ເກີດເຫດແຜ່ນດິນໄຫວ 6,0 ສະເທືອນພາກຕາເວັນອອກຂອງປະເທດໄຕ້ຫວັນ

226

ເກີດເຫດແຜ່ນດິນໄຫວຮຸນແຮງ 6,0 ແມັກນິຈູດ ໃນເຂດຮວາຫຼຽນ ທາງພາກຕາເວັນອອກ ຂອງເກາະໄຕ້ຫວັນ ໂດຍແຮງສັ່ນສະເທືອນສາມາດຮັບຮູ້ໄດ້ໄກເຖິງນະຄອນຫຼວງໄທເປ ເບື້ອງຕົ້ນຍັງບໍ່ພົບຜູ້ເສຍຊີວິດ ຫຼື ຜູ້ໄດ້ຮັບບາດເຈັບ.

ສໍານັກຂ່າວຕ່າງປະເທດລາຍງານຈາກນະຄອນຫຼວງໄທເປ ປະເທດຈີນ (ໄຕ້ຫວັນ) ເມື່ອວັນພະຫັດ ທີ 18 ເມສາ ວ່າ ສໍານັກງານສໍາຫຼວດ ທໍລະນີວິທະຍາສະຫະລັດ (USGS) ກວດພົບການເກີດແຜ່ນດິນໄຫວຮຸນແຮງ 6,0 ແມັກນິຈູດ ເມື່ອເວລາ 12:01 ໂມງ ຕາມເວລາທ້ອງຖິ່ນຂອງນະຄອນຫຼວງໄທເປ (11:01 ໂມງ ຕາມເວລາໃນປະເທດລາວ) ໂດຍຈຸດສູນກາງຂອງແຮງສັ່ນສະເທືອນຢູ່ເລິກລົງໄປຈາກໜ້າດິນ ປະມານ 19 ກິໂລແມັດ ບໍລິເວນຊາຍຝັ່ງຂອງເຂດມົນທົນຮວາຫຼຽນ ທາງພາກຕາເວັນອອກຂອງເກາະໄຕ້ຫວັນ.

ຫຼັງເກີດເຫດຍັງບໍ່ມີລາຍງານຜູ້ເສຍຊີວິດ ຫຼື ຜູ້ໄດ້ຮັບບາດເຈັບ ແຕ່ສູນເຝົ້າລະວັງແຜ່ນດິນໄຫວຂອງລັດຖະບານໄທເປ ໄດ້ວັດແທກແຮງສັ່ນສະເທືອນຂອງແຜ່ນດິນໄຫວຄັ້ງນີ້ ໄດ້ສູງກວ່າເລັກນ້ອຍ ຄື 6,1 ແມັກນິຈູດ ແລະ ສາມາດຮັບຮູ້ໄດ້ໄກເຖິງນະຄອນຫຼວງໄທເປ ທີ່ຕັ້ງຢູ່ທາງພາກເໜືອດ້ວຍ ໂດຍມີລາຍງານການເກີດຄວາມເສຍຫາຍກັບຖະໜົນບາງສາຍ ແລະ ລະບົບລົດໄຟໄດ້ຢຸດໃຫ້ບໍລິການຊົ່ວຄາວ ເພື່ອຄວາມປອດໄພ.

ທັງນີ້, ເຂດມົນທົນຮວາຫຼຽນ ຜະເຊີນກັບແຜ່ນດິນໄຫວຮຸນແຮງ 6,4 ແມັກນິຈູດ ເມື່ອເດືອນກຸມພາ ປີຜ່ານມາ ສົ່ງຜົນໃຫ້ມີຜູ້ເສຍຊີວິດ 17 ຄົນ ແລະ ໄດ້ຮັບບາດເຈັບ 285 ຄົນ.