ຊາອຸດິອາຣະເບຍ – ຢູເອອີ ມອບເງິນມະຫາສານຊ່ວຍເຫຼືອຊູດານ

228

ປະເທດຊາອຸດິ ອາຣະເບຍ ແລະ ປະເທດສະຫະລັດ ອາຣັບເອມິເຣສ ມອບເງິນຊ່ວຍເຫຼືອ ລວມກັນ 3.000 ລ້ານໂດລາ (ຫຼື ກວ່າ 25 ພັນຕື້ກີບ) ໃຫ້ແກ່ປະເທດຊູດານ ລະຫວ່າງການມີກະແສຂ່າວວ່າສອງປະເທດ ກ່ຽວຂ້ອງກັບເຫດລັດທະປະຫານຄັ້ງຫຼ້າສຸດ ດ້ານການເຈລະຈາລະຫວ່າງກອງທັບກັບຝ່າຍປະຊາຊົນຍັງບໍ່ໄດ້ຂໍ້ສະຫຼຸບ.

ສໍານັກຂ່າວຕ່າງປະເທດລາຍງານຈາກນະຄອນຫຼວງຄາຣ໌ທູມ ປະເທດຊູດານ ເມື່ອວັນຈັນ ທີ 22 ເມສາ ວ່າ ລັດຖະບານຊາອຸດີອາຣະເບຍ ແລະ ສະຫະລັດ ອາຣັບເອມິເຣສ (ຢູເອອີ) ອອກຖະແຫຼງການຮ່ວມກັນເມື່ອວັນອາທິດ ຜ່ານມາ ເລື່ອງການມອບຄວາມຊ່ວຍເຫຼືອໃນທຸກດ້ານທີ່ຈໍາເປັນໃຫ້ແກ່ຊູດານເປັນມູນຄ່າລວມ 3.000 ລ້ານໂດລາ (ປະມານ 25.970 ຕື້ກີບ) ໂດຍແບ່ງເປັນງົບປະມານສະໜັບສະໜຸນ 500 ລ້ານໂດລາ (ປະມານ 4.320 ຕື້ກີບ) ເພື່ອສົ່ງເສີມສະພາບຄວາມຄ່ອງຕົວໃຫ້ແກ່ທະນາຄານຊູດານ ແລະ ທີ່ເຫຼືອອີກ 2.500 ລ້ານໂດລາ (ປະມານ 21.640 ຕື້ກີບ) ສຳລັບການຈັດສັນຄວາມຊ່ວຍເຫຼືອດ້ານມະຊຸດສະທຳ ບໍ່ວ່າຈະເປັນອາຫານ, ຢາປິ່ນປົວ ແລະ ເຊື້ອໄຟ.

ຢ່າງໃດກໍ່ຕາມ ຖະແຫຼງການຮ່ວມຂອງລັດຖະບານທັງສອງປະເທດບໍ່ໄດ້ລະບຸວ່າ ເງິນທັງໝົດຄື “ເງິນກູ້” ຫຼື “ເງິນຊ່ວຍເຫຼືອລ້າໆ” ເຊິ່ງເປັນກະແສຂ່າວທີ່ຍັງເຜີຍແຜ່ໄປທົ່ວໄປຊູດານ ວ່າ ທັງສອງປະເທດຢູ່ເບື້ອງຫຼັງ ການສະໜັບສະໜຸນກອງທັບຊູດານເຮັດລັດທະປະຫານ ລົ້ມອຳນາດອະດີດປະທານາທິບໍດີໂອມາ – ບາເຊຍ ອາຍຸ 75 ປີ ເຊິ່ງຄອງອໍານາດມາດົນເຖິງ 30 ປີ ເມື່ອວັນທີ 11 ເມສາ ທີ່ຜ່ານມາ ສະນັ້ນ ທັງສອງປະເທດຮ່ວມກັນຮຽກຮ້ອງຜ່ານຖະແຫຼງການ ວ່າ ທັງລັດຖະບານຣິຢາດ  ແລະ ລັດຖະບານຢູເອອີ ຫວັງເປັນຢ່າງຍິ່ງວ່າ ສະຖານະການໃນຊູດານຈະກັບຄືນສູ່ “ສະຖຽນລະພາບ” ແລະ ຂະບວນການຖ່າຍໂອນອໍານາດ “ຈະເປັນໄປດ້ວຍຄວາມສະຫງົບຮຽບຮ້ອຍ”.

ການເຈລະຈາ ລະຫວ່າງ ຄະນະຜູ້ແທນຂອງຝ່າຍຄ້ານ ແລະ ຝ່າຍຕໍ່ຕ້ານກອງທັບ ກັບ ຄະນະລັດທະປະຫານໃນນາມຄະນະມົນຕີດ້ານການຖ່າຍໂອນອໍານາດ (TMC) “ພົບກັບຄວາມລົ້ມເຫຼວ” ເນື່ອງຈາກທັງສອງຝ່າຍຍັງຕົກລົງກັນບໍ່ໄດ້ ໃນປະເດັນສໍາຄັນ ໂດຍຜູ້ແທນຝ່າຍຕໍ່ຕ້ານກ່າວຫາ ທີເອັມຊີ ຄື “ຜູ້ສືບທອດອໍານາດ” ຂອງບາເຊຍ ເຖິງວ່າ ທີເອັມຊີ ໄດ້ຢືນຢັນຈະຈັດການເລືອກຕັ້ງ ພາຍໃນ 2 ປີ ແລະລັດຖະບານຊຸດໃໝ່ຈະເປັນ “ລັດຖະບານພົນລະເມືອງ” ແຕ່ຍັງສະຫງວນທ່າທີໃນຕໍາແໜ່ງປະທານາທິບໍດີ.