ບໍ່ພົບຫຼັກຖານ ການລັກລອບຈູດໂບດນັອດ – ດາມ ຂະນະທີ່ ຍອດບໍລິຈາກກວ່າ 4.800 ຕື້ກີບ

266

ສໍານັກງານໄອຍະການປາຣີສ ເຜີຍວ່າ ບໍ່ພົບຫຼັກຖານເຫດໄຟໄໝ້ໂບດນັອດ – ດາມ ທີ່ເກີດຈາກການລັກລອບກໍ່ເຫດ ໂດຍມຸ່ງເນັ້ນໄປກວດກາຂໍ້ສັນນິຖານອຸບັດຕິເຫດ ແຕ່ການສອບສວນຕ້ອງກິນເວລາດົນ ຂະນະການບໍລິຈາກເງິນເພື່ອບູລະນະປັບປຸງ ຍັງເຂົ້າມາຕໍ່ເນື່ອງເຊິ່ງເກີນ 500 ລ້ານເອີໂຣ ຫຼື ກວ່າ 4.800 ຕື້ກີບ ແລ້ວ.

ສໍານັກຂ່າວເອພີ, ເອເອັຟພີ ແລະ ຣອຍເຕີ ໄດ້ລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນອັງຄານ ທີ 16 ເມສາ ວ່າ ທ່ານເຣມີ ໄຮ ສໍານັກງານໄອຍະການປາຣີສ ໄດ້ຖະແຫຼງວ່າບໍ່ພົບຫຼັກຖານ ວ່າ ເປັນການເຈດຕະນາລັກລອບຈູດຂອງເຫດໄຟໄໝ້ໂບດນັອດ – ດາມ ນະຄອນຫຼວງປາຣີສ ເມື່ອໄລຍະຕອນແລງຂອງວັນຈັນ ທີ່ຜ່ານມາ ແຕ່ພະນັກງານໄອຍະການຈະມຸ່ງເນັ້ນໄປກວດສອບທີ່ຂໍ້ສັນນິຖານວ່າເປັນອຸບັດຕິເຫດ ຢ່າງໃດກໍ່ຕາມ, ການສອບສວນຕ້ອງກິນເວລາດົນ ແລະ ຊັບຊ້ອນ ຂະນະນີ້ ພະນັກງານໄອຍະການ 5 ຄົນ ກໍາລັງເຮັດວຽກສອບສວນໂດຍສອບປາກຄໍາແຮງງານຈາກ 5 ບໍລິສັດ ທີ່ໄດ້ຮັບການວ່າຈ້າງໃຫ້ມາເຮັດວຽກບູລະນະປັບປຸງສ່ວນຫຼັງຄາຂອງມະຫາໂບດນັອດ – ດາມ ເຊິ່ງກຳລັງມີການປັບປຸງ ກ່ອນໄຟໄໝ້ ແລະ ຍັງເປັນຈຸດທີ່ໄຟເລິ່ມໄໝ້.

ຂະນະດຽວກັນ ຍອດເງິນບໍລິຈາກເພື່ອການບູລະນະປັບປຸງມະຫາໂບດນັອດ – ດາມ ຕາມປະກາດຂອງປະທານາທິບໍດີເອັມມານູເອລ ມາຄຣົງ ຂອງຝຣັ່ງນັ້ນ ມີຈຳນວນສູງຂຶ້ນເກີນ 500 ລ້ານເອີໂຣ ຫຼື ປະມານ 4.897 ຕື້ກີບ ແລ້ວ ເຊັ່ນມະຫາເສດຖີຊາວຝຣັ່ງ ທ່ານແບນາດ ອາໂນ ເຈົ້າຂອງທຸລະກິດສິນຄ້າແບຣນເນມ LVMH ໄດ້ບໍລິຈາກໃຫ້ 200 ລ້ານເອີໂຣ ຫຼັງຈາກທີ່ ທ່ານຟອງຊົວ ອັອງຣີ ປິໂນ ປະທານກຸ່ມບໍລິສັດເຄຣິງ ເຈົ້າຂອງແບຣນເນມທີ່ມີຊື່ສຽງງ ບໍລິຈາກໃຫ້ 100 ລ້ານເອີໂຣ ຕໍ່ມາກຸ່ມທຸລະກິດເຄື່ອງສໍາອາງລໍຣິອັລ ແລະ ຄອບຄົວເບດຕອງກູຣ໌ ເມເຢີ ກັບ ມູນລະນິທິເບດຕອງກູຣ໌ ຊູລເລີ ບໍລິຈາກ 200 ລ້ານເອີໂຣ ສ່ວນ ທ່ານນາງແອນ ຮິດັລໂກ ນາຍົກເທສະມົນຕີຍິງຂອງນະຄອນຫຼວງປາຣີສ ປະກາດຈັດສັນງົບປະມານ 50 ລ້ານເອີໂຣ ແລະ ຈັດປະຊຸມກັບນານາຊາດເພື່ອຫາຜູ້ບໍລິຈາກໃນການລະດົມທຶນສໍາລັບການບູລະນະປັບປຸງໃນອາທິດໜ້າ ແລະ ແຄວ້ນອິລ – ເດິ – ຟຣອງ ເປັນພື້ນທີ່ສ່ວນໜຶ່ງຂອງນະຄອນຫຼວງປາຣີສ ບໍລິຈາກໃຫ້ 10 ລ້ານເອີໂຣ ດ້ານມູນລະນິທິມໍລະດົກຝຣັ່ງ ໜ່ວຍງານເອກະຊົນກໍ່ໄດ້ເລີ່ມການລະດົມທຶນເພື່ອຂໍເງິນບໍລິຈາກໃນການບູລະນະປັບປຸງມະຫາໂບດນັອອດ – ດາມ ຜ່ານທາງເວັບໄຊ www.fondation-patrimoine.org

ສໍາລັບ ສິລະປະທີ່ນໍາອອກມາໄດ້ຈາກໂບດນັອດ – ດາມ ລະຫວ່າງການເກີດເຫດໄຟໄໝ້ກໍຈະນໍາໄປເກັບໄວ້ທີ່ພິພິຕະພັນລູຟ ຕາມຄໍາຖະແຫຼງຂອງ ທ່ານແຟຣງ ຣີສເຕີ ລັດຖະມົນຕີວັດທະນະທໍາຝຣັ່ງ.