ໃຫຍ່ເກີນ! ນັກທຸລະກິດຍິງ ຊາວອູການດາ ຄວ້າຕໍາແໜ່ງ ‘ນາງງາມໂອເວີໄຊ’

229

ນາຊາຣີ ເບລິນດາ ນັກທຸລະກິດຍິງ ຈາກອູການດາ ຄວ້າຕໍາແໜ່ງນາງງາມໂອເວີໄຊ ເຊິ່ງຈັດປະກວດຂຶ້ນເປັນຄັ້ງທໍາອິດ ພ້ອມຂໍເປັນແບບຢ່າງໃຫ້ກັບຜູ້ຍິງທີ່ມີຮູບຮ່າງໃຫຍ່ກວ່າປົກກະຕິທັງຫຼາຍ.

ສໍານັກຂ່າວເອເອັຟພີລາຍງານຈາກນະຄອນຫຼວງກໍາປາລາ ປະເທດອູການດາ ເມື່ອວັນອາທິດ ທີ 28 ເມສາ ວ່າ ນາຊາຣີ ເບລິນດາ ນັກທຸລະກິດຍິງຊາວອູການດາເປັນຜູ້ຄວ້າຕໍາແຫນ່ງ Miss Curvy ນາງງາມໂອເວີໄຊ ຫຼື ສາວທີ່ໃຫຍ່ກວ່າຂະໜາດປົກກະຕິຂອງຜູ້ຍິງທົ່ວໄປ ເຊິ່ງມີການຈັດປະກວດຂຶ້ນ ເປັນຄັ້ງທໍາອິດ ໃນປະເທດອູການດາ ໃນນະຄອນຫຼວງກໍາປາລາ ເມື່ອຄໍ່າວັນສຸກ ທີ່ຜ່ານມາ ສາມາດເອົາຊະນະຜູ້ເຂົ້າປະກວດອີກ 24 ຄົນ ໄດ້ເປັນຜົນສໍາເລັດ ໂດຍກ່າວວ່າ ຈະຂໍເປັນແຮງບັນດານໃຈໃຫ້ກັບຜູ້ຍິງຄົນອື່ນໆທີ່ມີຮູບຮ່າງໃຫຍ່ກວ່າປົກກະຕິ ເພາະການມີຮູບຮ່າງໂອເວີໄຊບໍ່ແມ່ນບັນຫາ ຂໍໃຫ້ມີຄວາມສຸກກັບສິ່ງທີ່ເປັນຢູ່, ຢ່າທໍ້ຖອຍ ແລະ ຂໍໃຫ້ກ້າວເດີນຕໍ່ໄປ.

ການປະກວດນາງງາມໂອເວີໄຊ ຫຼື ການປະກວດນາງງາມຂອງສາວທີ່ໃຫຍ່ກວ່າຂະໜາດປົກກະຕິຂອງຜູ້ຍິງທົ່ວໄປ ນັ້ນ ເປັນສ່ວນໜຶ່ງຂອງການປະຊາສຳພັນຂອງລັດຖະບານ ເພື່ອດຶງດູດນັກທ່ອງທ່ຽວໃຫ້ເດີນທາງເຂົ້າມາປະເທດອູການດາ ເຊິ່ງຢູ່ທາງພາກຕາເວັນອອກຂອງທະວີວອາຟຣິກາ.