ເຈົ້າຂອງ ‘ຫຼຸຍສ໌ ວິດຕອງ’ ມອບເງິນ ກວ່າ 1.950 ຕື້ກີບ ບູລະນະ ‘ໂບດນັອດ – ດາມ’ ໃໝ່

407

ທ່ານແບນາດ ອາໂນລ ມະຫາເສດຖີ ອັນດັບ 1 ຂອງຝຣັ່ງ ເຈົ້າຂອງກິດຈະການ “ຫຼຸຍສ໌ ວິດຕອງ” ປະກາດມອບເງິນ 200 ລ້ານ ເອີໂຣ ຫຼື ກວ່າ 1.950 ຕື້ກີບ ຮ່ວມບູລະໂບດນັອດ – ດາມ ທີ່ເກີດໄຟ ໄໝ້ຢ່າງໜັກ ເມື່ອວັນຈັນ ທີ່ຜ່ານມາ.

ສໍານັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນອັງຄານ ທີ 16 ເມສາ ວ່າ ພາຍຫຼັງທີ່ປະທານາທິບໍດີເອັມມານູເອລ ມາຄຣົງ ປະກາດວ່າ ຈະບູລະນະປະຕິສັງຂອນໂບດນັອດ – ດາມ ທີ່ເກີດເຫດໄຟໄໝ້ຢ່າງຮຸນແຮງໃຫ້ກັບຄືນສູ່ສະພາບເດີມໄດ້ຫຼາຍທີ່ສຸດ ເທົ່າທີ່ຈະເຮັດໄດ້ ໂດຍນອກຈາກງົບປະມານສຸກເສີນຂອງລັດຖະບານກາງແລ້ວ ອາດຈະຕ້ອງຂໍລະດົມທຶນຈາກທັງພາຍໃນ ແລະ ຕ່າງປະເທດດ້ວຍແລ້ວ ທາງດ້ານທ່ານນາງແອນ ຮິດັລໂກ ນາຍົກເທສະມົນຕີນະຄອນຫຼວງປາຣີສ ກ່າວວ່າ ເທສະບານມີມະຕິອະນຸມັດງົບປະມານສຸກເສີນເບື້ອງຕົ້ນ 10 ລ້ານເອີໂຣ (97,8 ຕື້ກີບ), ທ່ານແບນາດ ອາໂນລ (Bernard Arnault) ມະຫາເສດຖີຊາວຝຣັ່ງ ເຊິ່ງເປັນທັງບຸກຄົນທີ່ລ່ຳລວຍທີ່ສຸດໃນເອີຣົບ ແລະ ໃນປະເທດຝຣັ່ງ ເປັນປະທານຄະນະເຈົ້າໜ້າທີ່ບໍລິຫານ (ຊີອີໂອ) ຂອງກຸ່ມບໍລິສັດແອລວີເອັມເອຈ໌ ໂມເອັດ – ເຮນເນສຊີ ຫຼຸຍສ໌ ວິດຕອງ (LVMH Moët Hennessy Louis Vuitton) ເຊິ່ງເປັນເຈົ້າຂອງກິດຈະການທັງ ຫຼຸຍສ໌ ວິດຕອງ ແລະ ຄຣິສຕຽນ ຄິອໍ ປະກາດບໍລິຈາກທຶນສົມທົບອີກ 200 ລ້ານເອີໂຣ ປະມານ 1.956 ຕື້ກີບ.

ນອກຈາກນີ້, ກໍ່ມີທ່ານຟອງຊົວ ອັອງຣີ – ປິໂນ (Francois-Henri Pinault) ປະທານຄະນະເຈົ້າໜ້າທີ່ບໍລິຫານຂອງກຸ່ມບໍລິສັດເຄຣິງ ເຊິ່ງເປັນເຈົ້າຂອງ ຫ້ອງເສື້ອຫຼູກຸຊຊີ ແລະ ອີຟ ແຊັງ ໂຣຣັອງ (Gucci & Yves Saint Laurent) ປະກາດບໍລິຈາກທັນທີ 100 ລ້ານ ເອີໂຣ (ປະມານ 978 ຕື້ກີບ).

ດ້ານສໍານັກງານດັບເພີງນະຄອນຫຼວງປາຣີສ ຢືນຢັນການຄວບຄຸມສະຖານະການເຫດໄຟໄໝ້ໂບດນັອດ – ດາມ ສະຖາປັດຕະຍາກໍາແບບກໍທິກ ມໍລະດົກໂລກອາຍຸເກົ່າແກ່ກວ່າ 850 ປີ ໄດ້ແລ້ວ ຫຼັງໄຟໄດ້ເລິ່ມລຸກໄໝ້ ເມື່ອໄລຍະຕອນແລງຂອງວັນຈັນ ຕາມເວລາທ້ອງຖິ່ນ ໂດຍໃຊ້ກໍາລັງເຈົ້າໜ້າທີ່ຫຼາຍກວ່າ 500 ຄົນ ແຕ່ຍັງຕ້ອງໄດ້ສີດນໍ້າເພື່ອລ້ຽງໂຄງສ້າງຫຼັກຂອງອາຄານໄວ້ຕໍ່ໄປ ເພື່ອໃຫ້ຫຼຸດຄວາມຮ້ອນຫຼັງຫໍຄອຍປາຍແຫຼມຂອງມະຫາໂບດເຊິ່ງຢູ່ລະຫວ່າງການບູລະນະປັບປຸງ ແລະ ໂຄງສ້າງສ່ວນໃຫຍ່ເປັນໄມ້ຫັກເພລົງມາ ສ່ວນລໍາດັບຕໍ່ໄປຈະເປັນຂັ້ນຕອນຂອງການກວດກາໂຄງສ້າງອາຄານ ແລະ ສະພາບຄວາມເສຍຫາຍ ຂະນະທີ່ ເຈົ້າໜ້າທີ່ ແລະ ອາສາສະໝັກຊ່ວຍກັນຂົນຍ້າຍສິ່ງຂອງສໍາຄັນອອກມາໄດ້ “ເກືອບທັງໝົດ” ລວມເຖິງມົງກຸດ ແລະ ເສື້ອຄຸມຂອງພຣະເຈົ້າຫຼຸຍ ທີ 9.