາກການເປັນລັດພາຄີ ກັບ ສົນທິສັນຍາການຄ້າອາວຸດຂອງສະຫະປະຊາຊາດ.

ສໍານັກຂ່າວຕ່າງປະເທດລາຍງານຈາກເມືອງອິນດີແອນນາ ໂພລິສ ລັດອິນດີແອນາ ປະເທດສະຫະລັດ ອາເມຣິກາ ເມື່ອວັນສຸກ ທີ 26 ເມສາ ວ່າ ປະທານາທິບໍດີໂດນັລ ທຣໍາ ກ່າວຖະແຫຼງເທິງເວທີປະຊຸມໃຫຍ່ສາມັນປະຈໍາປີ ຂອງສະມາຄົມປືນໄຣເຟີລແຫ່ງຊາດ (NRA) ລັອບບີ້ຢິສ ດ້ານອາວຸດປືນລາຍໃຫຍ່ທີ່ສຸດຂອງສະຫະລັດ ທີ່ເມືອງອິນດີແອນາ ໂພລິສ ເມື່ອວັນສຸກ ທີ່ຜ່ານມາ ວ່າ ຕົນຕ້ອງການນໍາສະຫະລັດອອກຈາກການເປັນໜຶ່ງໃນລັດພາຄີຂອງສົນທິສັນຍາການຄ້າອາວຸດ (Arms Trade Treaty) ຫຼື ATT ເຊິ່ງໄດ້ຮັບການລົງມະຕິເຫັນດີຈາກທີ່ປະຊຸມສະມັດຊາໃຫຍ່ສະຫະປະຊາຊາດ (UNGA) ເມື່ອປີ 2012 ແລະ ລັດຖະບານຂອງອະດີດປະທານາທິບໍດີບາລັກ ໂອບາມາ ລົງນາມເປັນລັດພາຄີ ໃນປີຕໍ່ມາ ແຕ່ສະພາຄອງເກຣສ ຍັງບໍ່ເຄີຍໃຫ້ຄຳໝັ້ນສັນຍາຕໍ່ສົນທິສັນຍາສະບັບນີ້.

ທັງນີ້ ທຣຳ ເວົ້າເຖິງການຕັດສິນໃຈດັ່ງກ່າວ ວ່າ ເພື່ອປົກປ້ອງ “ອະທິປະໄຕຂອງສະຫະລັດ” ແລະ ຕົນຈະບໍ່ມີທາງຍິນຍອມໃຫ້ “ອໍານາດຈາກພາຍນອກໃນຮູບແບບໃດກໍ່ຕາມ” ເຂົ້າມາ “ມີອິດທິພົນ” ຕໍ່ບົດບັນຍັດເພິ່ມຕື່ມ ຄັ້ງທີ 2 ຂອງລັດທະທຳມະນູນ ວ່າດ້ວຍສິດທິ ແລະ ເສລີພາບໃນການຜະລິດຈັດຈໍາໜ່າຍ ແລະ ຄອບຄອງອາວຸດປືນ “ເພື່ອການປ້ອງກັນຕົວເອງ” ໂດຍການທີ່ໂອບາມາ ລົງນາມເຂົ້າຮ່ວມເອທີທີ ເຊິ່ງເປັນການ “ຈັດລະບຽບ” ການຄ້າອາວຸດ ສ້າງຄວາມບໍ່ພໍໃຈຢ່າງໜັກໃຫ້ກັບ ເອັນອາເອ ມາຕະຫຼອດ ດ້ານສະຫະປະຊາຊາດ (UN) ຍັງສະຫງວນທ່າທີຕໍ່ການປະກາດຂອງທຣຳ ເຖິງວ່າຜູ້ນໍາສະຫະລັດໃຊ້ໂອກາດນີ້ ລົງນາມໃນຄໍາສັ່ງພິເສດຂໍຝ່າຍບໍລິຫານ ວ່າດ້ວຍການກຽມຖອນຕົວອອກຈາກເອທີທີ.