ໄຟຟ້າ 4 ຕົວເມືອງ ກຽມພ້ອມຮັບໃຊ້ປະຊາຊົນໄລຍະປີໃໝ່ລາວ

340

ໃນໄລຍະບຸນປີໃໝ່ລາວ ອັດຕາການຊົມໃຊ້ໄຟຟ້າໃນນະຄອນຫຼວງວຽງຈັນແມ່ນເພີ່ມຂຶ້ນຫຼາຍ ໂດຍສະເພາະແມ່ນ 4 ເມືອງໃນ ປະກອບມີ: ເມືອງຈັນທະບູລີ, ສີສັດຕະນາກ, ໄຊເສດຖາ ແລະ ເມືອງສີໂຄດຕະບອງ. ຂະນະທີ່ຫົວໜ້າສາຂາໄຟຟ້າ 4 ຕົວເມືອງ ເປີດເຜີຍໄດ້ມີການກຽມທັງບຸກຄະລາກອນ 100 ກວ່າຄົນ ແລະ ພາຫະນະຮັບໃຊ້ຄົບຊຸດເຂົ້າປະຈຳການນັບແຕ່ຕົ້ນເດືອນເມສາເພື່ອກຽມຄວາມພ້ອມທຸກດ້ານກ່ອນຈະເຖິງປີໃໝ່ລາວນີ້.

ທ່ານ ໂພໄຊ ພົມມະທຳ ຫົວໜ້າສາຂາໄຟຟ້າ 4 ຕົວເມືອງ ທີ່ຂຶ້ນກັບຝ່າຍປະຕິບັດການໄຟຟ້ານະຄອນຫຼວງວຽງຈັນ ໃຫ້ສໍາພາດວ່າ: ໃນປັດຈຸບັນການຊົມໃຊ້ໄຟຟ້າຢູ່ 4 ເມືອງໃນ ຂອງນະຄອນຫຼວງວຽງຈັນ ມີທ່າອ່ຽງສູງຂຶ້ນ ເຊິ່ງສັງເກດເຫັນໄດ້ຈາກການຍົກກຳລັງໝໍ້ແປງ ແລະ ປັບປຸງຕາຂ່າຍຢູ່ເລື້ອຍໆ. ໃນນີ້, ພວກເຮົາມີສູນສ້ອມແປງໄຟສຸກເສີນຕະຫຼອດ 24 ຊົ່ວໂມງ ຢູ່ 5 ຈຸດ ຄື: ສູນບໍລິການສີສະເກດ ແລະ ສູນບໍລິການໂພນຕ້ອງ ເມືອງຈັນທະບູລີ, ສູນບໍລິການ ຈອມເພັດ ເມືອງສີສັດຕະນາກ, ສູນບໍລິການ ຫົວຂົວ ເມືອງໄຊເສດຖາ ແລະ ສູນບໍລິການເມືອງສີໂຄດຕະບອງ. ສ່ວນສະຖານີຈໍາໜ່າຍໄຟແຮງກາງ 22 ກິໂລໂວນ ມີ 4 ແຫ່ງ ຄື: ສະຖານີໂສກປ່າຫຼວງ, ສີສະເກດ, ທາດຫຼວງ ແລະ ດົງນາໂຊກ.

ເວົ້າສະເພາະໃນໄລຍະຕະຫຼອດເດືອນເມສານີ້ ພວກເຮົາໄດ້ຈັດວາງຈໍານວນພົນເຂົ້າປະຈໍາການທີ່ຜັດປ່ຽນກັນທັງເວັນ ແລະ ຄືນ ຈໍານວນ 100 ກວ່າຄົນ ພ້ອມກັບພາຫະນະຮັບໃຊ້ຄົບຊຸດ. ໃນນີ້, ຄະນະຮັບຜິດຊອບປະຈໍາຢູ່ແຕ່ລະສະຖານທີ່ ແລະ ສູນບັນຊາ ລວມທັງໝົດຈໍານວນ 36 ຄົນ. ນອກນັ້ນ, ຍັງມີພະນັກງານປະຈໍາຢູ່ສູນບໍລິການສີສະເກດ 23 ຄົນ, ສູນບໍລິການໂພນຕ້ອງ 21 ຄົນ ; ສູນບໍລິການຈອມເພັດ ເມືອງສີສັດຕະນາກ 22 ຄົນ; ສູນບໍລິການຫົວຂົວ ເມືອງໄຊເສດຖາ 20 ຄົນ ແລະ ສູນບໍລິການເມືອງສີໂຄດຕະບອງ 20 ຄົນ. ຄຽງຄູ່ກັນນັ້ນ, ກໍຍັງມີພະແນກຄຸ້ມຄອງຕາຂ່າຍເຂົ້າປະຈໍາການໃນໄລຍະປີໃໝ່ນີ້ 6 ທີມ ມີຈໍານວນ 33 ຄົນ; ພະນັກງານປະຈໍາຢູ່ສາງແຕ່ລະສາຂາ 3 ຄົນ ແລະ ຄະນະນໍາຕິດຕາມແຕ່ລະມື້ ຈໍານວນ 4 ທ່ານ.

