ອຸຕຸເຕືອນ 10 ແຂວງ ລະວັງພາຍຸລະດູຮ້ອນພັດຜ່ານເຂົ້າລາວ ມື້ອື່ນນີ້

470

ກົມອຸຕຸນິຍົມແຈ້ງ 10 ແຂວງໃຫ້ລະວັງພາຍຸລະດູຮ້ອນ ເຊິ່ງຈະເຮັດໃຫ້ຝົນຕົກຟ້າຮ້ອງ
ຟ້າຜ່າ, ໝາກເຫັບຕົກ ແລະ ລົມພັດແຮງ ຕັ້ງແຕ່ວັນທີ 25-27 ເມສາ 2019 ນີ້.

ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນພາຍຸລະດູຮ້ອນ ໃນໄລຍະວັນທີ 25 ຫາ 27 ເມສາ 2019 ເນື່ອງຈາກ ມວນອາກາດຮ້ອນອົບເອົ້າໄດ້ປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງແຮງ ພ້ອມດຽວກັນນັ້ນກະແສລົມຕາເວັນຕົກ ແລະ ລົມຕາເວັນອອກສ່ຽງໃຕ້ ພັດຜ່ານປົກຄຸມເຂດພາກເໜືອ ຫາ ພາກກາງ ເຊິ່ງຈະເຮັດໃຫ້ມີພາຍຸລະດູຮ້ອນເກີດຂຶ້ນໃນລັກສະນະຝົນຕົກຟ້າຮ້ອງ ອາດຈະມີໝາກເຫັບຕົກ ແລະ ລົມພັດແຮງຢູ່ບາງທ້ອງຖິ່ນຂອງແຂວງພາກເໜືອ ແລະ ພາກກາງ ໃນໄລຍະວັນທີ 25 ຫາ 27 ເມສາ 2019 ນີ້.

ດັ່ງນັ້ນ, ທາງກົມອຸຕຸນິຍົມຈຶ່ງແຈ້ງເຖິງອໍານາດການປົກຄອງ ແລະ ປະຊາຊົນບັນດາເຜົ່າທີ່ອາໄສຢູ່ໃນ 10 ແຂວງ: ແຂວງຫົວພັນ, ຊຽງຂວາງ, ຫຼວງພະບາງ, ໄຊຍະບູລີ, ນະຄອນຫຼວງວຽງຈັນ, ໄຊສົມບູນ, ແຂວງວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ໃຫ້ມີສະຕິລະມັດລະວັງຕໍ່ສະພາບອາກາດທີ່ຝົນຈະຕົກໜັກ ຟ້າຮ້ອງ ຫຼື ອາດຈະມີໝາກເຫັບຕົກ ແລະ ລົມພັດແຮງ ເຊິ່ງອາດອາດຈະເຮັດໃຫ້ຕົ້ນໄມ້ຫັກ, ເສົາໄຟຟ້າລົ້ມ, ຫຼັງຄາເຮືອນເປ່ເພ ພ້ອມນີ້ກໍ່ໃຫ້ຫຼີກເວັ້ນການຢູ່ກ້ອງຕົ້ນໄມ້ໃຫຍ່ ຫຼື ກາງເດີ່ນທີ່ກວ້າງເພາະມີຄວາມສ່ຽງໃຫ້ເກີດຟ້າຜ່າ ແລະ ໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດ ໃນໄລຍະ 1 ຫາ 3 ວັນຕໍ່ໜ້າ.

ກົດອຸຕຸນິຍົມ ແລະ ອຸທົກກະສາດ