ເສຍຊີວິດຢ່າງໜ້ອຍ 29 ຄົນ! ເກີດເຫດລົດເມນັກທ່ອງທ່ຽວເຢຍລະມັນຕົກຂ້າງທາງ ທີ່ ປັອກຕຸຍການ

894

ເກີດອຸບັດຕິເຫດລົດເມບັນທຸກນັກທ່ອງທ່ຽວຊາວເຢຍລະມັນພິກຂວໍ້າຕົກລົງຂ້າງທາງເສຍ ຊີວິດເກືອບ 30 ຄົນ ທີ່ເມືອງການິໂກຂອງປັອກຕຸຍການ ມື້ວານນີ້.

ສໍານັກຂ່າວ “ລູຊາ (Lusa)” ສໍານັກຂ່າວທ້ອງຖິ່ນໃນປະເທດປັອກຕຸຍການເປີດເຜີຍອຸບັດຕິເຫດລົດເມທີ່ບັນທຸກນັກທ່ອງທ່ຽວຊາວເຢຍລະມັນ ພ້ອມຄົນຂັບ ແລະ ໄກ້ນຳທ່ຽວຈໍານວນທັງໝົດ 55 ຄົນ ເກີດອຸບັດຕິເຫດພິກຂວໍ້າຕົກລົງຂ້າງທາງທີ່ເມືອງການິໂກ ທີ່ຕັ້ງຢູ່ເທິງເກາະມາເດຣາ ປະເທດປັອກຕຸນການ ເມື່ອແລງວານນີ້ ມີນັກທ່ອງທ່ຽວເສຍຊີວິດແລ້ວຢ່າງໜ້ອຍ 29 ຄົນ ໃນຈໍານວນນີ້ ມີຄົນທ້ອງຖິ່ນລວມຢູ່ນຳ ແລະ ໄດ້ຮັບບາດເຈັບອີກ 27 ຄົນ.

ຫຼັງເກີດເຫດໂຄສົກລັດຖະບານເຢຍລະມັນໄດ້ຖະແຫຼງຮັບທາບເຖິງເຫດການທີ່ເກີດຂຶ້ນແລ້ວ ແລະ ຂໍສະແດງຄວາມເສຍໃຈຢ່າງສຸດຊຶ້ງກັບຜູ້ເສຍຊີວິດໃນອຸບັດຕິເຫດລົດເມພິກຂວໍ້ານີ້ ຂະນະທີ່ ທ່ານ ມາເຊໂລ ເຣເບໂລ ເດ ໂຊຊາ ປະທານາທິບໍດີຂອງປັອກຕຸຍການ ໄດ້ອອກຖະແຫຼງການຜ່ານທາງສະຖານີໂທທັດສະແດງຄວາມເສຍໃຈຕໍ່ເຫດການນີ້ດ້ວຍເຊັ່ນກັນ.

ດ້ານເຈົ້າໜ້າທີ່ຕໍາຫຼວດສັນນິຖານວ່າ ອຸບັດຕິເຫດຄັ້ງນີ້ ເກີດຂຶ້ນຈາກຄົນຂັບລົດໄດ້ສູນເສຍການຄວບຄຸມລົດໃນບໍລິເວນທາງແຍກຂອງຖະໜົນສາຍທີ່ແລ່ນມາ ກ່ອນທີ່ຈະພິກຂວໍ້າຕົກລົງຂ້າງທາງ ແລະ ຕົກລົງໄປທັບຫຼັງຄາບ້ານເຮືອນປະຊາຊົນທີ່ຢູ່ດ້ານລຸ່ມ. ທັງນັ້ນ ເຈົ້າຫນ້າທີ່ກໍາລັງສືບສວນຫາສາເຫດທີ່ແທ້ຈິງຕໍ່ໄປ.

Clip: AFP news agency