ກະສິກອນໄທ ຈັບມື ລາວໂທລະຄົມ ເປີດໂຕແອັບ “ QR KBank ”

296

ທະນາຄານກະສິກອນໄທ ຮ່ວມກັບ ບໍລິສັດ ລາວໂທລະຄົມມະນາຄົມ ມະຫາຊົນ ເປີດໂຕແອັບພລິເຄຊັນກະເປົ໋າເງິນເທິງມືຖື “ QR KBank ” ເຊິ່ງເປັນຟີເຈີໃໝ່ຊ່ວຍໃຫ້ສາມາດຕື່ມເງິນຄ່າໂທລະສັບ, ຄ່າອິນເຕີເນັດ ແລະ ອື່ນໆ ໄດ້ຢ່າງສະດວກສະບາຍ ໂດຍເລີ່ມໃຊ້ງານນັບແຕ່ວັນທີ 1 ເມສາ ເປັນຕົ້ນມາ. ຂະນະທີ່ທະນາຄານກະສິກອນໄທ ກໍໝັ້ນໃຈວ່າຈະມີລູກຄ້າໃຊ້ບໍລິການຫຼາຍກວ່າ 1 ແສນຄົນໃນປີນີ້ ໂດຍມີແຜນຂະຫຍາຍຈຸດບໍລິການຂອງທະນາຄານ ແລະ ຕົວແທນໃນທົ່ວນະຄອນຫຼວງ ເຖິງ 120 ຈຸດ.

ທ່ານ ພັດທະນະພົງ ຕັນສົມບູນ ປະທານສະພາບໍລິຫານ ທະນາຄານກະສິກອນໄທ ກ່າວວ່າ: ພວກເຮົາເຫັນໂອກາດໃນການໃຫ້ບໍລິການຜ່ານຊ່ອງທາງດິຈິຕອລ ຈຶ່ງໄດ້ເປີດໂຕ ແລະ ທົດລອງໃຊ້ງານ “ QR KBank ” ແອັບພລິເຄຊັນກະເປົ໋າເງິນເທິງມືຖືທີ່ບໍ່ຕ້ອງຜູກກັບບັນຊີທະນາຄານເມື່ອເດືອນທັນວາ 2018 ຜ່ານມາ ຢູ່ຕະຫຼາດຂົວດິນ ເມືອງສີສັດຕະນາກ ເຊິ່ງການໃຊ້ສອຍຕ່າງໆຜ່ານລະບົບ QR Code ກໍຖືວ່າໄດ້ຜົນການຕອບຮັບເປັນຢ່າງດີ, ມີຈໍານວນການໃຊ້ຫຼາຍກວ່າ 73 ພັນເທື່ອ, ຄິດເປັນມູນຄ່າ 54 ພັນລ້ານກີບ. ສະນັ້ນ, ເພື່ອຕອບໂຈດການໃຊ້ງານທີ່ຫຼາຍຂຶ້ນຈຶ່ງໄດ້ຮ່ວມມືກັບລາວໂທລະຄົມ ພັດທະນາລະບົບ ແລະ ເປີດໂຕລະບົບຕື່ມເງິນມືຖືເຄືອຂ່າຍລາວໂທລະຄົມ ເພື່ອອໍານວຍ ຄວາມສະດວກແກ່ລູກຄ້າ ໂດຍຈະເລີ່ມໃຫ້ບໍລິການໃນນະຄອນຫຼວງວຽງຈັນ ເປັນອັນດັບທໍາອິດ.

ທ່ານ ປີຍະວັດ ຈະຣິຍະເສດຖະພົງ ຮອງຜູ້ອໍານວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ເປີດເຜີຍວ່າ: ປັດຈຸບັນຄົນລາວຫຼາຍກວ່າ 81% ໃຊ້ໂທລະສັບມືຖື ແລະ ການເຂົ້າເຖິງອິນເຕີເນັດຜ່ານໂທລະສັບເພີ່ມຂຶ້ນປີລະ 15% ເຊິ່ງການເປີດໂຕແອັບພລິເຄຊັນໃໝ່ນີ້ຈະເປັນການຍົກລະດັບການບໍລິການຂອງລາວໂທລະຄົມເພີ່ມຂຶ້ນ ຕອບໂຈດຄວາມຕ້ອງການຂອງລູກຄ້າໃນຍຸກການເງິນດິຈິຕອລ.

ໂອກາດນີ້, ທ່ານ ສຸລິສັກ ທໍານຸວົງ ຮັກສາການຫົວໜ້າກົມຄຸ້ມຄອງລະບົບຊໍາລະສະສາງ ທະນາຄານ ແຫ່ງ ສປປ ລາວ ໃຫ້ຮູ້ຕື່ມວ່າ: ລັດຖະບານມີນະໂຍບາຍໃຫ້ພາກເອກະຊົນນໍາເຕັກໂນໂລຊີດິຈິຕອລ ເພື່ອໃຫ້ບໍລິການທາງດ້ານການເງິນ ແລະ ການຊໍາລະເງິນທີ່ທັນສະໄໝ ເຊິ່ງການຮ່ວມມືກັນລະ ຫວ່າງທະນາຄານກະສິກອນໄທ ກັບ ລາວໂທລະຄົມ ໃນຄັ້ງນີ້ກໍຖືວ່າເປັນການຊຸກຍູ້ໃຫ້ສັງຄົມກ້າວສູ່ການເງິນດິຈິຕອລ ຢ່າງແທ້ຈິງ.

ປະທານສະພາບໍລິຫານ ທະນາຄານກະສິກອນໄທ ຍັງໃຫ້ສໍາພາດຕື່ມວ່າ: QR KBank ສາມາດດາວໂຫຼດໄດ້ທັງລະບົບ ໄອໂອເອັສ ແລະ ແອນດຣອຍ ຄາດວ່າໃນປີ 2019 ຈະມີຜູ້ໃຊ້ງານຫຼາຍກວ່າ 1,2 ແສນຄົນ ຈະມີການນໍາໃຊ້ເກີດຂຶ້ນ 3 ລ້ານລາຍການ ຄິດເປັນມູນຄ່າ 88 ຕື້ 500 ລ້ານກີບ ພ້ອມທັງມີແຜນຂະຫຍາຍຈຸດບໍລິການ ແລະ ຕົວແທນຈໍາໜ່າຍທົ່ວນະຄອນຫຼວງວຽງຈັນ 120 ຈຸດ ແລະ ຍັງຈະໃຫ້ຄວບຄຸມທົ່ວປະເທດໃນອະນາຄົດ.