ວ່າທີ່ຜູ້ນໍາຄົນໃໝ່ຢູເຄຣນ ໃຫ້ຄໍາໝັ້ນ ຈະສ້າງຄວາມປ່ຽນແປງໃຫ້ກັບປະເທດ

207

ທ່ານໂວໂລດິເມຍ ເຊເລນສກີ້ ອະດີດນັກສະແດງເຊິ່ງຜັນຕົວມາຫຼິ້ນການເມືອງ ແລະ ສ້າງປະວັດສາດຊະນະການເລືອກຕັ້ງປະທານາທິບໍດີຮອບຕັດສິນດ້ວຍຄະແນນສຽງ “ຊະນະຂາດລອຍ” ໂດຍໃຫ້ຄໍາໝັ້ນສັນຍາ “ຈະສ້າງຄວາມປ່ຽນແປງ” ທີ່ໜ້າຈະໝາຍເຖິງການຈັດການຄວາມສໍາພັນກັບປະເທດຣັສເຊຍດ້ວຍ.

ສໍານັກຂ່າວຕ່າງປະເທດລາຍງານຈາກນະຄອນຫຼວງຄຽບ ປະເທດຢູເຄຣນ ເມື່ອວັນຈັນ ທີ 22 ເມສາ ວ່າ ທ່ານໂວໂລດິເມຍ ເຊເລນສກີ້ ອະດີດນັກສະແດງ ອາຍຸ 41 ປີ ເຊິ່ງຜັນຕົວມາຫຼິ້ນການເມືອງດ້ວຍການລົງສະໝັກຮັບເລືອກຕັ້ງປະທານາທິບໍດີ ໃນນາມພັກເພື່ອປະຊາຊົນ ໄດ້ປາໄສລະຫວ່າງກາງກຸ່ມຜູ້ສະໜັບສະໜຸນໃນສະຖານທີ່ທຳການຂອງພັກ ຫຼັງການນັບຄະແນນຢ່າງບໍ່ເປັນທາງການ ລະບຸວ່າ ເຊເລນສກີ້ ສາມາດເອົາຊະນະປະທານາທິບໍດີເປໂຕຣ ໂປໂຣເຊນໂກ ຜູ້ນໍາຄົນປັດຈຸບັນ ອາຍຸ 53 ປີ ເຊິ່ງລົງສະໝັກໃນນາມອິດສະຫຼະໄປຢ່າງຂາດລອຍ ໃນການເລືອກຕັ້ງຮອບຕັດສິນ ເຊິ່ງມີຂຶ້ນເມື່ອວັນອາທິດ ດ້ວຍຄະແນນສຽງສະໜັບສະໜຸນ ເຖິງ 73,06% ຕໍ່ 24,60% ສ່ວນຈຳນວນຜູ້ອອກມາໃຊ້ສິດເລືອກຕັ້ງແມ່ນ 62.07% ບໍ່ແຕກຕ່າງກັນຫຼາຍຈາກການເລືອກຕັ້ງຮອບທຳອິດ ເມື່ອວັນທີ 31 ມີນາ ຜ່ານມາ.

