ຄຶກຄັກ! ເດີນຂະບວນພາເຫຼດເທສະການອີສເຕີ ໃນນະຄອນນິວຢອກ

250

ເມື່ອວັນອາທິດ ທີ 21 ເມສາ ຜ່ານມາ ຜູ້ຄົນຢ່າງຫຼວງຫຼາຍຕ່າງກໍ່ອອກມາຮ່ວມສະເຫຼີມສະຫຼອງເທສະການອີສເຕີ ເທສະການອັນສໍາຄັນຂອງຜູ້ທີ່ນັບຖືສາສະໜາຄຣິສ ກັນຢ່າງອົບອຸ່ນ ໜາແໜ້ນເຕັມໄປທົ່ວຖະໜົນຟິຟອະເວນິວ ນະຄອນນິວຢອກ ມີທັງປະຊາຊົນໃນພື້ນທີ່ ແລະ ນັກທ່ອງທ່ຽວຢ່າງຫຼວງຫຼາຍທີ່ຕັ້ງໃຈເດີນທາງມາເພື່ອຮ່ວມກິດຈະກຳນີ້ໂດຍສະເພາະ.

ສິ່ງທີ່ໜ້າສົນໃຈຂອງງານພາເຫຼດນີ້ ຄື “ເທສະການໝວກອີສເຕີ” ທີ່ຜູ້ຄົນຈະແຕ່ງຕົວທັນສະໄໝ ແລະ ໃສ່ໝວກທີ່ປະດັບປະດາຕົກແຕ່ງໃຫ້ສວຍງາມອອກມາຮ່ວມຍ່າງພາເຫຼດ ເຊິ່ງມາຈາກທໍານຽມການສວມໃສ່ເຄື່ອງນຸ່ງໃໝ່ ໃນວັນອີສເຕີ ທີ່ປະຕິບັດກັນມາຫຼາຍຮ້ອຍປີ ເພື່ອສື່ເຖິງການເລິ່ມຕົ້ນ ແລະ ການເກີດໃໝ່ ຕາມການຟື້ນຄືນຊີບຂອງພະເຍຊູ ຕົ້ນກໍາເນີດຂອງເທສະການນີ້ ຜະສົມຜະສານກັບປະເພນີການໃສ່ໝວກປົກຫົວຂອງຜູ້ຍິງຊາວຄຣິສ ທີ່ຢຶດຖືກັນມາແຕ່ບູຮານ.

ຂະບວນພາເຫຼດນີ້ ດັ້ງເດີມແມ່ນຈັດຂຶ້ນຫຼັງຈາກຊາວຄຣິສ ເຮັດພິທີທາງສາສະໜາແລ້ວສຳເລັດ ແຕ່ປັດຈຸບັນ ກາຍເປັນການສະເຫຼີມສະຫຼອງເທສະການອິສເຕີ ທີ່ຂ້ອນຂ້າງເປັນອິດສະຫຼະ ເປີດໂອກາດໃຫ້ປະຊາຊົນໄດ້ແຕ່ງຕົວສວຍງາມ ອວດຄວາມສ້າງສັນໃນການປະດັບປະດາຕົກແຕ່ງໝວກ ກາຍເປັນເທສະການແຫ່ງຄວາມສຸກ ສະນຸກສະໜານ ທີ່ເຮັດໃຫ້ຄົນຫຼາກຫຼາຍເຊື້ອຊາດ ແລະ ສາສະໜາໄດ້ອອກມາຮ່ວມສະເຫຼີມສະຫຼອງໄປນຳກັນ.