ສະຫຼອງສັບປະດາແຫ່ງຊາດດ້ານຄວາມປອດໄພທາງຖະໜົນ

220

ໃນວັນທີ 6 ເມສາ 2019 ກະຊວງໂຍທາທິການ ແລະ ຂົນສົ່ງ ຮ່ວມກັບກະຊວງປ້ອງກັນ ຄວາມສະຫງົບ ຈຶ່ງໄດ້ຈັດພິທີໂຮມຊຸມນຸມຍ່າງເພື່ອສຸຂະພາບ ສະເຫຼີມສະຫຼອງສັບປະດາແຫ່ງຊາດດ້ານຄວາມປອດໄພທາງຖະໜົນຂຶ້ນໂດຍການເຂົ້າຮ່ວມຂອງ ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ; ທ່ານ ຄຳຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກີລາ; ທ່ານ ພົນຈັດຕະວາ ທອງສະຫວັນ ວົງສະຫວັດ ຮອງຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ, ບັນດາຮອງລັດຖະມົນຕີ, ຫົວໜ້າກົມ, ຮອງກົມ, ຕາງໜ້າຈາກອົງການຈັດຕັ້ງມະຫາຊົນ, ບັນດາຫ້ອງການ, ໂຮງຮຽນ ມ.ປາຍ ແລະ ມວນຊົນເຂົ້າຮ່ວມຢ່າງຫຼວງຫຼາຍ.

ທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງ, ທັງເປັນຫົວໜ້າກອງເລຂາຄະນະກຳມະການແຫ່ງຊາດດ້ານຄວາມປອດໄພທາງຫຼວງ ໄດ້ກ່າວວ່າ: ງານສັບປະດາຄວາມປອດໄພທາງຖະໜົນແຫ່ງຊາດ ຄັ້ງທີ 3 ຂອງ ສປປ ລາວ, ໂດຍມີຄຳຂວັນປະຈຳປີ 2019 ແມ່ນ: ຊີວິດປອດໄພ ຮ່ວມໃຈປ້ອງກັນອຸບັດເຫດ, ສຳລັບການຈັດງານຄັ້ງນີ້ກໍແມ່ນການປະຕິບັດພັນທະໜຶ່ງຂອງ ສປປ ລາວ ຕໍ່ສາກົນໃນການປະກອບສ່ວນຫຼຸດຜ່ອນການເກີດອຸບັດເຫດ ແລະ ສູນເສຍຊີວິດຂອງຜູ້ໃຊ້ລົດໃຊ້ຖະໜົນໃນທົ່ວໂລກ ເວົ້າລວມ, ເວົ້າສະເພາະແມ່ນການປະກອບສ່ວນຈັດຕັ້ງປະຕິບັດຍຸດທະສາດ ແລະ ແຜນນະໂຍບາຍຂອງພັກ – ລັດໃນການຫຼຸດຜ່ອນຄວາມທຸກຍາກ ແລະ ປາກົດການຫຍໍ້ທໍ້ຂອງສັງຄົມຖືວ່າປັດຈຸບັນການເກີດອຸບັດເຫດຕາມທາງຫຼວງແມ່ນສ້າງຄວາມເສຍຫາຍຢ່າງຫຼວງຫຼາຍ ສຳລັບ ສປປ ລາວ ເຮົາໃນແຕ່ລະປີມີຜູ້ເສຍຊີວິດປະມານ 1.000 ຄົນ ສ້າງຄວາມເສຍຫາຍປະມານ 500 ລ້ານໂດລາ.

ດັ່ງນັ້ນ, ເພື່ອເປັນການປູກຈິດສຳນຶກກ່ຽວກັບຄວາມປອດໄພ ແລະ ການໃຊ້ລົດໃຊ້ຖະໜົນໃຫ້ແກ່ສັງຄົມ, ໃຫ້ເຫັນໄດ້ເຖິງໄພອັນຕະລາຍຂອງການຂັບຂີ່ລົດໄວ, ການດື່ມສິ່ງມຶນເມົາແລ້ວຂັບລົດ ເພາະ 2 ຢ່າງນີ້ແມ່ນສາເຫດຕົ້ນຕໍຂອງການເກີດອຸບັດເຫດຢູ່ບ້ານເຮົາ ພ້ອມເຫັນໄດ້ເຖິງຜົນກະທົບ, ຜົນເສຍ ແລະ ຜົນສະທ້ອນຂອງການເກີດອຸບັດເຫດຕໍ່ການດຳລົງຊີວິດຂອງສັງຄົມ, ຕໍ່ການພັດທະນາເສດຖະກິດ ແລະ ປະເທດຊາດ ເຊິ່ງສັບປະດາຄວາມປອດໄພທາງຖະໜົນປີນີ້ແມ່ນພວກເຮົາໄດ້ກຳນົດເອົາລະຫວ່າງວັນທີ 1 – 7 ເມສາ ລວມມີຫຼາກຫຼາຍກິດຈະກຳທີ່ີຈັດຂຶ້ນຢູ່ຫຼາຍກະຊວງ, ຫ້ອງການ ແລະ ສະຖາບັນຕ່າງໆ.

ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ກ່າວວ່າ: ບັນຫາການເກີດອຸບັດເຫດທາງທ້ອງຖະໜົນໃນທົ່ວໂລກໄດ້ມີມາດຕະການເພີ່ມຂຶ້ນຢ່າງໄວວາ ໂດຍສະເພາະໃນບັນດາປະເທດທີ່ກຳລັງພັດທະນາ ເຊິ່ງສ້າງຄວາມສູນເສຍຕໍ່ຊີວິດ ແລະ ຊັບສິນຂອງສັງຄົມ ລວມທັງສ້າງຄວາມເສຍຫາຍຕໍ່ເສດຖະກິດ ແລະ ປະເທດຊາດ. ການຈັດສັບປະດາແຫ່ງຊາດດ້ານຄວາມປອດໄພທາງຖະໜົນໃນແຕ່ລະປີແມ່ນເປັນສິ່ງຈຳເເປັນ ແລະ ມີຄວາມສຳຄັນທີ່ທຸກພາກສ່ວນກ່ຽວຂ້ອງທັງພາກລັດ ແລະ ເອກະຊົນໄດ້ຮ່ວມແຮງຮ່ວມໃຈປະກອບສ່ວນເຫື່ອແຮງວັດຖຸປັດໄຈ ຈັດງານສັບປະດາຄວາມປອດໄພທາງຖະໜົນນີ້ຂຶ້ນ ແນໃສ່ປຸກລະດົມໃຫ້ທຸກພາກສ່ວນ ແລະ ທຸກຊັ້ນຄົນໃນສັງຄົມເຫັນໄດ້ເຖິງໄພອັນຕະລາຍຈາກການເກີດອຸບັດເຫດ ແລ້ວພ້ອມໃຈກັນປົກປ້ອງຊີວິດ ແລະ ຊັບສິນຂອງຕົນຈາກການເກີດອຸບັດເຫດ ແລະ ພ້ອມພຽງກັນເຄື່ອນໄຫວເພື່ອປະກອບສ່ວນໃນການຫຼຸດຜ່ອນການເກີດອຸບັດເຫດລົງເທື່ອລະກ້າວ.

Credit: Laoedaily