ບັອດສະວານາ ເຜີຍໂສມ ‘ບລູ ໄດມອນ’ ເມັດໃຫຍ່ທີ່ສຸດເທົ່າທີ່ເຄີຍຂຸດພົບ

241

ບໍລິສັດອັນຍະມະນີ ໂອກາວັງໂກ ໄດມອນ ຂອງລັດຖະບານບັອດສະວານາ ເຜີຍໂສມເພັດສີຟ້ານ “ບລູ ໄດມອນ” ເມັດໃຫຍ່ທີ່ສຸດເທົ່າທີ່ເຄີຍຂຸດພົບ ໃນປະເທດທາງພາກໃຕ້ຂອງທະວີບອາຟຣິກາ.

ສໍານັກຂ່າວເອເອັຟພີລາຍງານຈາກນະຄອນຫຼວງກາໂບໂຣເນ ປະເທດບັອດສະວານາ ເມື່ອວັນພະຫັດ ທີ 18 ເມສາ ວ່າ ຖະແຫຼງການຂອງບໍລິສັດໂອກາວັງໂກ ໄດມອນ ກ່າວວ່າ ເພັດສີຟ້າ ຂະໜາດນໍ້າໜັກ 20,46 ກະລັດ ຖືເປັນໜຶ່ງໃນເພັດທີ່ຫາຍາກທີ່ສຸດໃນໂລກ ແລະ ເພັດເມັດນີ້ຈັດຢູ່ໃນລະດັບເພັດທີ່ງາມທີ່ສຸດ ແລະ ດີທີ່ສຸດຕະຫຼອດການໃນບັນດາ ບລູ ໄດມອນ ທັງໝົດ ເທົ່າທີ່ເຄີຍມີການຂຸດພົບທົ່ວໂລກ.

ເພັດຮູບຊົງໄຂ່ເມັດນີ້ ຖືກຕັ້ງຊື່ວ່າ ໂອກາວັງໂກ ບລູ (The Okavango Blue) ເພື່ອເປັນກຽດໃຫ້ແກ່ ໂອກາວັງໂກ ເດລຕາ ພື້ນທີ່ຮາບລຸ່ມແຄມແມ່ນໍ້າທາງພາກເໜືອຂອງບັອດສະວານາ.

ທ່ານມາຄັສ ເຕ ຮາ ກໍາມະການຜູ້ຈັດການບໍລິສັດໂອກາວັງໂກ ໄດມອນ ໄດ້ກ່າວວ່າ ເປັນເລື່ອງແປກ ແລະ ໜ້າເຫຼືອເຊື່ອທີ່ຂຸດຄົ້ນພົບເພັດນໍ້າງາມ ແລະ ມີຄວາມໂດດເດັ່ນເຊັ່ນນີ້ ໃນບັອດສະວານາ ຖືເປັນການຄົ້ນພົບຄັ້ງດຽວໃນຊີວິດ ມັນຫາຍາກພໍໆກັບການຫາດາວດວງໃດດວງໜຶ່ງໃນທາງຊ້າງເຜືອກ.

ບັອດສະວານາເປັນໜຶ່ງໃນປະເທດຜູ້ຜະລິດເພັດລາຍໃຫຍ່ທີ່ສຸດຂອງໂລກ ເພັດເປັນແຫຼ່ງລາຍໄດ້ຫຼັກທີ່ສາມາດສ້າງລາຍໄດ້ເຂົ້າປະເທດ ແລະ ຄອບຄອງສ່ວນແບ່ງປະມານ 80% ຂອງສິນຄ້າທີ່ສົ່ງອອກທັງໝົດ.

Picture: Okavango Diamond Company