ການປັບລາຄານ້ຳມັນ

278

ປັບຂຶ້ນລາຄານ້ຳມັນຂາຍຍົກ – ຂາຍຍ່ອຍ ແອັດຊັງພິເສດ ແລະ ແອັດຊັງທຳມະດາ ຄັ້ງວັນທີ 10 ເມສາ, ຂະນະທີ່ລັດຮຽກຮ້ອງຜູ້ປະກອບຫ້າມສວຍໂອກາດກັກຕຸນ ແລະ ຂຶ້ນສິນຄ້າຕາມລຳພັງໃຈ.

ປັດຈຸບັນລາຄານ້ຳມັນເຊື້ອໄຟຕະຫຼາດໂລກເໜັງຕີງເພີ່ມຂຶ້ນຢ່າງຕໍ່ເນື່ອງ ສາເຫດເກີດຈາກຫຼາຍປັດໄຈ ເຊັ່ນ: ກຸ່ມໂອປັກ ຫຼຸດປະລິມານການຜະລິດລົງ ຫຼື ອື່ນໆ ເຮັດໃຫ້ລາຄາມີການຜັນຜວນໂດຍສົມທຽບລາຄາສະເລ່ຍນ້ຳມັນເຊື້ອໄຟສຳເລັດຮູບຕະຫຼາດສິງກະໂປ ວັນທີ 8 – 22 ມີນາ ( ສະເລ່ຍ 15 ວັນ ) ບວກຄ່າຂົນສົ່ງ, ປະກັນໄພ ແລະ ອື່ນໆ ຮອດລາວກັບຄິດໄລ່ຄ່າພາສີ ປະຕິບັດຄັ້ງວັນທີ 19 ມີນາ 2019 ຜ່ານມາ ເຫັນວ່າ: ລາຄາສະເລ່ຍນ້ຳມັນແອັດຊັງພິເສດ, ແອັດຊັງທຳມະດາ ແລະ ນ້ຳມັນກາຊວນ ຕະຫຼາດສິງກະໂປ ປັບເພີ່ມຂຶ້ນຄື: ລາຄານ້ຳມັນແອັດພິເສດ ເພີ່ມຂຶ້ນ 312 ກີບຕໍ່ລິດ, ຄິດເປັນ 6,64% ( ຈາກ 4.386 ເພີ່ມຂຶ້ນເປັນ 4.698 ກີບຕໍ່ລິດ ), ນ້ຳມັນແອັດຊັງທຳມະດາ ເພີ່ມຂຶ້ນ 321 ກີບຕໍ່ລິດ ຫຼື ຄິດເປັນ 7,02% ( ຈາກ 4.247 ເພີ່ມຂຶ້ນເປັນ 4.568 ກີບຕໍ່ລິດ ) ສ່ວນນ້ຳມັນກາຊວນ ບໍ່ມີການເໜັງຕີງ.

ທັງນີ້, ດັ່ງທີ່ກ່າວມາຂ້າງເທິງນັ້ນ ຖ້າລາຄານ້ຳມັນຕະຫຼາດໂລກເວົ້າລວມ, ເວົ້າສະເພາະລາຄານ້ຳມັນແອັດຊັງພິເສດ ແລະ ແອັດຊັງທຳມະດາ ຕະຫຼາດສິງກະໂປ ( ບວກຄ່າຂົນສົ່ງ, ຄ່າປະກັນໄພ ແລະ ຄ່າອື່ນໆມາຮອດລາວ ) ຍັງສືບຕໍ່ເໜັງຕີງ ແຕ່ 4.568 – 4.698 ກີບຕໍ່ລິດ ຈະເຮັດໃຫ້ການປັບລາຄານ້ຳມັນເຊື້ອໄຟພາຍໃນປະເທດແມ່ນປັບຂຶ້ນລາຄານ້ຳມັນແອັດຊັງພິເສດ 580 ກີບຕໍ່ລິດ ຫຼື ຄິດເປັນ 5,7%, ນ້ຳມັນແອັດຊັງທຳມະດາ 540 ກີບຕໍ່ລິດ ຫຼື ຄິດເປັນ 6,0% ແລະ ສ່ວນນ້ຳມັນກາຊວນບໍ່ມີການປັບ ເຊິ່ງກົມການຄ້າພາຍໃນກະຊວງອຸດສາຫະກຳ ແລະ ການຄ້າ ໄດ້ປະສານສົມທົບກັບກົມພາສີ, ກົມສ່ວຍສາອາກອນ ກະຊວງການເງິນ ແລະ ສະມາຄົມນ້ຳມັນເຊື້ອໄຟ ແລະ ອາຍແກ໊ສ ຄົ້ນຄວ້າ ແລະ ລາຍງານຂໍທິດຊີ້ນຳໃນຄັ້ງວັນທີ 8 ເມສາ 2019 ເຫັນດີໃຫ້ຫຼຸດການເກັບຄັງແຮນ້ຳມັນແອັດຊັງພິເສດ ແລະ ແອັດຊັງທຳມະດາ ລົງ 200 ກີບຕໍ່ລິດ ເພື່ອບໍ່ໃຫ້ສົ່ງຜົນກະທົບຕໍ່ພື້ນຖານເສດຖະກິດ ກໍຄືຊົມໃຊ້ຫຼາຍເກີນໄປ ເພື່ອເຮັດໃຫ້ການປັບລາຄານ້ຳມັນເຊື້ອໄຟເປັນໄປຕາມກົນໄກຕະຫຼາດ ທັງບໍ່ແຕກໂຕນກັບປະເທດອ້ອມຂ້າງ ແລະ ໃຫ້ມີນ້ຳມັນເຊື້ອໄຟສະໜອງພາຍໃນໄດ້ຢ່າງພຽງ ພໍ, ເຮັດໃຫ້ລາຄາຂາຍຍ່ອຍນ້ຳມັນເຊື້ອໄຟ ເວົ້າສະເພາະຢູ່ຈຸດນະຄອນຫຼວງວຽງຈັນ ທີ່ຈະປະຕິບັດຄັ້ງໃໝ່ ຄັ້ງວັນທີ 10 ເມສາ 2019 ມີດັ່ງນີ້:

