ເສດຖະກິດຈີນໄຕມາດທໍາອິດຂອງປີນີ້ ເຕີບໂຕດີເກີນຄາດໜ້ອຍໜຶ່ງ

268

ອັດຕາການຂະຫຍາຍຕົວຂອງຜະລິດພັນໂດຍລວມໃນປະເທດ (GDP) ຂອງຈີນ ໃນໄຕມາດທໍາອິດຂອງປີນີ້ ຫຼື ລະຫວ່າງເດືອນມັງກອນ ເຖິງ ເດືອນມີນາ ທີ່ຜ່ານມາ  ຕົກທີ່ 6,4% ເມື່ອທຽບແບບລາຍປີ ດີກວ່າຄາດໝາຍໜ້ອຍໜຶ່ງ.

ສໍານັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນພຸດ ທີ 17 ເມສາ ວ່າ ສໍານັກງານສະຖິຕິແຫ່ງຊາດ (NBS: National Bureau of Statistics) ຂອງຈີນ ໄດ້ລາຍງານສະຖານະການເສດຖະກິດຂອງປະເທດໃນໄລຍະໄຕມາດທໍາອິດຂອງປີນີ້ ວ່າ ອັດຕາການເຕີບໂຕຂອງຜະລິດພັນໂດຍລວມໃນປະເທດ (GDP: Gross Domestic Product) ຢູ່ທີ່ 6,4% ເມື່ອທຽບກັບໄລຍະເວລາດຽວກັນ ຂອງປີ ທີ່ຜ່ານມາ ແລະ ຖືວ່າດີກວ່າທີ່ນັກວິເຄາະຄາດການໄວ້ໜ້ອຍໜຶ່ງ ວ່າ ຈະເຕີບໂຕໃນລະດັບ 6,3% ເຊິ່ງລາຍງານຂອງ NBS ວິເຄາະວ່າ ສະຖານະການຖືວ່າຢູ່ໃນພາວະຄົງຕົວ ໃນຂະນະທີ່ໄດ້ຮັບອິດທິພົນໃນດ້ານດີຈາກປັດໄຈທັງພາຍໃນ ແລະ ພາຍນອກທີ່ຫຼາຍຂຶ້ນ ກະຕຸ້ນໃຫ້ຜົນຜະລິດອຸດສາຫະກໍາຂອງເດືອນມີນາ ເພິ່ມຂຶ້ນອີກ 8,5% ແລະ ການຈັບຈ່າຍໃຊ້ສອຍຂອງປະຊາຊົນທີ່ຫຼາຍຂຶ້ນ ສົ່ງຜົນໃຫ້ອັດຕາການຂາຍປີກໃນໄລຍະເວລາດຽວກັນເພິ່ມຂຶ້ນ 6,5% ເມື່ອທຽບກັບໄລຍະເວລາດຽວກັນຂອງປີທີ່ຜ່ານມາ.

ດ້ານອັດຕາວ່າງວຽກຂອງຊາວຈີນ ປະຈໍາເດືອນມີນາ ທີ່ຜ່ານມາ ຢູ່ທີ່ 5,2% ຫຼຸດລົງ 0,1% ຈາກສະຖິຕິເດືອນກຸມພາ ເຊິ່ງຢູ່ທີ່ 5,3% ຢ່າງໃດກໍ່ຕາມ ນາຍົກລັດຖະມົນຕີຫຼີ ເຄີ່ສຽງ ກ່າວລະຫວ່າງການປະຊຸມສະພາປະຊາຊົນແຫ່ງຊາດ (NPC: National People’s Congress) ເມື່ອເດືອນທີ່ຜ່ານມາ ກໍານົດເປົ້າໝາຍການເຕີບໂຕທາງເສດຖະກິດຂອງປະເທດ ໃນປີນີ້ໄວ້ ລະຫວ່າງ 6% ເຖິງ 6,5% .