ທົ່ວປະເທດເສຍຊີວິດ 37 ຄົນ ໃນ 5 ວັນປີໃໝ່ລາວ

295

ປີໃໝ່ລາວທຸກປີຫຼາຍຄອບຄົວກໍມີ ຄວາມສຸກສະໜຸກສະໜານກັບການສະເຫຼີມສະຫຼອງວັນດັ່ງກ່າວ ກົງກັນຂ້າມມີຫຼາຍຄອບຄົວຕ້ອງພົບກັບຄວາມໂສກເສົ້າເພາະສູນເສຍຄົນທີ່ຮັກໃນຄອບຄົວ ເພາະອຸບັດເຫດເຊັ່ນດຽວກັບປີນີ້ ສະເພາະ 5 ວັນ ໃນບຸນປີໃໝ່ລາວເກີດອຸບັດເຫດທັງໝົດ 303 ລາຍ, ເສຍຊີວິດ 37 ຄົນ ເສຍຊີວິດຫຼາຍກ່ອນໝູ່ແມ່ນ ແຂວງວຽງຈັນ ຮອງລົງມາເປັນນະຄອນຫຼວງວຽງຈັນ.

ໃນວັນທີ 18 ເມສາ 2019 ຜ່ານມາ ທີ່ກົມໃຫຍ່ຕຳຫຼວດ, ກະຊວງປ້ອງກັນ ຄວາມສະຫງົບ ໄດ້ມີພິທີຖະແຫຼງຂ່າວສະຫຼຸບອຸບັດເຫດທີ່ເກີດຂຶ້ນໃນໄລຍະສະຫຼອງບຸນປີໃໝ່ລາວ ພ.ສ 2562 ໂດຍການຖະແຫຼງຮ່ວມຂອງ ທ່ານ ພັນໂທ ກົງສີ ສຸວັນນະຕຸ້ມ ຫົວໜ້າກົມຕຳຫຼວດຈະລາຈອນ, ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ ແລະ ທ່ານ ພັນໂທ ເພັງສະຫວັນ ທຳມາບູນ ຫົວໜ້າ ພະແນກຕຳຫຼວດຈະລາຈອນ ປກສນະຄອນຫຼວງວຽງຈັນ ພ້ອມດ້ວຍບັນດາສື່ມວນຊົນເຂົ້າຮ່ວມ.

ທ່ານ ພັນໂທ ກົງສີ ສຸວັນນະຕຸ້ມ ໄດ້ກ່າວວ່າ: ໃນໄລຍະການສະເຫຼີມສະຫຼອງປີໃໝ່ລາວ ພ.ສ 2562 ນັບແຕ່ວັນທີ 13 – 17 ເມສາ 2019 ທົ່ວປະເທດມີອຸບັດເຫດເກີດຂຶ້ນທັງໝົດ 303 ລາຍ ເພີ່ມຂຶ້ນ 16 ລາຍ; ພາຫະນະເປ່ເພ 503 ຄັນ ເພີ່ມຂຶ້ນ 13 ຄັນ, ຄົນໄດ້ຮັບບາດເຈັບ 532 ຄົນ ເພີ່ມຂຶ້ນ 04 ຄົນ, ແລະ ຄົນເສຍຊີວິດ 37 ຄົນ ຫຼຸດລົງ 2 ຄົນ ເມື່ອທຽບໃສ່ປີຜ່ານມາ.

ແຂວງທີ່ເກີດອຸບັດເຫດຫຼາຍກວ່າໝູ່ແມ່ນແຂວງຈຳປາສັກ ຈຳນວນ 45 ລາຍ, ຮອງລົງມາ ແຂວງສະຫວັນນະເຂດ ຈຳນວນ 35 ລາຍ ແລະ ນະຄອນຫຼວງວຽງຈັນ 31 ລາຍ. ສະເພາະແຂວງທີ່ມີຜູ້ເສຍຊີວິດຫຼາຍກວ່າໝູ່ແມ່ນແຂວງວຽງຈັນ ຈຳນວນ 09 ລາຍ ຕາມມາດ້ວຍ ນະຄອນຫຼວງວຽງຈັນ ຈຳນວນ 05 ຄົນ ແລະ ແຂວງສະຫວັນນະເຂດ, ສາລະວັນ, ຫົວພັນ ແຂວງລະ 03 ຄົນ.

ໃນນັ້ນ, ມີພາຫະນະທີ່ເກີດອຸບັດເຫດຫຼາຍແມ່ນລົດຈັກຕຳລົດຈັກ ຈຳນວນ 104 ລາຍ, ເສຍຊີວິດ 13 ຄົນ, ລົດຈັກຕຳລົດໃຫຍ່ ຈຳນວນ 71 ລາຍ, ເສຍຊີວິດ 07 ລາຍ ແລະ ລົດຈັກລົ້ມເອງ 19 ລາຍ, ເສຍຊີວິດ 04 ຄົນ.

ເສັ້ນທາງທີ່ພາເກີດອຸບັດເຫດ ມີເສັ້ນທາງຂອງແຂວງ, ເມືອງ ແລະ ເສັ້ນທາງອື່ນໆ 169 ລາຍ, ເສັ້ນທາງ 13 ເໜືອ ຈໍານວນ 78 ລາຍ ແລະ ເສັ້ນທາງ 13 ໃຕ້ ຈໍານວນ 56 ລາຍ. ນອກນັ້ນ, ຍັງມີຂົງເຂດທີ່ເກີດອຸບັດເຫດ ເຊັ່ນ: ເທສະບານ 245 ລາຍ, ເສຍຊີວິດ 11 ຄົນ, ນອກເທສະບານ 58 ລາຍ, ເສຍຊີວິດ 26 ຄົນ.

ສຳລັບສາເຫດທີ່ພາໃຫ້ເກີດອຸບັດເຫດແມ່ນບັນດານັກຂັບຂີ່ລົດໄວ ມີຈຳນວນ 133 ກໍລະນີ, ເສຍຊີວິດ 16 ຄົນ, ດື່ມສິ່ງມຶນເມົາ ມີຈຳນວນ 120 ກໍລະນີ, ເສຍຊີວິດ 13 ລາຍ, ປ່ຽນທິດທາງ 15 ກໍລະນີ, ເສຍຊີວິດ 05 ຄົນ, ບໍ່ໄດ້ກວດກາສະພາບເຕັກນິກ ຈຳນວນ 15 ກໍລະນີ, ເສຍຊີວິດ 03 ຄົນ, ຊີງບໍ່ຮັບປະກັນ 10 ກໍລະນີ ແລະ ບໍ່ປ່ອຍສິດ 10 ກໍລະນີ.

ນອກຈາກນັ້ນ, ຍັງມີອຸບັດເຫດທີ່ພົວພັນກັບຄົນຕ່າງປະເທດ ມີ 03 ລາຍ ຈຳນວນ 05 ຄົນ. ໃນນັ້ນ, ມີສັນຊາດຫວຽດນາມ ຈຳນວນ 02 ລາຍ, ມີຜູ້ໄດ້ຮັບບາດເຈັບ 04 ຄົນ, ສັນຊາດຈີນ ຈຳນວນ 01 ລາຍ ແລະ ໄດ້ຮັບບາດເຈັບ 01 ຄົນ.