ສຣີລັງກາ ປະກາດ ‘ເຄີຟິວ’ ປິດບໍລິການໂຊຊຽວທຸກດ້ານ ຫຼັງເກີດເຫດກໍ່ການຮ້າຍ

210

ມືລະເບີດຂ້າຕົວຕາຍມີສ່ວນກ່ຽວຂ້ອງຢ່າງໜ້ອຍ 2 ເຫດການໂຈມຕີໂບດ ແລະ ໂຮງແຮມ ໃນປະເທດສຣີລັງກາ ເມື່ອເຊົ້າວັນອາທິດ ທີ່ຜ່ານມາ ພາກຊີວິດປະຊາຊົນໄປກວ່າ 200 ຄົນ ລັດຖະບານຕ້ອງປະກາດໃຊ້ເຄີຟິວຈົນກວ່າສະຖານະການຈະດີຂຶ້ນ.

ສໍານັກຂ່າວເອເອັຟພີລາຍງານຈາກນະຄອນຫຼວງໂຄລຳໂບ ປະເທດສຣີລັງກາ ເມື່ອວັນອາທິດ ທີ 21 ເມສາ ວ່າ ແຫຼ່ງຂ່າວຂອງຕໍາຫຼວດສຣີລັງກາ ໄດ້ເປີດເຜີຍວ່າ ເຫດລະເບີດ ຄັ້ງທີ 8 ເກີດຂຶ້ນທີ່ເຮືອນຫຼັງໜຶ່ງໃນເຂດຊານເມືອງ ທາງພາກເໜືອຂອງນະຄອນຫຼວງໂຄລຳໂບ ເຊິ່ງເກີດຈາກມືລະເບີດຂ້າຕົວຕາຍລາຍໜຶ່ງ ເຊິ່ງໄດ້ຈູດຊະນວນລະເບີດປີດຊີວິດຕົວເອງ ຂະນະທີ່ຕໍາຫຼວດລະດົມກໍາລັງເຂົ້າກວດຄົ້ນແຮງລະເບີດ ນອກຈາກຈະຂ້າຊີວິດຕົວມືລະເບີດແລ້ວ ຍັງເຮັດໃຫ້ຊັ້ນສອງຂອງອາຄານເຮືອນຫຼັງດັ່ງກ່າວເປ້ເພຖະຫຼົ່ມລົງມາ ມີຕໍາຫຼວດເສຍຊີວິດ 3 ຄົນ.

ສ່ວນເຈົ້າໜ້າທີ່ໂຮງແຮມຊິນນາມອນ ແກຣນ ໜຶ່ງໃນສາມຂອງໂຮງແຮມຫຼູ ຕັ້ງຢູ່ໃນນະຄອນຫຼວງໂຄລຳໂບ ທີ່ຖືກໂຈມຕີດ້ວຍລະເບີດເປີດເຜີຍວ່າ ເປັນລະເບີດທີ່ເກີດຈາກມືລະເບີດຂ້າຕົວຕາຍຈູດຊະນວນລະເບີດໂຈມຕີ ຂະນະທີ່ມີຄົນຢູ່ໃນຫ້ອງອາຫານຂອງໂຮງແຮມ.

