ເຮືອໂດຍສານຫຼົ້ມ ໃນດີອາຄອງໂກ ເສຍຊີວິດ 13 ຄົນ ສູນຫາຍ 142 ຄົນ

246

ອຸບັດຕິເຫດເຮືອໂດຍສານຫຼົ້ມກາງທະເລສາບຄີວູ ໃນສາທາລະນະລັດ ປະຊາທິປະໄຕ ຄອງໂກ ຕັ້ງຢູ່ທາງພາກກາງຂອງທະວີບອາຟຣິກາ ໜ່ວຍກູ້ໄພພົບຜູ້ເສຍຊີວິດແລ້ວ 13 ຄົນ ຍັງສູນຫາຍອີກ 142 ຄົນ ເຫດເກີດເມື່ອວັນຈັນ ທີ 15 ເມສາ ຜ່ານມາ.

ສໍານັກຂ່າວຣອຍເຕີ ລາຍງານຈາກເມືອງຄາເລຮີ ສາທາລະນະລັດ ປະຊາທິປະໄຕຍຄອງໂກ (DR Congo: Democratic Republic of the Congo ) ເມື່ອວັນພະຫັດ ທີ 18 ເມສາ ວ່າ ອຸບັດຕິເຫດທາງເຮືອແລ້ວມີຜູ້ເສຍຊີວິດເກີດຂຶ້ນເປັນປະຈໍາໃນປະເທດດີອາຄອງໂກ ເປັນປະເທດມີເນື້ອທີ່ກວ້າງຂວາງ ແຕ່ເຕັມໄປດ້ວຍປ່າ ແລະ ຂາດແຄນທາງຢາງ ແລະ ເຮືອໂດຍສານສ່ວນໃຫຍ່ມັກບັນທຸກນໍ້າໜັກເກີນອັດຕາ.

ປະທານາທິບໍດີເຟລິກ ຊິເຊເຄດີຂອງດີອາ ຄອງໂກ ໄດ້ກ່າວເມື່ອວັນພະຫັດ ຜ່ານມາ ວ່າ ລັດຖະບານຈະເຮັດທຸກວິທີທາງເພື່ອຮັບປະກັນວ່າ ເຫດເສົ້າສະຫຼົດເຊັ່ນນີ້ຈະບໍ່ເກີດຂຶ້ນອີກ ເຊິ່ງເຫດການຫຼ້າສຸດເກີດຈາກຄວາມມັກງ່າຍຂອງເຈົ້າຂອງເຮືອ ທີ່ໃຊ້ເຮືອເກົ່າຊຸດໂຊມອອກແລ່ນ.

ເຮືອໂດຍສານຂະໜາດນ້ອຍທີ່ເອີ້ນຕາມພາສາທ້ອງຖິ່ນວ່າ ປິຮົກ ອອກເດີນທາງຈາກແຂວງນັອດຄີວູ ໄປຫາລັດເຊົາຄີວູ ເມື່ອວັນຈັນ ແລະ ເຮືອກໍ່ຫຼົ້ມລົງກາງທະເລສາບ ນອກຝັ່ງເມືອງຄາເລຮີລັດ ເຊົາຄີວູ ປະຊາຊົນ ແລະ ຊາວປະມົງທ້ອງຖິ່ນຊ່ວຍເຫຼືອຜູ້ໂດຍສານລອດຊີວິດໄດ້ 37 ຄົນ ແລະ ຈົນເຖິງວັນພະຫັດໜ່ວຍກູ້ໄພພົບຜູ້ເສຍຊີວິດແລ້ວ 13 ຄົນ ຍັງສືບຕໍ່ຄົ້ນຫາຜູ້ສູນຫາຍອີກ 142 ຄົນ.