ຟິລິບປິນ ເກີດແຜ່ນດິນໄຫວຊໍ້າ 6,4 ແມັກນິຈູດ

245

ແຜ່ນດິນໄຫວຮຸນແຮງຄັ້ງໃໝ່ ທາງພາກກາງຂອງປະເທດຟິລິບປິນ ໃນວັນອັງຄານ ທີ 23 ເມສາ ຫຼັງຈາກວັນຈັນກໍ່ມີແຜ່ນດິນໄຫວຮຸນແຮງທາງພາກໃຕ້ຂອງປະເທດ ມີຜູ້ເສຍຊີວິດແລ້ວ 16 ຄົນ.

ສໍານັກຂ່າວເອພີລາຍງານຈາກເມືອງໂພຣັກ ປະເທດຟິລິບປິນ ເມື່ອວັນອັງຄານ ທີ 23 ເມສາ ວ່າ ສໍານັກງານສໍາຫຼວດທໍລະນີວິທະຍາສະຫະລັດ ແຈ້ງເຫດແຜ່ນດິນໄຫວຮຸນແຮງຄັ້ງໃໝ່ ວັດແທກໄດ້ 6,4 ແມັກນິຈູດ ເມື່ອວັນອັງຄານ ທີ 23 ເມສາ ທາງພາກກາງ ຂອງປະເທດຟິລິບປິນ ຂະນະທີ່ ສໍານັກງານກວດວັດແທກແຜ່ນດິນໄຫວຂອງຟິລິບປິນ ແຈ້ງວ່າ ວັດແທກແຮງສັ່ນສະເທືອນໄດ້ 6,5 ແມັກນິຈູດ ມີຈຸດສູນກາງຢູ່ໃກ້ກັບເມືອງຊານ ຈູລຽນ ໃນແຂວງອີສເທີນ ຊາມາ ຈຶ່ງໄດ້ແຈ້ງເຕືອນປະຊາຊົນໃຫ້ອອກຈາກອາຄານບ້ານເຮືອນ ແລະ ສໍານັກງານເພື່ອຄວາມປອດໄພ ໂດຍລາຍງານເບື້ອງຕົ້ນຍັງບໍ່ມີຜູ້ເສຍຊີວິດ ແລະ ບາດເຈັບລວມເຖິງຄວາມເສຍຫາຍອື່ນໆ.

ແຕ່ເມື່ອຄືນວັນຈັນ ທີ່ຜ່ານມາ ໄດ້ເກີດແຜ່ນດິນໄຫວຮຸນແຮງ ເຊິ່ງວັດແທກໄດ້ 6,1 ແມັກນິຈູດ ທາງພາກໃຕ້ຂອງປະເທດ ພົບຜູ້ເສຍຊີວິດແລ້ວ 16 ຄົນ ບາດເຈັບຢ່າງໜ້ອຍ 81 ຄົນ ແລະ ສູນຫາຍ 14 ຄົນ ທາງດ້ານເຈົ້າໜ້າທີ່ກູ້ໄພເລັ່ງຄົ້ນຫາຜູ້ລອດຊີວິດທີ່ຕິດຢູ່ໃນຊາກອາຄານທີ່ຫັກເພຂອງຫ້າງສັບພະສິນຄ້າ ຊື່ຊູຊອນ ຊູບເປີມາເກັດ ເປັນອາຄານສູງ 4 ຊັ້ນ ໃນແຂວງປໍາປາງາ ທາງພາກເໜືອຂອງນະຄອນຫຼວງມະນິລາ ໂດຍພົບຜູ້ເສຍຊີວິດແລ້ວ 5 ຄົນ ແລະ ຍັງມີແຮງສັ່ນສະເທືອນ ຕາມຫຼັງ ຫຼື ອັຟເຕີຊັອກ ຫຼາຍກວ່າ 400 ຄັ້ງ.

ສ່ວນໃນນະຄອນຫຼວງມະນິລາ ເມືອງຫຼວງຂອງຟິລິບປິນ ຕ້ອງປິດຖະໜົນບາງເສັ້ນທາງ ຍ້ອນຜົນກະທົບຈາກແຜ່ນດິນໄຫວ ຫຼັງມີອາຄານຫຼັງໜຶ່ງຫັກເພຖະຫຼົ່ມລົງມາ ນອກຈາກນັ້ນ, ຍັງມີອາຄານຫຼັງໜຶ່ງອຽງໄປບຽດຕິດກັບອາຄານທີ່ຢູ່ຕິດກັນ ທາງເຈົ້າໜ້າທີ່ຟິລິບປິນກ່າວດ້ວຍວ່າ ໂຮງຮຽນຫຼາຍແຫ່ງ  ແລະ ສະຖານທີ່ລັດຖະການ ເຊັ່ນ: ສານຍຸຕິທໍາຕ້ອງປິດທຳການໃນເຂດທີ່ຢູ່ອາໄສທີ່ມີປະຊາກອນໜາແໜ້ນຂອງນະຄອນຫຼວງມະນິລາ ເມື່ອວັນອັງຄານ ທີ 23 ເມສາ ເພື່ອໃຫ້ເຈົ້າໜ້າທີ່ກວດກາດ້ານຄວາມປອດໄພກ່ອນ.

ປະເທດຟິລິບປິນເປັນໜຶ່ງໃນປະເທດທີ່ຕັ້ງຢູ່ໃນເຂດວົງແຫວນໄຟແຫ່ງປາຊິຟິກ ຈຶ່ງເກີດແຜ່ນດິນໄຫວ ແລະ ພູໄຟລະເບີດໄດ້ເລື້ອຍໆ ເຊັ່ນເມື່ອປີ 1990 ເກີດແຜ່ນດິນໄຫວຮຸນແຮງວັດແທກໄດ້ 7,7 ແມັກນິຈູດ ທາງພາກເໜືອຂອງຟິລິບປິນ ເຮັດໃຫ້ມີຜູ້ເສຍຊີວິດ ເກືອບ 2.000 ຄົນ.