ຍັງບໍ່ມີກຸ່ມໃດອອກມາປະກາດອ້າງຄວາມຮັບຜິດຊອບເຫດໂຈມຕີດ້ວຍລະເບີດຕໍ່ເນື່ອງຄັ້ງທີ່ຮຸນແຮງທີ່ສຸດໃນປະເທດສຣີລັງກາ ນັບຕັ້ງແຕ່ສິ້ນສຸດສົງຄາມກາງເມືອງ ເມື່ອ 10 ປີກ່ອນ ຈໍານວນຜູ້ເສຍຊີວິດເພິ່ມຂຶ້ນເປັນ 207 ຄົນແລ້ວ ສ່ວນ ທ່ານ ຣຸວັນ ວິຈີວາດິນີ ລັດຖະມົນຕີກະຊວງປ້ອງກັນປະເທດສຣີລັງກາ ຖະແຫຼງການວ່າ ລັດຖະບານສຣີລັງກາ ໄດ້ປະກາດສະຖານະການເຄີຟິວ (ຄໍາສັ່ງຫ້າມອອກນອກເຄຫະສະຖານໃນຍາມວິການ) ໂດຍໃຫ້ມີຜົນໃນທັນທີ ແລະ ຈະບັງຄັບໃຊ້ໄປຈົນກວ່າທາງການຈະຈັດການບັນຫາຕ່າງໆໄດ້ຮຽບຮ້ອຍ ນອກຈາກນັ້ນ, ລັດຖະບານຍັງໄດ້ສັ່ງປິດໃຫ້ບໍລິການເຄືອຂ່າຍສັງຄົມອອນໄລນ໌ຕ່າງໆ ແລະ ແອບພຣິເຄຊັ່ນຂ່າວສານເຊັ່ນ: ເຟັສບຸ໊ກ, ວັອສແອບ ໃນປະເທດສຣີລັງກາ ເພາະກັງວົນວ່າຈະເປັນເຄື່ອງມືເພື່ອເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງ ແລະ ຂ່າວລື.

ດ້ານປະຕິກິລິຍາຂອງຜູ້ນໍາຈາກທົ່ວໂລກ ໄດ້ອອກມາປະນາມການໂຈມຕີດ້ວຍລະເບີດຕໍ່ເນື່ອງ ໃນປະເທດສຣີລັງກາ ເຊິ່ງກໍ່ມີຊາວຕ່າງຊາດເສຍຊີວິດດ້ວຍ ເລິ່ມທີ່ປະທານາທິບໍດີໂດນັລ ທຣຳ ຂອງສະຫະລັດ ໄດ້ກ່າວສະແດງຄວາມເສຍໃຈຢ່າງສຸດຊຶ້ງ, ສົມເດັດພະສັນທະປາປາຟຣານຊິສ ປະມຸກແຫ່ງສາສະໜາໂຣມັນຄາທໍລິກ ພະອົງໄດ້ກ່າວວ່າ ເມື່ອຮູ້ຂ່າວຮ້າຍທີ່ເກີດຂຶ້ນທີ່ສຣີລັງກາ ແລະ ຂໍສົ່ງຄວາມຮັກໄປເຖິງຊຸມຊົນຄິສຕຽນ ທີ່ຖືກໂຈມຕີ ຂະນະທີ່ກຳລັງຮວມຕົວກັນສວດມົນໃນວັນອີສເຕີ ແລະ ເຫຍື່ອຜູ້ເຄາະຮ້າຍໃນເຫດທີ່ຮ້າຍແຮງ, ທ່ານນາຍົກລັດຖະມົນຕີເທເຣຊາ ເມ ແຫ່ງອັງກິດ ກ່າວວ່າຕົກໃຈກັບເຫດການທີ່ເກີດຂຶ້ນ ແລະ ຈະຢືນຄຽງຂ້າງໄປກັບສຣີລັງກາ ຕາມມາດ້ວຍ ທ່ານນາຍົກລັດຖະມົນຕີສະກັອດ ມໍຣິສສັນ ຂອງອົສຕຣາລີ, ນາຍົກລັດຖະມົນຕີຈາຊິນດາ ອາເດີນ ແຫ່ງນິວຊີແລນ ແລະ ຜູ້ນໍາສາສະໜາແຄທໍທິກ ໃນເຢຣູຊາເລັມ ປະເທດອິສຣາເອລ ກໍ່ອອກມາປະນາມການໂຈມຕີຄັ້ງນີ້ເຊັ່ນກັນ.

A Christian woman lights a candle at a vigil for the for the victims of bomb explosions in churches and hotels in Sri Lanka, in Peshawar, Pakistan, Sunday, April 21, 2019. (AP Photo/Mohammad Sajjad)