ຜູ້ນໍາຝຣັ່ງ ຢືນຢັນຈະສ້າງ ‘ໂບດນັອດ – ດາມ’ ຂຶ້ນມາໃໝ່

259

ເຈົ້າໜ້າທີ່ດັບເພີງຂອງຝຣັ່ງພະຍາຍາມຢ່າງສຸດຄວາມສາມາດໃນການຄວບຄຸມເຫດໄຟໄໝ້ຄັ້ງໃຫຍ່ ທີ່ ໂບດນັອດ – ດາມ ມະຫາວິຫານມໍລະດົກໂລກ ອາຍຸເກົ່າແກ່ກວ່າ 800 ປີ ຂະນະ ທີ່ປະທານາທິບໍດີເອັມມານູເອລ ມາຄຣົງ ຢືນຢັນລັດຖະບານ “ຈະສ້າງນັອດ – ດາມ ຂຶ້ນໃໝ່”.

ສໍານັກຂ່າວຕ່າງປະເທດລາຍງານຈາກນະຄອນຫຼວງປາຣີສ ປະເທດຝຣັ່ງ ເມື່ອວັນອັງຄານ ທີ 16 ເມສາ ກ່ຽວກັບຄວາມຄືບໜ້າຈາກເຫດໄຟໄໝ້ຄັ້ງໃຫຍ່ ທີ່ໂບດນັອດ – ດາມ ໃນເຂດໃຈກາງນະຄອນຫຼວງປາຣີສ ເມື່ອໄລຍະຕອນແລງຂອງວັນຈັນ ຕາມເວລາທ້ອງຖິ່ນ ເຊິ່ງເປັນໂບດທີ່ກໍ່ສ້າງດ້ວຍສະຖາປັດຕະຍາກໍາແບບກໍທິກ ໂດຍຄວາມຮຸນແຮງຂອງໄຟໄດ້ໄໝ້ສ່ວນຍອດຂອງໂບດຫັກເພຖະຫຼົ່ມລົງມາ ແລະ ເຈົ້າໜ້າທີ່ດັບເພີງຈາກນະຄອນຫຼວງປາຣີສພະຍາຍາມຢ່າງໜັກ ໃນການຄວບຄຸມໄຟ.

ປະທານາທິບໍດີເອັມມານູເອລ ມາຄຣົງ ແລະ ນາຍົກລັດຖະມົນຕີເອດູອາ​ ຟິລິບ ທີ່ເດີນທາງລົງສະຖານທີ່ເກີດເຫດ ເພື່ອສັງເກດການການເຮັດວຽກຂອງເຈົ້າໜ້າທີ່ ແລະ ສໍາຫຼວດຄວາມເສຍຫາຍໃນເບື້ອງຕົ້ນດ້ວຍຕົວເອງ ກ່າວວ່າ ເຫດການທີ່ເກີດຂຶ້ນເປັນ “ຄວາມສູນເສຍຄັ້ງໃຫຍ່” ແຕ່ຢ່າງນ້ອຍຕົນກໍ່ຮູ້ສຶກໂລ່ງໃຈທີ່ໄຟຍັງບໍ່ທັນໄດ້ໄໝ້ລາມໄປທຳລາຍໂຄງສ້າງຫຼັກຂອງອາຄານທີ່ຍັງຢູ່ໃນຄວາມປອດໄພ  ໂດຍຊື່ນຊົມຄວາມວ່ອງໄວ ແລະ ການທຸ່ມເທເຮັດວຽກຂອງເຈົ້າໜ້າທີ່ທຸກຄົນ ເນື່ອງຈາກຖ້າບໍ່ເຊັ່ນນັ້ນ ອາດຈະສົ່ງຜົນໃຫ້ ອາຄານຂອງໂບດໝົດຫຼັງຫັກເພຖະຫຼົ່ມລົງມາ ແລະ ເຈົ້າໜ້າທີ່ສາມາດສະກັດໄຟບໍ່ໃຫ້ລຸກລາມໄປທີ່ຫໍຄອຍ ທັງສອງແຫ່ງໄດ້ ຂະນະດຽວກັນຜູ້ນໍາຝຣັ່ງໄດ້ປະກາດວ່າ ລັດຖະບານຈະສ້າງໂບດແຫ່ງນີ້ຂຶ້ນມາໃຫມ່ ດ້ວຍງົບປະມານສຸກເສີນ ແຕ່ອາດຈໍາເປັນຕ້ອງເປີດຂໍຮັບການລະດົມທຶນຈາກຕ່າງປະເທດດ້ວຍ.

ທັງນີ້ ສາເຫດຂອງການເກີດເຫດໄຟໄໝ້ຄັ້ງນີ້ ຍັງບໍ່ເປັນທີ່ຊັດເຈນ ເຖິງວ່າຫຼາຍຝ່າຍຕັ້ງຂໍ້ສົມມຸດຖານວ່າ ອາດກ່ຽວຂ້ອງກັບໂຄງການບູລະນະປັບປຸງພື້ນທີ່ບາງສ່ວນຂອງໂບດທີ່ດໍາເນີນການມາຕັ້ງແຕ່ປີ ທີ່ຜ່ານມາ ເຊິ່ງຜູ້ນໍາຝຣັ່ງ ກໍານົດໃຫ້ໜ່ວຍງານທີ່ກ່ຽວຂ້ອງເລັ່ງສືບສວນໃນຂັ້ນຕອນຕໍ່ໄປ.

ສໍາລັບ ປະວັດໂດຍສັງເຂບຂອງໂບດນັອດ – ດາມ ນັ້ນ ເປັນສະຖາປັດຕະຍາກໍາກໍທິກແບບຝຣັ່ງ ຂະໜານແທ້ ມີຄວາມໝາຍວ່າ “ແມ່ພຣະ” ເລິ່ມກໍ່ສ້າງເມື່ອປີ ພສ 1706 ແລະ ແລ້ວສຳເລັດໃນປີ ພສ 1888 ວິຫານມີຄວາມສູງ 69 ແມັດ ເຊິ່ງໂບດແຫ່ງນີ້ ເຄີຍໄດ້ຮັບຄວາມເສຍຫາຍຢ່າງໜັກ ໃນຍຸກປະຕິວັດຝຣັ່ງ ຫຼັງຈາກນັ້ນ ມີການບູລະນະປະຕິສັງຂອນຄັ້ງໃຫຍ່ ຈົນສະພາບກັບມາໃກ້ຄຽງຮູບແບບດັ້ງເດີມຫຼາຍທີ່ສຸດ ແລະ ອົງການການສຶກສາວິທະຍາສາດ ແລະ ວັດທະນະທໍາແຫ່ງສະຫະປະຊາຊາດ (ຢູເນສໂກ) ໄດ້ຂຶ້ນທະບຽນ ໂບດນັອດ – ດາມ ເປັນມໍລະດົກໂລກ ເມື່ອປີ 1991.