ກຽມລົງມືກໍ່ສ້າງສາຍສົ່ງອ້ອມນະຄອນຫຼວງວຽງຈັນ

279

ພິທີວາງສີລາລືກໂຄງການກໍ່ສ້າງສາຍສົ່ງ 500/230 ກິໂລໂວນ ອ້ອມນະຄອນຫຼວງວຽງຈັນ ຈັດຂຶ້ນວັນທີ 19 ເມສາ 2019 ຢູ່ສະຖານີດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ໂດຍມີ ທ່ານ ຄໍາມະນີ   ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ບຸນປອນ ສີສຸລາດ ຄະນະປະຈໍາສະພາແຫ່ງຊາດ ປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ, ທ່ານ ນາງ ບຸນຄໍາ ວໍລະຈິດ ຮອງລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ທ່ານ Yu Jun ປະທານບໍລິສັດ China Electric Power Equipment and Technology Ltd ( CCPG ) ມີບັນດາການນໍາແຕ່ລະກະຊວງ, ພະແນກການ, ອົງການປົກຄອງທ້ອງຖິ່ນ ແລະ ແຂກຖືກເຊີນເຂົ້າຮ່ວມ.

ທ່ານ ບຸນອູ້ມ ສີວັນເພັງ ຜູ້ອໍານວຍການໃຫຍ່ລັດວິສາຫະກິດໄຟຟ້າລາວ ກ່າວວ່າ: ໃນຊຸມປີຜ່ານມາ ລັດວິສາຫະກິດໄຟຟ້າລາວ ໄດ້ສຸມຄວາມພະຍາຍາມ ແລະ ຕັ້ງໜ້າເຂົ້າໃນການຈັດຕັ້ງປະຕິບັດຍຸດທະສາດ ເພື່ອພັດທະນາອຸດສາຫະກໍາພະລັງງານໄຟຟ້າຕາມແນວທາງຫັນເປັນອຸດສາຫະກໍາ ແລະ ທັນສະໄໝ ຂອງພັກ ເຊິ່ງລວມມີບັນດາໂຄງການແຜນງານໃຫຍ່ໆທີ່ສໍາຄັນ ແລະ ເປັນລະບົບຄົບຊຸດ ສາມາດບັນລຸຜົນສໍາເລັດທີ່ມີລັກສະນະພົ້ນເດັ່ນເປັນພື້ນຖານທີ່ສໍາຄັນເຂົ້າໃນການພັດທະນາເສດຖະກິດ – ສັງຄົມຂອງຊາດ, ການແກ້ໄຂຄວາມທຸກຍາກຂອງປະຊາຊົນບັນດາເຜົ່າຢ່າງຕັ້ງໜ້າ, ໂຄງການກໍ່ສ້າງສາຍສົ່ງ 500/230 ກິໂລໂວນ ອ້ອມນະຄອນຫຼວງວຽງຈັນ ເປັນໂຄງການໜຶ່ງທີ່ນອນຢູ່ໃນແຜນພັດທະນາລະບົບໄຟຟ້າຂອງ ສປປ ລາວ ເພື່ອນໍາເອົາພະລັງງານຈາກບັນດາເຂື່ອນຕ່າງໆມາສະໜອງໄຟຟ້າໃຫ້ນະຄອນຫຼວງວຽງຈັນໃນປັດຈຸບັນ ແລະ ການຂະຫຍາຍຕົວໃນອະນາຄົດຂ້າງໜ້າໃຫ້ພຽງພໍ ແລະ ມີສະຖຽນລະພາບ. ນອກນັ້ນ, ກໍຍັງເປັນສາຍສົ່ງເຊື່ອມຕໍ່ກັບປະເທດໄທ ເພື່ອນໍາສົ່ງພະລັງງານອອກໄປສູ່ຕ່າງປະເທດອີກດ້ວຍ.

