ປະເທດມຽນມາປ່ອຍນັກໂທດ ກວ່າ 9.500 ຄົນ ສະຫຼອງປີໃຫມ່

248

ທາງການປະເທດມຽນມາ ເລິ່ມປ່ອຍນັກໂທດ 9.535 ຄົນ ເມື່ອວັນພຸດ ສ່ວນໜຶ່ງຂອງການອະໄພຍະໂທດ ຜູ້ຖືກຂັງປະຈໍາປີ ເນື່ອງໃນວັນຂຶ້ນປີໃໝ່ສະເຫຼີມສະຫຼອງເທສະການວັນສົງການ ແຕ່ບໍ່ໄດ້ລວມນັກຂ່າວ 2 ຄົນ ຂອງສໍານັກຂ່າວຣອຍເຕີດ້ວຍ.

ສໍານັກຂ່າວຣອຍເຕີ ແລະ ເອເອັຟພີ ໄດ້ລາຍງານຈາກເມືອງຢ່າງກຸ້ງປະເທດມຽນມາ ເມື່ອວັນພຸດ ທີ 17 ເມສາ ວ່າ ປະທານປະເທດວິນ ມະຍິນ ຂອງມຽນມາ ກ່າວໃນຖະແຫຼງການ ເມື່ອວັນພຸດ ວ່າ ຜູ້ຖືກຂັງ 9.535 ຄົນ ລວມເຖິງຊາວຕ່າງຊາດ 16 ຄົນ ໄດ້ຮັບການອະໄພຍະໂທດຕາມຫຼັກມະນຸດສະທໍາ ເພື່ອສັນຕິພາບ ແລະ ຄວາມສຸກຂອງປະເທດ ເນື່ອງໃນໂອກາດເທສະການວັນຂຶ້ນປີໃໝ່ຂອງຊາວພຸດທີ່ມຽນມາເອີ້ນວ່າ ຕິງຈັງ.

ທ່ານອ່ອງ ມຽວ ຈໍ ຕົວແທນກຸ່ມສິດທິມະນຸດສະທຳ “ເອເອພີພີ” ທີ່ຊ່ວຍເຫຼືອນັກໂທດການເມືອງໃນມຽນມາ ເຜີຍວ່າ ໃນບັນດານັກໂທດທີ່ໄດ້ຮັບການອະໄພຍະໂທດໃນຄັ້ງນີ້ ມີນັກໂທດການເມືອງລວມຢູ່ດ້ວຍ 2 ຄົນ ແຕ່ບໍ່ລວມນັກຂ່າວ 2 ຄົນ ຂອງສໍານັກຂ່າວຣອຍເຕີ ຄື ທ້າວວ້າ ໂລນ ແລະ ທ້າວຈໍ ໂຊ ອູ ເຊິ່ງຖືກສານພິພາກສາໃຫ້ຈໍາຄຸກຄົນລະ 7 ປີ ໃນຄວາມຜິດຕາມກົດໝາຍຄວາມລັບຂອງທາງລັດຖະການ ຈາກການລາຍງານຂ່າວການທະລຸນໂຫດຮ້າຍຂອງທະຫານກອງທັບມຽນມາ ລະຫວ່າງ ປະຕິບັດການກວາດລ້າງຊົນກຸ່ມນ້ອຍຊາວໂລຮີນຈາໃນລັດຍະໄຂ່.

ຈາກຂໍ້ມູນຂອງກຸ່ມເອເອພີພີປັດຈຸບັນຍັງເຫຼືອນັກໂທດທາງການເມືອງຖືກຄຸມຂັງຢູ່ໃນເຮືອນຈໍາທົ່ວປະເທດມຽນມາ ທັງໝົດ 46 ຄົນ ແລະ ອີກປະມານ 300 ຄົນ ກໍາລັງຖືກດໍາເນີນຄະດີໃນສານໃນຂໍ້ທີ່ກ່ຽວກັບກິດຈະກໍາທາງການເມືອງ.