ປີໃໝ່ໄລຍະເວລາສັ້ນໆ ແຕ່ເປັນໂອກາດຫາລາຍເສີມໄດ້ຫຼາກຫຼາຍ

298

ອີກບໍ່ເທົ່າໃດມື້ ກໍຈະເຖິງເທດສະການທີ່ໃຜຫຼາຍຄົນລໍຖ້າມາຕະຫຼອດປີ ນັ້ນແມ່ນເທດສະການບຸນປີໃໝ່ລາວນັ້ນເອງ ຫຼາຍຄອບຄົວກໍໃຊ້ຊ່ວງເວລາຢຸດຍາວນີ້ ກັບບ້ານເກີດໄປຫາຄອບຄົວ, ນັດລວມຍາດຕິພີ່ນ້ອງ ເພື່ອພົບປະສ້າງສັນ ຖາມຂ່າວທຸກສຸກດີບ ປິລະເທື່ອໃຫ້ຊື່ນໃຈ ແຕ່ອີກຫຼາຍຄົນກໍ່ໃຊ້ຊ່ວງເທດສະການນີ້ຫາລາຍໄດ້ພິເສດຈາກການຂາຍເຄື່ອງທີ່ຕອບສະໜອງຕໍ່ຄວາມຕ້ອງການຂອງຜຸ້ຊົມໃຊ້ ເຮົາເລີຍມີທຸລະກິດສິນຄ້າມາແນະນຳໃຫ້ສຳລັບຜູ້ທີ່ຢາກຫາລາຍໄດ້ພິເສດຊ່ວງນີ້ມາແນະນຳ.

ນໍ້າ: ບໍ່ວ່າຈະເປັນນໍ້າດື່ມ, ນໍ້າສຳລັບຫຼິ້ນປີໃໝ່ ຫຼື ນ້ຳກ້ອນ ລ້ວນແລ້ວແຕ່ເປັນສິ່ງທີ່ຕ້ອງການຂອງລູກຄ້າ ເປັນຕົ້ນແມ່ນ ນໍ້າດື່ມແກ້ຮ້ອນ, ແກ້ຄໍແຫ້ງ ຫຼື ນໍ້າກ້ອນທີ່ຄົນມັກໃສ່ກັບນໍ້າ ບອກເລີຍໃຜຖືກຫົດນໍ້າຮັບຮອງມີສະດຸ້ງ.

ຂາຍປືນສີດນໍ້າ, ຖັງນໍ້າ, ໂອ ຫຼື ຄຸນ້ອຍ: ເມື່ອມີນໍ້າແລ້ວ ກໍ່ຕ້ອງມີອຸປະກອນສຳລັບຫຼິ້ນນໍ້າເພື່ອບັນຈຸ, ຫົດ, ສີດນໍ້າ ເຊິ່ງເປັນທີ່ນິຍົມກັນທຸກໆປີ ສະນັ້ນ ການຂາຍອຸປະກອນເຫຼົ່ານີ້ກໍ່ເປັນອີກທາງເລືອກໜຶ່ງ ທີ່ກຸ່ມຄົນຂາຍເຄື່ອງໄດ້ສັ່ງໃໝ່ ຫຼື ນຳອອກມາຈາກຄັງຂອງຮ້ານຕົນເອງ ເພື່ອຂາຍໄປຕາມເທດສະການ.

ຖົງກັນນໍ້າໃສ່ໂທລະສັບ: ເປັນອີກໜຶ່ງສິນຄ້າທີ່ຂາຍໄດ້ດີເຊັ່ນກັນທັງໃນທ້ອງຕະຫຼາດ ແລະ ການຂາຍຜ່ານທາງອອນໄລນ໌ ເພາະບໍ່ວ່າໃຜກໍ່ມີໂທລະສັບຕິດໂຕເອົາໄວ້ໂທນັດພົບກັນຕາມສະຖານທີ່ຕ່າງໆ ຫຼື ໄວ້ໂທຍາມສຸກເສີນ ການມີຖົງຢາງກັນນໍ້າຈະຊ່ວຍໃຫ້ປ້ອງກັນຄວາມເສຍຫາຍຈາກການຫຼິ້ນນ້ຳ ເຊິ່ງຖົງກັນນ້ຳກໍ່ຈະມີລວດລາຍ, ຮູບຮ່າງ ທີ່ແຕກຕ່າງກັນ ກໍ່ແລ້ວແຕ່ຄວາມມັກຂອງຜູ້ບໍລິໂພກເອງ.