ລາຄາຂາຍຍ່ອຍ ນ້ຳມັນແອັດຊັງພິເສດ ຈາກ 10.160 ກີບຕໍ່ລິດ ເພີ່ມຂຶ້ນເປັນ 10.520 ກີບຕໍ່ລິດ ( ເພີ່ມຂຶ້ນ 360 ກີບຕໍ່ລິດ ຫຼື ຄິດເປັນ 3,5% ).

ລາຄາຂາຍຍ່ອຍ ນ້ຳມັນແອັດຊັງທຳມະດາ ຈາກ 8.990 ເພີ່ມຂຶ້ນເປັນ 9.310 ກີບຕໍ່ລິດ ( ເພີ່ມຂຶ້ນ 320 ກີບຕໍ່ລິດ ຫຼື ຄິດເປັນ 3,6% ແລະ ນ້ຳມັນກາຊວນແມ່ນຮັກສາໄວ້ຄືເກົ່າ.

ທັງນີ້, ຕໍ່ກັບສະພາບການເໜັງຕີງລາຄານ້ຳມັນເຊື້ອໄຟໃນຕະຫຼາດໂລກ ກໍຄືການເໜັງຕີງເພີ່ມຂຶ້ນຂອງລາຄານ້ຳມັນເຊື້ອໄຟພາຍໃນປະເທດທີ່ກ່າວມາຂ້າງເທິງ ເຊິ່ງເປັນໄລຍະທີ່ທົ່ວປວງຊົນລາວບັນດາເຜົ່າ ກຳລັງກະກຽມສະເຫຼີມສະຫຼອງບຸນປີໃໝ່ລາວ ພ.ສ 2562 ດ້ວຍຄວາມເບີກບານມ່ວນຊື່ນ ຈຶ່ງຮຽກຮ້ອງມາຍັງພໍ່ແມ່ປະຊາຊົນທຸກທົ່ວໜ້າ ຈົ່ງມີສະຕິປະຢັດມັດທະຍັດ, ໃຊ້ຈ່າຍໃນສິ່ງທີ່ຈຳເປັນ ໂດຍສະເພາະແມ່ນການຊົມໃຊ້ຍານພາຫະນະ ແລະ ຮຽກຮ້ອງມາຍັງບັນດາຜູ້ປະກອບການຕ່າງໆຈົ່ງຢ່າໄດ້ສວຍໂອກາດຂຶ້ນລາຄາສິນຄ້າຕາມລຳພັງໃຈ ແລະ ກັກຕຸນສິນຄ້າ ກໍຄືນໍ້າມັນເຊື້ອໄຟໃນໄລຍະນ້ຳມັນເຊື້ອໄຟເໜັງຕີງຂຶ້ນ ຫາກພົບເຫັນການສວຍໂອກາດຂຶ້ນລາຄາສິນຄ້າແມ່ນໄດ້ໃຊ້ມາດຕະການລະບຽບກົດໝາຍ ແລະ ຖ້າຫາກພົບເຫັນການສວຍໂອກາດຂຶ້ນລາຄາສິນຄ້າ ທ່ານສາມາດແຈ້ງໄດ້ທີ່ສາຍດ່ວນ 1510 ປົກປ້ອງຜູ້ຊົມໃຊ້.