ນັກວິໄຈຂຸດພົບຊາກຟອສຊິລ ສິງໂຕໃຫຍ່ ເມື່ອ 23 ລ້ານປີກ່ອນ ທີ່ປະເທດເຄນຢາ

489

ທີມນັກວິໄຈເປີດເຜີຍການຂຸດພົບຊາກຟອສຊິລກະດູກສິງໂຕຂະໜາດໃຫຍ່ທີ່ເຄີຍໃຊ້ຊີວິດຢູ່ໃນທົ່ງຫຍ້າປ່າກວ້າງເຊິ່ງເປັນປະເທດເຄນຢາ ໃນປັດຈຸບັນ ເມື່ອກວ່າ 20 ລ້ານປີກ່ອນ ນັບເປັນສັດລ້ຽງລູກດ້ວຍນົມປະເພດກິນເນື້ອຂະໜາດໃຫຍ່ທີ່ສຸດທີ່ເຄີຍຄົ້ນພົບ.

ສໍານັກຂ່າວເອເອັຟພີລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນພະຫັດ ທີ 18 ເມສາ ວ່າ ທີມນັກວິໄຈຈາກມະຫາວິທະຍາໄລດຸ໊ກ ແລະ ມະຫາວິທະຍາໄລໂອໄຮໂອ ສະຫະລັດ ອາເມຣິກາ ຂຸດຄົ້ນພົບກາມດ້ານລຸ່ມ, ແຂ້ວ ແລະ ກະດູກສ່ວນອື່ນໆ ຂອງສັດສາຍພັນໃໝ່ ຊິມບາຄຸບວາ ຄູໂຕກາອາຟຣິກາ ເຊິ່ງເປັນພາສາສະວາຮິລີ ທີ່ໝາຍເຖິງ “ສິງໂຕອາຟຣິກາຂະໜາດໃຫຍ່”.

ຈາກການຄິດຄໍານວນສິງໂຕໃຫຍ່ຕົວນີ້ ມີນໍ້າໜັກ ປະມານ 1.500 ກິໂລກຣາມ ແລະ ອາດລ່າສັດອື່ນໆເປັນອາຫານ ລວມເຖິງສັດຄ້າຍຄືກັບຊ້າງ ທີ່ມີຊີວິດຢູ່ໃນຍຸກດຽວກັນ.

ທ່ານແມັດທິວ ບອນ ນັກວິໄຈຂອງມະຫາວິທະຍາໄລດຸ໊ກ ກ່າວວ່າ ຈາກຂະໜາດຂອງແຂ້ວທີ່ຂຸດພົບ ສິງໂຕຊິມບາຄຸບວາ ມີຂະໜາດຮູບຮ່າງໃຫຍ່ກວ່າສິງໂຕໃນປັດຈຸບັນຫຼາຍ ແລະ ອາດຈະໃຫຍ່ກວ່າໝີຂາວຂົ້ວໂລກ.

ທີມນັກວິໄຈ ເຊິ່ງຕີພິມລາຍງານການຄົ້ນພົບລົງໃນວາລະສານ Vertebrate Paleontology ຊິມບາຄຸບວາ ມີຊີວິດຢູ່ໃນດິນແດນທີ່ເປັນປະເທດເຄນຢາໃນປັດຈຸບັນ ແຄມຝັ່ງມະຫາສະມຸດອິນເດຍ ທາງພາກຕາເວັນອອກຕອນກາງຂອງທະວີບອາຟຣິກາ ເມື່ອປະມານ 23 ລ້ານປີກ່ອນ ເຊິ່ງເປັນຍຸກສໍາຄັນໃນວິວັດທະນາການຂອງສັດລ້ຽງລູກດ້ວຍນົມທີ່ກິນເນື້ອສັດອື່ນເປັນອາຫານ.

ທີມນັກວິໄຈເຜີຍອີກວ່າ ການຄົ້ນພົບຈະຊ່ວຍໄຂປິດສະໜາໄລຍະວິວັດທະນາການຫຼາຍຮ້ອຍລ້ານປີຂອງສັດນັກລ່າ ແລະ ເຫຍື່ອ ໃນໄລຍະສິ້ນສຸດຍຸກພາລີໂອຈິນ ເຊິ່ງເປັນໄລຍະເວລາທີ່ສັດລ້ຽງລູກດ້ວຍນົມເຕີບໃຫຍ່ ຈາກສັດປະເພດໃຊ້ແຂ້ວຂະໜາດນ້ອຍແຫ້ນກິນກາຍເປັນສັດຂະໜາດໃຫຍ່ຫຼາກຫຼາຍສາຍພັນ.