ທ່ານກ່າວຕື່ມວ່າ: ມາຮອດປັດຈຸບັນພວກເຮົາໄດ້ສຳເລັດການຕິດຕັ້ງ, ສ້ອມແປງຕາຂ່າຍ, ຍົກລະດັບໝໍ້ແປງ, ການກວດກາດ້ານເຕັກນິກ ແລະ ຈັດສັນບຸກຄະລາກອນ ເພື່ອເຂົ້າປະຈຳການນັບແຕ່ຕົ້ນເດືອນເມສາຜ່ານມາ ເພື່ອກຽມຄວາມພ້ອມທຸກດ້ານກ່ອນຈະເຖິງປີໃໝ່ລາວນີ້. ບໍ່ພຽງແຕ່ພວກເຮົາກຽມຄວາມພ້ອມພາຍໃນກັນເອງແລ້ວ ຍັງປະສານກັບເຈົ້າໜ້າທີ່ດັບເພີງນະຄອນຫຼວງ ເພື່ອຊ່ວຍປະສານສົມທົບຫາກມີກໍລະນີເກີດອັກຄີໄພ ຫຼື ໄຟຟ້າສຸກເສີນຕ້ອງໄດ້ແຈ້ງດ່ວນ ເພື່ອແກ້ໄຂໃຫ້ທັນການ ເນື່ອງໃນໂອກາດບຸນປີໃໝ່ລາວທີ່ຈະມາເຖິງນີ້ ກໍຄາດວ່າ ຄວາມຕ້ອງການຊົມໃຊ້ໄຟຟ້າເພີ່ມຂຶ້ນ ແຕ່ໄຟຟ້າ 4 ຕົວເມືອງພວກເຮົາກໍມີ ຄວາມພ້ອມທຸກດ້ານໃນໄລຍະເທດສະການນີ້.

ສໍາລັບການຕິດຕັ້ງໝໍ້ນັບໄຟແຕ່ເດືອນມັງກອນ ຫາ ເດືອນມີນາ 2019 ເຫັນວ່າເພີ່ມຂຶ້ນຫຼາຍສົມຄວນ ສັງເກດເຫັນໃນເດືອນມັງກອນໄດ້ຕິດຕັ້ງໝໍ້ນັບໄຟໃໝ່ ຈໍານວນ 664 ໜ່ວຍ ແລະ ປ່ຽນຖ່າຍ – ເປ່ເພ 587 ໜ່ວຍ; ເດືອນກຸມພາໄດ້ຕິດຕັ້ງໃໝ່ 553 ໜ່ວຍ ແລະ ປ່ຽນຖ່າຍ – ເປ່ເພ 253 ໜ່ວຍ; ເດືອນມີນາ ຕິດຕັ້ງໃໝ່ 530 ໜ່ວຍ ແລະ ປ່ຽນຖ່າຍ – ເປ່ເພ 278 ໜ່ວຍ. ນອກນັ້ນ, ຍັງມີການເສີມໝໍ້ແປງ 14 ໜ່ວຍ, ຍົກກໍາລັງໝໍ້ແປງ 6 ໜ່ວຍ ແລະ ປ່ຽນໝໍ້ແປງທີ່ເປ່ເພ 4 ໜ່ວຍ.

ໂອກາດດຽວກັນ, ທ່ານຫົວໜ້າໄຟຟ້າສາຂາ 4 ຕົວເມືອງ ກໍຮຽກຮ້ອງໃຫ້ທຸກພາກສ່ວນໃນທົ່ວສັງຄົມຈົ່ງມີສະຕິໃນເວລາຊົມໃຊ້ໄຟຟ້າ, ຖ້າຫາກບໍ່ມີຄວາມຈຳເປັນກໍຕ້ອງມອດໄວ້ ຫຼື ກ່ອນອອກຈາກເຮືອນກໍຕ້ອງໄດ້ກວດກາຄັກແນ່. ທັງນີ້, ກໍເພື່ອປ້ອງກັນການເກີດອັກຄີໄພ ແລະ ປະຢັດຄ່າໃຊ້ຈ່າຍຂອງທ່ານ ໂດຍສະເພາະແມ່ນໃນໄລຍະລະດູຮ້ອນລວມທັງປີໃໝ່ລາວທີ່ຈະມາເຖິງນີ້.

ໃນຕອນທ້າຍທ່ານຍັງຮຽກຮ້ອງມາຍັງສັງຄົມທຸກທົ່ວໜ້າຈົ່ງໃຫ້ຄວາມຮ່ວມມື ແລະ ຕື່ນຕົວຈ່າຍຄ່າຊົມໃຊ້ກະແສໄຟຟ້າເປັນປົກກະຕິ ໂດຍສາມາດຊຳລະໄດ້ຫຼາຍຊ່ອງທາງ ເປັນຕົ້ນແມ່ນຈ່າຍຜ່ານລະບົບ BCEL One, ລົດເກັບເງິນເຄື່ອນທີ່, ໜ່ວຍບໍລິການໄຟຟ້າແຕ່ລະເມືອງ ຫຼື ສູນບໍລິການໄຟຟ້າອື່ນໆ ຫາກມີຂໍ້ສົງໄສປະການໃດສາມາດສອບຖາມຂໍ້ມູນເພີ່ມຕື່ມສາຍດ່ວນ 1199.