ແປ້ງ: ແປ້ງກໍ່ຂາຍດີເຊັ່ນກັນ ຫາກຮັບມາຈາກພື້ນທີ່ຜະລິດຕັ້ງແຕ່ຕົ້ນ ເພາະສ່ວນໃຫຍ່ຈະຂາຍເປັນໂລ ແລ້ວຄ່ອຍນຳມາຂາຍຍ່ອຍເປັນຖົງນ້ອຍໆ ແນວໃດກໍ່ຂາຍໄດ້ ເພາະນິຍົມເອົາແປ້ງໄປທາໝູ່ໃນກຸ່ມແກ້ງໜຸ່ມສາວ ແຕ່ເພື່ອຮັກສາ ວັດທະນະທຳ ຮີດຄອງປະເພນີ ຕ້ອງຂໍອະນຸຍາດກ່ອນໄປຈະທາແປ້ງໃສ່ຜູ້ໃດໜຶ່ງ.

ເສື້ອຮາວາຍ (ເສື້ອລາຍດອກ) ຫຼື ເສື້ອສະກີນໂລໂກ: ສຳລັບເສື້ອລາຍດອກແມ່ນເຫັນຫຼາຍທີ່ສຸດແລ້ວຕາມຮ້ານແຄມທາງ ໃນໄລຍະກ່ອນປີໃໝ່ຂອງທຸກໆປີ ແລະ ກໍ່ບໍ່ແພ້ກັບການຂາຍຜ່ານທາງອອນໄລນ໌ເຊັ່ນກັນ ເພາະຂໍ້ສະດວກກໍ່ຄືຜູ້ຂາຍນຳມາສົ່ງໄດ້ເຖິງທີ່ ແຕ່ກໍ່ມີຄ່າຂົນສົ່ງໜ້ອຍໜຶ່ງ ນອກຈາກຄົນທົ່ວໄປຈະຊື້ມາໃສ່ຫຼິ້ນນ້ຳແລ້ວ ໃນອົງກອນໃດໜຶ່ງກໍ່ອາດຈະສັ່ງເປັນຈຳນວນຫຼາຍເພື່ອໃຫ້ພະນັກງານໃສ່ໃນມື້ກິນລ້ຽງ ອາດຈະເປັນເສື້ອລາຍດອກ, ເສື້ອທີ່ສະກີນລວດລາຍຕາມການອອກແບບຂອງລູກຄ້າເອງ ທີ່ສຳຄັນລາຄາກໍ່ບໍ່ແພງເກີນໄປ.

ຂາຍອາຫານ: ຫຼີ້ນນໍ້າມາເມື່ອຍໆ ຄວາມຫິວກໍ່ຖາມຫາ ເຂົ້າຜັດ, ເຂົ້າກະເພົາ, ລູກຊີ້ນ, ປະເພດຕຳ, ເຝີ, ເຂົ້າປຽກ ແລະ ອື່ນໆ ກໍ່ຫາຮ້ານໄດ້ງາຍ. ແຕ່ສຳລັບແອດມິນ ຍ່າງເລາະກິນຕາມຮ້ານທີ່ຂາຍຢູ່ໜ້າວັດ ແຕ່ລະວັດ ເມື່ອໄປສົງພະກໍ່ອິ່ມຈົນບໍ່ຍາກເລາະຕໍ່ ມີທັງ ກ້ວຍປີ້ງຍັດໃສ້ໝາກພ້າວ, ຈືນລູກຊີ້ນ, ຂະໜົມ ນ້ຳຫວານ ຫຼາຍຢ່າງ.

ນອກຈາກນີ້ ສິນຄ້າທີ່ຂາຍດີ ຍັງມີ ທູບທຽນ, ດອກໄມ້, ໝາກເບັງ, ນໍ້າຫອມ ເພື່ອກຽມໄວ້ໄປໃຊ້ ຫົດນໍ້າດຳຫົວຜູ້ໃຫຍ່, ເຮັດຂັນສຸມມາ ແລະ ແຕ່ງນໍ້າຫອມ ເພື່ອໄປສົງພະ ແລະ ອື່ນໆ ອີກຫຼາຍຢ່າງ.

ຂໍ້ມູນທີ່ກ່າວມານີ້ເປັນພຽງສ່ວນໜຶ່ງເທົ່ານັ້ນ ໃນການຫາລາຍໄດ້ໃນໄລຍະປີໃໝ່ ເຊິ່ງກໍ່ຍັງມີອີກຫຼາຍໄອເດຍ ໃນການຫາເງິນໃນໄລຍະນີ້ ແຕ່ສຳລັບໃຜມີຄວາມຄິດຢາກຫາລາຍໄດ້ ກໍ່ຕ້ອງລອງເບິ່ງປັບປ່ຽນຕາມໄອເດຍຕົນເອງ ແລະ ທີ່ສຳຄັນເຮັດໃຫ້ມັນຖືກຕ້ອງຕາມຂັ້ນຕອນກໍ່ພໍ.