ໂຄງການດັ່ງກ່າວໄດ້ຜ່ານທີ່ຢູ່ໃນການຄຸ້ມຄອງຂອງ 4 ເມືອງ 1 ນະຄອນ ຄື: ເມືອງປາກງື່ມ, ໄຊທານີ, ໄຊເສດຖາ ແລະ ເມືອງຫາດຊາຍຟອງ ນະຄອນຫຼວງວຽງຈັນ. ສໍາລັບໜ້າວຽກ ປະກອບມີ: ພາກກໍ່ສ້າງສາຍສົ່ງ ແລະ ພາກກໍ່ສ້າງສະຖານີ ຄື: ພາກກໍ່ສ້າງສາຍສົ່ງມີ ກໍ່ສ້າງສາຍສົ່ງ 500 ກິໂລໂວນ ວົງຈອນຄູ່ຈາກສະຖານີດ່ານຊີ ຫາ ສະຖານີດົງໂພສີ ລວງຍາວ 53,5 ກິໂລແມັດ ເປັນລະບົບ 4 ສາຍຕໍ່ Phase ແລະ ມີສາຍສື່ສານ ແລະ ສາຍຫຼໍ່ຟ້າ ມີຂະໜາດ 36 Core ກໍ່ສ້າງສາຍສົ່ງ 230 ກິໂລໂວນ ວົງຈອນຄູ່ ຈາກສະຖານີນາບົງ ຫາ ສະຖານີດົງໂພສີ ລວງຍາວ 39 ກິໂລແມັດ ສ່ວນພາກກໍ່ສ້າງສະຖານີຂະຫຍາຍສະຖານີ 500 ກິໂລໂວນ ດ່ານຊີ 2 ເບ ຂະຫຍາຍສະຖານີ 500 ກິໂລໂວນ ນາບົງ 2 ເບ ຂະຫຍາຍສະຖານີ 230 ກິໂລໂວນ ນາບົງ 2 ເບ ຂະຫຍາຍສະຖານີ 230 ກິໂລໂວນ ດົງໂພສີ 2 ເບ ລວມທັງຕິດຕັ້ງໝໍ້ແປງກໍາລັງ 200/200/60 MVA ( 230/115/22Kv ) ຈໍານວນ 2 ໜ່ວຍ ກໍ່ສ້າງ 2 ເບ 115 ກິໂລໂວນ ອອກຈາກໝໍ້ແປງກໍາລັງ 2 ເບ ຢູ່ສະຖານີດົງໂພສີ ແລະ ພາກ 22 ກິໂລໂວນ ຕິດຕັ້ງ Shunt Reactor ຈໍານວນ 4 ຊຸດ ຢູ່ສະຖານີດົງໂພສີ. ພວກເຮົາມີຄວາມເຊື່ອໝັ້ນວ່າການກໍ່ສ້າງໂຄງການດັ່ງກ່າວຈະເປັນການປະກອບສ່ວນອັນສໍາຄັນເຂົ້າໃນການສືບຕໍ່ພັດທະນາອຸດສາຫະກໍາໄຟຟ້າໃຫ້ຂະຫຍາຍຕົວຕາມແນວທາງຫັນເປັນອຸດສາຫະກໍາ ແລະ ທັນສະໄໝຢູ່ປະເທດເຮົາ ຕາມທິດທາງທີ່ໄດ້ກໍານົດໄວ້ໃນມະຕິກອງປະຊຸມໃຫຍ່ ຄັ້ງທີ X ຂອງພັກ ພັດທະນາຊີວິດການເປັນຢູ່ຂອງປະຊາຊົນບັນດາເຜົ່າໃຫ້ນັບມື້ດີຂຶ້ນ. ໂອກາດນີ້ ທ່ານ ຄໍາມະນີ ອິນທິລາດ ໄດ້ຮຽກຮ້ອງມາຍັງຄະນະນໍາລັດວິສາຫະກິດໄຟຟ້າລາວ ຜູ້ຮັບເໝົາກໍ່ສ້າງ ບໍລິສັດ CCPG ພ້ອມດ້ວຍພະນັກງານຊ່ຽວຊານວິຊາການ ແລະ ກໍາມະກອນທຸກໆຄົນ ຈົ່ງໄດ້ສືບຕໍ່ເສີມຂະຫຍາຍມູນເຊື້ອອັນດີເດັ່ນ, ຍົກສູງມີ ຄວາມຫ້າວຫັນ, ເພີ່ມທະວີຄວາມເອົາໃຈໃສ່ໃນການກໍ່ສ້າງໂຄງການນີ້ໃຫ້ດໍາເນີນໄປຕາມມາດຕະຖານເຕັກນິກຂອງໄຟຟ້າລາວ ກໍຄືສາກົນ ແລະ ຕ້ອງຮັບປະກັນໃຫ້ເກີດປະສິດທິຜົນສູງສຸດຕໍ່ປະເທດຊາດ ໂດຍສະເພາະກໍແມ່ນພໍ່ – ແມ່ພີ່ນ້ອງປະຊາຊົນຊາວນະຄອນຫຼວງວຽງຈັນ.