ຫຼາຍປະເທດເອີຣົບ ສົນໃຈຮ່ວມ ‘ໜຶ່ງແລວໜຶ່ງເສັ້ນທາງ’ ແຕ່ຕ້ອງການເປັນກຸ່ມ

231

ເຢຍລະມັນກ່າວວ່າ ຫຼາຍປະເທດໃນທະວີບເອີຣົບສົນໃຈເຂົ້າຮ່ວມເປັນສ່ວນໜຶ່ງຂອງແຜນຍຸດທະສາດ “ໜຶ່ງແລວໜຶ່ງເສັ້ນທາງ” ແຕ່ຂໍເລິ່ມຕົ້ນດ້ວຍການລົງນາມ MOU ແບບເປັນກຸ່ມກ່ອນ.

ສໍານັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນເສົາ ທີ 27 ເມສາ ວ່າ ທ່ານເພເຕີ ອັລຕ໌ໄມເອີ ລັດຖະມົນຕີວ່າການກະຊວງເສດຖະກິດຂອງເຢຍລະມັນ ເຊິ່ງເຮັດໜ້າທີ່ເປັນຫົວໜ້າຄະນະຜູ້ແທນຂອງລັດຖະບານເບີລິນ ເຂົ້າຮ່ວມການປະຊຸມ “ໜຶ່ງແລວໜຶ່ງເສັ້ນທາງ ເພື່ອຄວາມຮ່ວມມືລະຫວ່າງປະເທດ” (BRF: belt and road forum for international cooperation) ແລະ ການປະຊຸມ “ເລື່ອງການລິເລິ່ມໜຶ່ງແລວໜຶ່ງເສັ້ນທາງ” (BRI: Belt and Road Initiative) ທີ່ນະຄອນຫຼວງປັກກິ່ງ ກ່າວເມື່ອວັນສຸກ ທີ່ຜ່ານມາ ວ່າ ຫຼາຍປະເທດໃນເອີຣົບລວມເຖິງເຢຍລະມັນ ມີຄວາມສົນໃຈຕໍ່ແຜນຍຸດທະສາດເຊື່ອມໂຍງເສັ້ນທາງການຄ້າດັ່ງກ່າວ ເຊິ່ງເກີດຂຶ້ນຈາກແນວຄິດລິເລິ່ມຂອງປະທານປະເທດສີ ຈິ້ນຜິງ ເມື່ອປີ 2013. ຢ່າງໃດກໍ່ຕາມ, ເອີຣົບປະສົງຄວາມຮ່ວມມືເບື້ອງຕົ້ນໃນລັກສະນະຂອງ “ບັນທຶກຄວາມເຂົ້າໃຈ” ຫຼື (MOU: memorandum of understanding) ໃນແບບ “ການຮ່ວມກັນເປັນກຸ່ມ” ຫຼາຍກວ່າຕ່າງຝ່າຍຕ່າງແຍກກັນລົງນາມ.

ຂະນະດຽວກັນ ທ່ານອັລຕ໌ໄມເອີ ກ່າວວ່າ ໃນສ່ວນຂອງຝ່າຍເຢຍລະມັນ ຫວັງວ່າ ໃນອະນາຄົດລັດຖະບານປັກກິ່ງຈະເພິ່ມການຫຼຸດຜ່ອນເງື່ອນໄຂໃນການເຂົ້າສູ່ຕະຫຼາດ ແລະ ປະຕິຮູບການແຂ່ງຂັນທາງການຄ້າຕໍ່ບໍລິສັດຈາກຕ່າງປະເທດຫຼາຍກວ່ານີ້. ຢ່າງໃດກໍ່ຕາມ, ອິຕາລີເປັນສະມາຊິກກຸ່ມ “ຈີ 7 ” ແລະ ເປັນປະເທດຈາກໂລກຕາເວັນຕົກ ປະເທດທໍາອິດທີ່ລົງນາມຮ່ວມເປັນພັນທະມິດໜຶ່ງແລວໜຶ່ງເສັ້ນທາງ ຫຼື “ເສັ້ນທາງສາຍໄໝ ແຫ່ງສະຕະວັດທີ 21” ຢ່າງເປັນທາງການ ໂດຍນາຍົກລັດຖະມົນຕີຈູເຊບເປ ກອນເຕ ຜູ້ນໍາລັດຖະບານໂຣມ ເຂົ້າຮ່ວມການປະຊຸມ ຄັ້ງນີ້ ດ້ວຍຕົວເອງ ນອກຈາກນີ້, ຍັງມີນາຍົກລັດຖະມົນຕີເຊບາສຕຽນ ເຄີຣ໌ຊ (Sebastain Kurz) ຜູ້ນໍາອົສເຕຣຍ ແລະ ນາຍົກລັດຖະມົນຕີວິກເຕີ ອໍບານ ຜູ້ນໍາປະເທດຮັງກາລີ ລວມຢູ່ໃນກຸ່ມຜູ້ນໍາ ຈາກ 37 ປະເທດ ທີ່ເດີນທາງມາເຂົ້າຮ່ວມການປະຊຸມ ຄັ້ງນີ້ດ້ວຍຕົວເອງ.