ປາຝາແຍງຊີກຽງ 1 ໃນ 4 ໂຕສຸດທ້າຍຂອງໂລກ ຕາຍ ໃນສວນສັດຈີນ

298

ປາຝາແຍງຊີກຽງ ສັດນໍ້າຫາຍາກເພດແມ່ໄດ້ຕາຍແລ້ວ ໃນສວນສັດ ທາງພາກໃຕ້ຂອງປະເທດຈີນ ເຮັດໃຫ້ຕອນນີ້ ທົ່ວໂລກເຫຼືອພຽງ 3 ໂຕເທົ່ານັ້ນ.

ສໍານັກຂ່າວເອພີລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນຈັນ ທີ 15 ເມສາ ວ່າ ລັດຖະບານທ້ອງຖິ່ນເມືອງຊູໂຈວ ທາງພາກໃຕ້ຂອງຈີນ ໄດ້ຖະແຫຼງການວ່າ ປາຝາ ແຍງຊີກຽງ ສັດນໍ້າຫາຍາກເພດແມ່ ເຊິ່ງເປັນປາຝາທີ່ມີຂະໜາດໃຫຍ່ທີ່ສຸດໃນໂລກ ຢູ່ໃນສວນສັດເມືອງຊູໂຈວໄດ້ຕາຍ ແລ້ວ ເມື່ອບ່າຍວັນເສົາ ທີ່ຜ່ານມາ ເຮັດໃຫ້ປັດຈຸບັນເຫຼືອປາຝາແຍງຊີກຽງ ທົ່ວໂລກພຽງ 3 ໂຕ ເທົ່ານັ້ນ ໂດຍໂຕທໍາອິດເປັນເພດຜູ້ ຢູ່ໃນສວນສັດຂອງເມືອງຊູໂຈວ ສ່ວນອີກ 2 ໂຕນັ້ນ ຢູ່ໃນປະເທດຫວຽດນາມ ແຕ່ເຈົ້າໜ້າທີ່ບໍ່ຮູ້ວ່າເປັນເພດໃດ.

ຖະແຫຼງການຂອງລັດຖະບານທ້ອງຖິ່ນເມືອງຊູໂຈວ ລະບຸອີກວ່າ ຜູ້ຊ່ຽວຊານໄດ້ເກັບເອົາຕົວຢ່າງຂອງເນື້ອເຍື່ອຮັງໄຂ່ຂອງປາຝາເພດແມ່ໂຕນີ້ແລ້ວ ເຊື່ອວ່າມັນມີອາຍຸ 90 ປີ ທາງເຈົ້າໜ້າທີ່ໄດ້ພະຍາຍາມປະສົມພັນທຽມເພື່ອໃຫ້ມັນມີລູກກ່ອນທີ່ມັນຈະຕາຍ ເຊິ່ງຈາກການກວດຮ່າງກາຍຖືວ່າມັນມີສຸຂະພາບດີ ແລະ ການປະສົມທຽມກໍ່ເປັນໄປດ້ວຍດີ ແຕ່ມັນກໍ່ໄດ້ຕາຍໃນວັນຕໍ່ມາ.

ປາຝາແຍງຊີກຽງມີຕົ້ນກໍາເນີດຢູ່ໃນປະເທດຈີນ ເຊື່ອວ່າເປັນສາຍພັນທີ່ຫາຍາກທີ່ສຸດໃນໂລກ ທັງຜູ້ຊ່ຽວຊານຂອງຈີນ ແລະ ຕ່າງປະເທດໄດ້ຮ່ວມກັນພິສູດສາເຫດການຕາຍຂອງມັນ.