ນາຊາຍທອງ ພ້ອມຄຸ້ມຄອງລາຄາສິນຄ້າໃນໄລຍະສະຫຼອງປີໃໝ່ລາວ

237

ເຈົ້າໜ້າທີ່ສະເພາະກິດ ຫ້ອງການອຸດສາຫະກຳ ແລະ ການຄ້າ ເມືອງນາຊາຍທອງ ໄດ້ມີຄວາມພ້ອມສູງ ເພື່ອລົງຕິດຕາມ ແລະ ກວດກາສິນຄ້າໃນຕະຫຼາດພາຍໃນເມືອງຂອງຕົນໃນໄລຍະບຸນປີໃໝ່ ໂດຍເນັ້ນປະຕິບັດຕາມ ດໍາລັດ 474/ນຍ ເພື່ອເຮັດໃຫ້ສະພາບລາຄາສິນຄ້າມີຄວາມໝັ່ນທ່ຽງ.

ທ່ານ ພອນທິບ ຍົກໄຊຍະຄໍາ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງນາຊາຍທອງ ນະຄອນຫຼວງວຽງຈັນ ໄດ້ກ່າວວ່າ: ໃນໄລຍະສະເຫຼີມສະຫຼອງບຸນປີໃໝ່ລາວ ທີ່ຈະມາເຖິງນີ້ ເພື່ອກຽມ ຄວາມພ້ອມໃນການລົງຕິດຕາມ, ກວດກາສະພາບຊື້ – ຂາຍສິນຄ້າໃນທ້ອງຕະຫຼາດ, ບັນດາຫ້າງຮ້ານໃນເມືອງນາຊາຍທອງ ເຈົ້າໜ້າທີ່ກວດກາການຄ້າໃນເມືອງໄດ້ຈັດຕັ້ງທີມງານລົງຕິດຕາມກວດກາຢ່າງເຂັ້ມງວດ ໂດຍປະຕິບັດ ດໍາລັດ     474/ນຍ ກ່ຽວກັບການຄຸ້ມຄອງລາຄາສິນຄ້າ ແລະ ຄ່າບໍລິການ ແລະ ແຈ້ງການຂອງພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ເລກທີ 0704 /ອຄ.ນວ.ຄພນ ລົງວັນທີ 5 ເມສາ 2019 ເລື່ອງຫ້າມສວຍໂອກາດຂຶ້ນລາຄາສິນຄ້າຕາມລໍາພັງໃຈ ໃນໄລຍະບຸນປີໃໝ່ລາວ ພ.ສ 2562.

ທ່ານກ່າວວ່າ: ເມືອງນາຊາຍທອງ ມີຕະຫຼາດ 11 ແຫ່ງ ເຊິ່ງມີຕະຫຼາດຕົວແບບ 2 ແຫ່ງ ຄື: ຕະຫຼາດສົງເປືອຍ ແລະ ຕະຫຼາດໂຊກທະວີ ເຊິ່ງເປັນຈຸດບໍລິການທີ່ເປັນມາດຕະຖານ ເພື່ອເຮັດໃຫ້ການຄຸ້ມຄອງລາຄາສິນຄ້າ ແລະ ຄ່າບໍລິການເຂົ້າສູ່ລະບຽບກົດໝາຍ ບົນພື້ນຖານກົນໄກເສດຖະກິດຕະຫຼາດ ທີ່ມີການຄຸ້ມຄອງ ແລະ ດັດສົມຂອງລັດ ພ້ອມທັງບໍ່ໃຫ້ເອົາລັດເອົາປຽບຜູ້ຊົມໃຊ້ ເຊິ່ງຈະສ້າງຜົນກະທົບຕໍ່ເສດຖະກິດ ໂດຍສະເພາະແມ່ນວັນບຸນປະເພນີ ແລະ ວັນສໍາຄັນຂອງຊາດ.

ຮູບປະກອບຂ່າວ ບໍ່ກ່ຽວກັບເໜືອໃນ

ສໍາລັບລາຄາສິນຄ້າໃນທ້ອງຕະຫຼາດໃນລະຫວ່າງວັນທີ 1 – 7 ເມສາ 2019 ພາຍໃນເມືອງນາຊາຍທອງມີ ເຂົ້າສານໜຽວ 6,6 ພັນກີບຕໍ່ກິໂລ, ເຂົ້າຈ້າວ 9,37 ພັນກີບຕໍ່ກິໂລ, ຊີ້ນງົວປະເພດໜຶ່ງ 70 ພັນກີບຕໍ່ກິໂລ, ຊີ້ນໝູ 33 ພັນກີບຕໍ່ກິໂລ, ໄກ່ລາດປອກ 45 ພັນກີບຕໍ່ກິໂລ; ໄກ່ພັນປອກ 33 ພັນກີບຕໍ່ກິໂລ, ປານິນກະຊັງ 18 ພັນກີບຕໍ່ກິໂລ, ຜັກຫອມປ້ອມ 18 ພັນກີບຕໍ່ກິໂລ, ຜັກຫອມລາບ 14 ພັນກີບຕໍ່ກິໂລ, ຜັກສະຫຼັດ 7 ພັນກີບຕໍ່ກິໂລ; ໝາກເຜັດ 14 ພັນກີບຕໍ່ກິໂລ, ໝາກນາວ 8 ພັນກີບຕໍ່ກິໂລ.