Volodymyr Zelenskiy
ທ່ານໂວໂລດິເມຍ ເຊເລນສກີ້ ວາທີ່ປະທານາທິບໍດີຄົນຕໍ່ໄປ

ທັງນີ້ ເຊເລນສກີ້ ເຊິ່ງມີກໍານົດເຂົ້າຮັບຕໍາແໜ່ງຢ່າງເປັນທາງການ ໃນວັນທີ 31 ພຶດສະພາ ນີ້ ຢືນຢັນວ່າຕົນຈະບໍ່ເຮັດໃຫ້ປະຊາຊົນທຸກຄົນຕ້ອງຜິດຫວັງ ບໍ່ວ່າຈະເປັນຝ່າຍທີ່ລົງຄະແນນໃຫ້ກັບຕົນ ຫຼື ບໍ່ກໍ່ຕາມ ເພາະຕົນຈະເປັນ “ຕົວແທນໃຫ້ກັບຊາວຢູເຄຣນທຸກຄົນ” ແລະ ຄະແນນສຽງຈາກຊາວຢູເຄຣນທີ່ມອບໃຫ້ນັ້ນ ສະທ້ອນໃຫ້ເຫັນວ່າ “ທຸກສິ່ງເປັນໄປໄດ້ ຫຼັງຈາກໝົດຍຸກສະຫະພາບໂຊວຽດ” ເຊິ່ງຫຼາຍຝ່າຍຕີຄວາມວ່າ ເປັນການ “ສົ່ງສັນຍານ” ເຖິງຣັສເຊຍທີ່ ເຊເລນສກີ້ ກ່າວຕະຫຼອດໄລຍະການແຄມເປນຫາສຽງ ວ່າ ຕົນຕ້ອງການເຈລະຈາ “ຢ່າງປະນີປະນອມ” ກັບລັດຖະບານມອສໂກ ກ່ຽວກັບສະຖານະການທັງໃນໄຄຣເມຍ ແລະ ພາກຕາເວັນອອກຂອງຢູເຄຣນ ທີ່ສົ່ງຜົນໃຫ້ຄວາມສໍາພັນລະດັບທະວິພາຄີຢູ່ໃນພາວະຕຶງຄຽດ ຕັ້ງແຕ່ປີ 2014 ເຊິ່ງບັນດານັກວິເຄາະເບິ່ງເຫັນວ່າ ເຊເລນສກີ້ ໜ້າຈະອາໄສ “ຄວາມຊ່ວຍເຫຼືອຈາກພາຍນອກ” ໃນການເປັນຝ່າຍເຂົ້າຫາຣັສເຊຍ ດ້ານ ທ່ານເປໂຕຣ ໂປໂຣເຊນໂກ ກ່າວຍອມຮັບການແພ້ເລືອກຕັ້ງ ແລະ ສະແດງຄວາມຍິນດີກັບ ເຊເລນສກີ້ ແຕ່ຖິ້ມທ້າຍວ່າ ຕົນເຊື່ອວ່າ ຣັສເຊຍ “ຕ້ອງພໍໃຈ” ກັບຜົນການເລືອກຕັ້ງຜູ້ນໍາຢູເຄຣນ ຄັ້ງນີ້.

Ukrainian President Petro Poroshenko
ປະທານາທິບໍດີເປໂຕຣ ໂປໂຣເຊນໂກ ຜູ້ນຳຄົນປັດຈຸບັນ

ຂະນະທີ່ ທຳນຽບເຄມລິນໄດ້ອອກຖະແຫຼງການກ່ຽວກັບຜົນການເລືອກຕັ້ງປະທານາທິບໍດີຢູເຄຣນ ໃນຄັ້ງນີ້ ວ່າ ມັນສະທ້ອນເຖິງຄວາມຕ້ອງການ ແລະ ຄວາມຫວັງຢ່າງແທ້ຈິງຂອງປະຊາຊົນ ວ່າ ຢູເຄຣນ ຈະປ່ຽນແປງ “ໄປໃນທາງທີ່ດີຂຶ້ນ” ແລະ ຫຼຸດພົ້ນຈາກຂົ້ວອໍານາດເກົ່າ ອີກປະການໜຶ່ງ ກ່ອນຜັນຕົວເຂົ້າສູ່ເສັ້ນທາງການເມືອງ ຂອງທ່ານເຊເລນສກີ້ ເຄີຍຮັບບົດບາດສະແດງເປັນປະທານາທິບໍດີຢູເຄຣນ ໃນຮູບເງົາແນວຕະຫຼົກ ແບບສຽດສີສັງຄົມ ແລະ ກໍ່ເປັນຜົນງານທີ່ສ້າງຊື່ສຽງໃຫ້ກັບຕົນດ້ວຍ.

Ukrainian comedian and presidential candidate Volodymyr Zelenskiy, center right, and his wife Olena Zelenska, center left, greet their supporters at his headquarters as the portrait of Ukrainian President Petro Poroshenko is seen on a TV screen, right, after the second round of presidential elections in Kiev, Ukraine, Sunday, April 21, 2019. Ukrainians voted on Sunday in a presidential runoff as the nation’s incumbent leader struggles to fend off a strong challenge by a comedian who denounces corruption and plays the role of president in a TV sitcom. (AP Photo/Vadim Ghirda)