ແຜນດິນໄຫວ 3,7 ແມັກນິຈູດ ຢູ່ແຂວງຫຼວງພະບາງ

275

ເມື່ອວັນພຸດ ທີ 23 ເມສາ ເກີດເຫດແຜ່ນດິນໄຫວ ແຮງສັ່ນສະເທືອນ 3,7 ແມັກນິຈູດ ຢູ່ແຂວງຫຼວງພະບາງ ຖືເປັນຮອບ 2 ຂອງເດືອນເມສາ 2019 ເຊິ່ງກ່ອນໜ້ານີ້ ເກີດຢູ່ແຂວງໄຊຍະບູລີ ແຮງສັ່ນສະເທືອນ 2,1 ແມັກນິຈູດ.

ທ່ານ ອານຸລັກ ລາດຊະວົງ ວິຊາການໜ່ວຍງານຕິດຕາມແຜ່ນດິນໄຫວ ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໃຫ້ຮູ້ວ່າ: ຜ່ານການຕິດຕາມກວດກາລະອຽດຕໍ່ເຫດແຜ່ນດິນໄຫວໃນວັນທີ 23 ເມສາ ເວລາປະມານ 10: 05 ໂມງ ມີແຮງສັ່ນສະເທືອນ 3,7 ແມັກນິຈູດ ຄວາມເລິກລົງໄປໃຕ້ດິນ 10 ກິໂລແມັດ ຢູ່ເສັ້ນຂະໜານທີ 19.796 ອົງສາເໜືອ, ເສັ້ນແວງທີ 102.101 ອົງສາຕາເວັນອອກ, ຈຸດພິກັດຢູ່ຫ່າງຈາກບ້ານບວມພຸກ ນະຄອນຫຼວງພະບາງ ແຂວງຫຼວງພະບາງ ໄປທາງທິດຕາເວັນອອກສ່ຽງເໜືອປະມານ 7,5 ກິໂລແມັດ ແລະ ຫ່າງຈາກບ້ານໜອງແຫ້ວ 8,5 ກິໂລແມັດ.

ຢ່າງໃດກໍຕາມ, ສໍາລັບຄວາມຜົນເສຍຫາຍຂອງເຫດແຜ່ນດິນໄຫວແຕ່ລະຄັ້ງສ່ວນໃຫຍ່ແມ່ນເກີດຈາກ 3 ປັດໄຈ ເປັນຕົ້ນແມ່ນ: ຄວາມຮຸນແຮງຂອງການສັ່ນສະເທືອນ, ຄວາມເລິກຂອງຈຸດພິກັດ ແລະ ຊະນິດຂອງດິນໃນຈຸດພິກັດ.

ທ່ານໃຫ້ຮູ້ຕື່ມອີກວ່າ: ກ່ອນໜ້ານີ້ເຫດການແຜ່ນດິນໄຫວ ແມ່ນເກີດໃນວັນທີ 14 ເມສາ 2019 ເວລາ 19:39 ໂມງ ຢູ່ບ້ານສຳນຽນ ເມືອງໄຊຍະບູລີ ແຂວງໄຊຍະບູລີ ແຮງສັ່ນສະເທືອນ 2,1 ແມັກນິຈູດ, ຄວາມເລິກ 10 ກິໂລແມັດ ເຊິ່ງບໍ່ມີລາຍງານຜົນກະທົບຄວາມເສຍຫາຍແຕ່ຢ່າງໃດ.

ເພຈ໌ຂ່າວສານຫຼວງພະບາງເຊິ່ງເປັນສື່ທ້ອງຖິ່ນ ໄດ້ລາຍງານວ່າ: ທ່ານ ບຸນເຕັມ ດວງພະຈັນ ຮອງຂະແໜງການອຸຕຸນິຍົມ ແລະ ອຸທົກກະສາດ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງຫຼວງພະບາງ ລະບຸວ່າ: ຄວາມແຮງ 3,7 ແມັກນິຈູດ ແມ່ນຍັງຢູ່ໃນລະດັບຕໍ່າຈະບໍ່ມີຜົນເສຍຫາຍຫຍັງເກີດຂຶ້ນ, ລະດັບ 4 ແມັກນິຈູດ ຈະຮັບຮູ້ເຖິງແຮງສັ່ນສະເທືອນເລັກໜ້ອຍ, ສ່ວນລະດັບຮ້າຍແຮງແມ່ນ 5 – 7 ແມັກນິຈູດຂຶ້ນໄປ ເຊິ່ງຈະສົ່ງຜົນກະທົບມະຫາສານໃນຂົງເຂດດັ່ງກ່າວ. ສໍາລັບຈຸດເກີດເຫດປັດຈຸບັນໜ່ວຍງານທີ່ກ່ຽວຂ້ອງກໍາລັງກຽມລົງພື້ນທີ່ເພື່ອສໍາຫຼວດຫາສາເຫດດັ່ງກ່າວ.

ທ່ານ ສະເຫວີຍ ສີລາວັນ ຫົວໜ້າຫ້ອງການມໍລະດົກໂລກ ແຂວງຫຼວງພະບາງ ໃຫ້ຮູ້ວ່າ: ເຂດພື້ນທີ່ມໍລະດົກໂລກໃນເມືອງຫຼວງພະບາງ ຈຳນວນ 800 ເຮັກຕາ ບໍ່ໄດ້ຮັບຜົນກະທົບເພາະບໍ່ມີການສັ່ນສະເທືອນ.

ທາງດ້ານ ໜັງສືພິມເສດຖະກິດ – ການຄ້າ ໄດ້ລາຍງານວ່າ ການສໍາພາດຜ່ານໂທລະສັບເຖິງ ທ່ານ ບຸນເລີດ ນາຍບ້ານຫ້ວຍເທົາ ແລະ ທ່ານ ກູດ ກໍລະກົດ ອະດີດນາຍບ້ານລ້ອງສ້ານ ເມືອງຊຽງເງິນ ແຂວງຫຼວງພະບາງ ໄດ້ເວົ້າເປັນສຽງດຽວກັນວ່າ: ພາຍໃນບ້ານບໍ່ໄດ້ມີປາກົດການ ຫຼື ເຫດການສັ່ນສະເທືອນໃດໆທີ່ສົງໄສວ່າເປັນແຜ່ນດິນໄຫວ, ທຸກຢ່າງພາຍໃນບ້ານຍັງປົກກະຕິບໍ່ມີຫຍັງປ່ຽນແປງ.

ໃນໄລຍະຜ່ານມາສັງເກດເຫັນວ່າເຫດການແຜ່ນດິນໄຫວຢູ່ ສປປ ລາວ ແລະ ປະເທດໃກ້ຄຽງຈະເກີດຖີ່ຂຶ້ນເລື້ອຍໆ ເຊິ່ງບົ່ງບອກເຖິງສັນຍານໄພທໍາມະຊາດ. ສະນັ້ນ, ບັນດາໂຄງການກໍ່ສ້າງຕຶກອາຄານບ້ານເຮືອນ ຫຼື ໂຄງການຂະໜາດໃຫຍ່ຕ່າງໆທີ່ມີແຜນກໍ່ສ້າງ ຕ້ອງໄດ້ຄໍານຶງເຖິງບັນຫານີ້ເພາະສັງເກດວ່ານັບມື້ເຫັນປາກົດການແຜ່ນດິນໄຫວເກີດຖີ່ຂຶ້ນ ແລະ ທະວີ ຄວາມຮຸນແຮງເພີ່ມຂຶ້ນ.

Credit: Laoedaily