ອາກາດຮ້ອນຫຼາຍ ກຳປູເຈຍ ຫຼຸດເວລາຮຽນລົງ 1 ຊົ່ວໂມງ

229

ກະຊວງສຶກສາທິການກໍາປູເຈຍ ແຈ້ງການສັ່ງຫຼຸດເວລາການຮຽນ-ການສອນ ແຕ່ລະມື້ໃນໂຮງຮຽນທົ່ວປະເທດລົງ 1 ຊົ່ວໂມງ ຈາກຄວາມວິຕົກກັງວົນວ່າ ເດັກນ້ອຍນັກຮຽນ ແລະ ຄູ-ອາຈານ ອາດຈະລົ້ມປ່ວຍຈາກສະພາບອາກາດທີ່ຮ້ອນອົບເອົ້າຫຼາຍ.

ສໍານັກຂ່າວເອພີລາຍງານຈາກນະຄອນຫຼວງພະນົມເປັນ ປະເທດກໍາປູເຈຍ ເມື່ອວັນສຸກ ທີ 26 ເມສາ  ວ່າ ທ່ານຮາງ ຊວນ ນະຣົນ ລັດຖະມົນຕີກະຊວງສຶກສາເຍົາວະຊົນ ແລະ ການກີລາກໍາປູເຈຍ ກ່າວໃນຖະແຫຼງການ ເມື່ອວັນສຸກ ວ່າ ຄໍາສັ່ງຫຼຸດເວລາຮຽນລົງ 1 ຊົ່ວໂມງ ຈະມີຜົນໄປຈົນກວ່າຈະຮອດລະດູຝົນ ໂດຍຈະເລິ່ມຕົ້ນປະຕິບັດພາຍໃນເດືອນພຶດສະພາ ນີ້.

ຄື້ນຄວາມຮ້ອນທີ່ກໍາລັງແຜ່ປົກຄຸມທົ່ວປະເທດກໍາປູເຈຍ ແລະ ອຸນຫະພູມມັກຂຶ້ນສູງເຖິງ 41 ອົງສາ ເປັນເວລາຍາວນານທີ່ສຸດເທົ່າທີ່ເຄີຍປະກົດໃນປະເທດ.

ໂຮງຮຽນສ່ວນຫຼາຍທົ່ວປະເທດກໍາປູເຈຍແມ່ນບໍ່ມີເຄື່ອງປັບອາກາດເຮັດໃຫ້ເກີດຄວາມວິຕົກກັງວົນ ວ່າ ອຸນຫະພູມພາຍໃນຫ້ອງຮຽນຈະສູງຂຶ້ນເຖິງລະດັບທີ່ເປັນອັນຕະລາຍຕໍ່ສຸຂະພາບຂອງຄູ ແລະ ເດັກນັກຮຽນ ທາງຄະນະຜູ້ບໍລິຫານຂອງໂຮງຮຽນຕ່າງໆໄດ້ຮັບຄໍາສັ່ງໃຫ້ເຝົ້າເບິ່ງອາການຂອງການເປັນວິນ, ລົມແດດ ແລະ ກະຕຸ້ນໃຫ້ເດັກນັກຮຽນດື່ມນໍ້າຫຼາຍຂຶ້ນ.

ເວລາຮຽນທີ່ຫຼຸດລົງ 1 ຊົ່ວໂມງ ຈະຫຼຸດ 30 ນາທີ ໃນການຮຽນຕອນເຊົ້າ ແລະ ອີກ 30 ນາທີ ຈາກຕອນບ່າຍ ໃນໄລຍະກ່ອນໜ້ານີ້ ກໍາປູເຈຍ ເຄີຍໃຊ້ມາດຕະການຫຼຸດເວລາຮຽນແບບດຽວກັນນີ້ມາແລ້ວ ຄັ້ງໜຶ່ງ ໃນປີ 2016.