ເກີດແຜ່ນດິນໄຫວຮຸນແຮງ 6,3 ສະເທືອນນະຄອນຫຼວງມະນິລາ ເສຍຊີວິດແລ້ວ 5 ຄົນ

241

ເຫດແຜ່ນດິນໄຫວ ຂະໜາດ 6,3 ແມັກນິຈູດ ສັ່ນສະເທືອນເມືອງຫຼວງປະເທດຟິລິບປິນ ແລະ ຫຼາຍແຂວງຫຼາຍຮອບ ເມື່ອແລງວັນຈັນ ແຮງສັ່ນສະເທືອນຮຸນແຮງສ້າງຄວາມແຕກຕື່ນຕົກໃຈແກ່ປະຊາຊົນທີ່ຢູ່ເທິງອາຄານສູງ ໂດຍລາຍງານເບື້ອງຕົ້ນມີຜູ້ເສຍຊີວິດຢ່າງໜ້ອຍ 5 ຄົນ ຈາກອາຄານຫັກເພຕົກລົງມາທັບ.

ສໍານັກຂ່າວເອພີ, ຣອຍເຕີ ແລະ ເອເອັຟພີ ລາຍງານຈາກນະຄອນຫຼວງມະນິລາ ປະເທດຟິລິບປິນ ເມື່ອວັນຈັນ ທີ 22 ເມສາ ວ່າ ເກີດແຜ່ນດິນໄຫວວັດແທກແຮງສັ່ນສະເທືອນໄດ້ 6,3 ແມັກນິຈູດ ເມື່ອເວລາ 17:11 ໂມງ ຕາມເວລາທ້ອງຖິ່ນ ໂດຍຈຸດສູນກາງຢູ່ເລິກລົງໄປໃຕ້ດິນ 40 ກິໂລແມັດ ໃນເຂດເມືອງໂບເດກາ ປະມານ 60 ກິໂລແມັດ ທາງພາກຕາເວັນຕົກສຽງເໜືອຂອງນະຄອນຫຼວງມະນິລາ ຈາກລາຍງານຂອງສໍານັກງານສໍາຫຼວດທາງທໍລະນີວິທະຍາສະຫະລັດ (USGS: United States Geological Survey).

ທ່ານເຣນາໂຕ ໂຊລິດໍາ ຜູ້ອໍານວຍການສະຖາບັນແຜ່ນດິນໄຫວຟິລິບປິນ ກ່າວວ່າ ແຜ່ນດິນໄຫວຄັ້ງນີ້ ບໍ່ຮຸນແຮງພໍທີ່ຈະເຮັດໃຫ້ເກີດຄື້ນສຶນາມິໃນທະເລ ແຕ່ເຈົ້າໜ້າທີ່ເຜີຍວ່າແຮງສັ່ນສະເທືອນ ເຮັດໃຫ້ໄຟຟ້າດັບຊົ່ວຄາວ ໃນພື້ນທີ່ຂອງນະຄອນຫຼວງມະນິລາ ແລະ ອີກຫຼາຍແຂວງດິນ, ຫີນຈາກເທິງພູໄຫຼເຈື່ອນລົງມາຖົມຖະໜົນຫຼາຍສາຍ ແລະ ຈາກພາບຂ່າວປະຊາຊົນຫຼາຍໝື່ນຄົນທີ່ຢູ່ເທິງອາຄານສູງຂອງນະຄອນຫຼວງມະນິລາ ແລະ ເມືອງຕ່າງໆທີ່ຢູ່ໃກ້ຄຽງຟ້າວໜີລົງມາຢູ່ລຸ່ມ.

ທ່ານນາງລິເລຍ ພິເນດາ ຜູ້ວ່າການແຂວງປໍາປັງກາ ເຜີຍວ່າ ມີຜູ້ເສຍຊີວິດຈາກອາຄານທີ່ຫັກເພລົງມາທັບຢ່າງໜ້ອຍ 5 ຄົນ ໂດຍ 3 ຄົນທໍາອິດ ຢູ່ໃນເມືອງໂປຣັກ ສ່ວນອີກ 2 ຄົນ ຍິງສູງອາຍຸ ແລະ ຫຼານ ຢູ່ໃນເມືອງລູເບົາ ໄຟຟ້າດັບຈາກຜົນຂອງແຜ່ນດິນໄຫວ ເຮັດໃຫ້ເປັນອຸປະສັກຕໍ່ຄວາມພະຍາຍາມກູ້ໄພ ໃນຂະນະທີ່ຄວາມມືດຂອງຕອນຄໍ່າກໍາລັງມືດເຂົ້າມາ.